Filmi artistik me metrazh të shkurtë “Maree” i regjisorit James Pelerito, me Luan Bexhetin në rolin kryesor, ka fituar çmimin "Grand Prize" për filmin e huaj në festivalin ndërkombëtar të filmit “THE RHODE ISLAND FILM FESTIVAL”. Filmi është xhiruar në Venedik të Italisë.
Premiera e filmit “Maree” është shfaqur në muajin prill, në Nju Jork. Filmi tani është duke u shfaqur në Boston dhe Miami, kurse së shpejti do të jetë shfaqet edhe në Festivalin e filmit në Malibu dhe Montreal të Kanadës.
Filmi “Maree” ka shënuar suksese edhe në festivale të tjera kinematografike. Kritika e filmit e ka vlerësuar lartë lojën dhe nivelin interpretues të Luan Bexhetit.
Skenari i filmit ka temë shqiptare. Duket se ekspresiviteti, aktualiteti dhe vetë ritmi i çështjes shqiptare provokuan jurinë profesionale, e cila shpërbleu filmin “Maree”.
Në këtë film aktori Luan Bexheti flet në gjuhën shqipe. Në këtë gjuhë flet edhe aktori i ri italian, i cili prezantohet në rolin e fëmijës Davide Murtas.
Kritikët e artit filmik shprehen optimist përsa i përket sukseseve të reja të filmit "Maree". Ata vlerësojnë se jehona e sukseseve të filmit do të shtrihet edhe mëtej.
ATDHEU IM ËSHTË DASHURIA
Bexheti thotë se atdheu i tij është dashuria e shenjtë. Ai thotë se shpirti i tij është i mbushur me dashuri për njerëzit dhe për kombin që i takon.
“Dëshiroj që botën artistike shqiptare dhe vetë artistët shqiptarë, t’ua ofroj amerikanëve dhe perëndimorëve. Kam ardhur në SHBA që të bëhem i famshëm dhe të hyjë në analet e Hollivudit”, thotë Bexheti, i bindur se një ditë do të jetë banor i qytetit të filmit.
“Nuk kam frikë nga roli. Kur munden të tjerët përse të mos mundem edhe unë”, thotë ai.
Aktualisht Luan Bexheti është duke luajtur dhe në teatër. Ai interpreton rolin e Dritan Malasit, në komedinë "SEXTET", me regji të Bekim Qelës dhe në produksion të Gentian Grezdës.
Ai ka edhe faqen e vetë në internet: www.luanbegetti.com
NJË DITË DO TË JEM BANOR I HOLLIVUDIT
Aktori i njohur shqiptar Luan Bexheti, i cili jeton dhe vepron në Amerikë, ka lindur në Odri të Tetovës më 1972. Si katër vjeçar ai së bashku me familjen vendoset në Norvegji, ku babai i tij punonte si mësues.
Karrierën filmike e filloi në Norvegji, në vitin 1991, ku edhe i lindi idea për të stjudjuar aktrimin.
Ca kohë ka qëndruar në Angli ku ka studjuar për aktrim. Në Shtetet e Bashkuara të Amerikës ai ka shkuar në vitin 1995, ku edhe ka kryer shkollën private "The Lee Strasberg Theatre Institute".
Luan Bexheti deri tani ka regjistruar disa reklama për kompanitë e mëdha sikurse: BMW ne Itali, Levis Jeans, Thimoty's Coffee,7-up, Swiss Com, Toro soup's, Braun etj.
Ai ka luajtur disa role në teatër përkrah aktorëve të njohur: Xhevat Limani, Timo Flloko, Uliks Fehmiu (djali i Bekim Fehmiut), Agim Biberaj etj.
Ndër filmat që ka aktruar mund të veçohen: "Dr. Ambedkar," "Mollotov Samba", "Bitter Waves", " Pompeo", "The piano Tuner", "Ketchup Land".
Për Bexhetin Amerika është hyrje në kuptimin e jetës. Ai thotë se është kapluar nga ritmi i saj dhe atje e ndjen veten të lirë si krijues.
Luan Bexheti, i cili e ka shijuar atmosferën hollivudiane, thotë se pretendimet e tij janë që të futet në botën e “ustallarëve” të Hollivudit.
“Jam i bindur se së shpejti do të arrij atje”, thotë ai.
Krijoni Kontakt