Strategjia përfshin “qëndrimin e detyruar”për familjet e trafikantëve dhe sekuestrimin e parave “të pista”
Aleksandra Bogdani
TIRANË- Grupet kriminale, të cilat gjatë viteve të fundit kanë treguar aftësi organizative më të mira se vetë strukturat shtetërore si dhe rritja e ndjeshme e krimeve të rënda, ka nxitur një strategji të re, për të siguruar rendin dhe qetësinë në vendin tonë. Ideatori i kësaj strategjie është kryetari i komisionit parlamentar për Rendin dhe SHISH-in, Neritan Ceka. Ka marrë shkas nga vrasësi i komisarit Gani Malushi, i cili njihet si një njeri i lidhur familjarisht me krimin, për të propozuar zbatimin e modelit italian, që legjitimon luftën kundër grupeve mafioze, kryesisht në Siçili. “Kohët e fundit kam shqyrtuar disa modele, kryesisht italiane, në lidhje me një strategji të luftës kundër krimit të organizuar”,-thotë për “Shekullin”, Neritan Ceka. Internimi i familjeve të grupeve kriminale si dhe sekuestrimi i pasurive, të cilat nuk kanë një origjinë të “pastër”, përbën edhe thelbin e strategjisë së Cekës, për të luftuar krimin e organizuar në vendin tonë.
Internimi
“Gjatë viteve të fundit është vënë re krijimi i grupeve kriminale mes vëllezërve apo pjesëtarëve të një fisi, kryesisht në Vlorë, Tropojë apo edhe në Tiranë”,-shton për “Shekullin”, kryetari i Komisionit Parlamentar për Rendin dhe SHISH-in, Neritan Ceka. Kjo sipas tij i ngjason organizimit të familjeve mafioze, në jug të Italisë. E ndërsa vendi fqinj e ka zgjidhur luftën kundër këtyre grupeve mafioze, nëpërmjet ligjit “ soggiorno obliggato”, shteti shqiptar mund të përfitojë prej kësaj eksperience. Kështu, në cilësinë e kryetarit të komisionit parlamentar për Rendin dhe SHISH-in, Ceka hedh idenë e internimit të familjeve të atyre personave, të cilët janë dënuar për vepra të rënda kriminale. “Unë mendoj se këto familje duhet të hiqen nga ambienti ku jetojnë për të qëndruar në një vend të kontrolluar nga policia”,-thotë Ceka, duke menduar se në këtë mënyrë mund të paralizohet krimi i këtyre grupeve të organizuara. Por ai shton se këto “internime” duhen bërë vetëm me vendim gjykate.
Sekuestrimi
Verifikimi i pasurive të personave që dyshohen për veprimtari kriminale, është një tjetër pikë e rëndësishme e strategjisë antikrim, të propozuar publikisht nga Ceka. Ai shton se duhet të verifikohen të gjitha pasuritë e personave të dënuar apo të akuzuar për trafiqe të ndryshme, pasuri këto që nuk justifikohen veçse me veprimtarinë kriminale të kryer. Kështu, organet e drejtësisë duhet të identifikojnë të gjitha këto grupe të organizuara, të cilat akuzohen si trafikantë të lëndëve narkotike apo “të mishit të bardhë”, e më pas të verifikojnë edhe pasuritë e tyre. Ndërsa pas kësaj faze, nevojitet një vendim gjykate për të sekuestruar pasuritë e ardhura nga veprimtaritë kriminale.
Strategjia
Neritan Ceka thotë për “Shekullin” se është një ide e mirë, që qeveria shqiptare të adoptojë ligjin italian “soggiorno obliggato”, për të goditur grupet e organizuara shqiptare. Por ai shton se për realizimin e kësaj ideje nevojitet një ligj i miratuar nga parlamenti shqiptar si dhe një studim i mirëfilltë i kësaj ideje. Ceka nuk mund të japë përgjigje për vendin ku në të ardhmen pritet të vendosen familjet e “padrinove” të drogës apo tutorëve të vajzave shqiptare, pasi kjo gjë duhet studiuar. Por ai mendon se nevojitet një ligj, i cili nuk do të cënojë aspak liritë e të drejtat e njeriut, ligj ky që do të ketë si qëllim vetëm goditjen e grupeve kriminale. Ndërsa ai shton se kjo është një ide e re , e cila nuk është propozuar ende në asnjë institucion shtetëror për t’u miratuar. Megjithatë, kjo është strategjia e parë e propozuar, për të luftuar veprimtarinë, gjithnjë e në rritje të grupeve kriminale si dhe paralizimin e tyre.
MODELI
“Qëndrimi i detyruar ” në Itali
TIRANË- Dispozitat kundër mafias janë miratuar në Itali në 31 maj të vitit 1965. Por ky ligj, i cili ka pasur si qëllim goditjen e veprimtarisë kriminale të familjeve mafioze, kryesisht në jug të Italisë, është modifikuar përsëri në 8 qershor të vitit 1992. Sipas këtij ligji, personat e akuzuar si pjesëmarrës në veprimtarinë mafioze i nënshtroheshin “Soggiorno Obliggato-s”, sipas së cilës këta persona dhe familjet e tyre qëndronin në një vend, nën mbikëqyrjen e forcave të policisë. Zbatimi i këtij ligji bëhej në Itali vetëm me vendimin e Gjykatës së Apelit, e cila merrte në shqyrtim si organin e akuzës ashtu edhe palën mbrojtëse. Dispozitat kundër mafias kanë sjellë goditjen e veprimtarive të disa grupeve mafioze, familjet e së cilave janë internuar nga vendbanimet e tyre. Dje është hedhur ideja e zbatimit të këtyre dispozitave edhe në vendin tonë, për të luftuar në këtë mënyrë trafiqet dhe krimin e organizuar.
Krijoni Kontakt