Kristaq Djalli

[Brari]

GSH
------

FLET KRYETARI I PARTISE SE EMIGRACIONIT , PAPA

"Ja përse e shkrova librin e seksit"
Papa: Gjithë intimitetet e botuara janë të vërteta


--------------------------------------------------------------------------------



Nuk mendoj se ish e fejuara ime ka tentuar vetë-vrasjen për shkak se është përmendur në librin "6 muaj seks me L.K" dhe aq më pak lejoj që të flitet për romanin si për një libër pornografik. Ai është një best-seller, është libri më i bukur i shkruar gjer më sot për dashurinë, që kurrsesi nuk mund të ketë një efekt të tillë". Kryetari i Partisë së Emigracionit, Kostaq Papa ka deklaruar dje për Gazetën se nuk mund të lejojë komente të tilla për veprën që ka për protagonist atë vetë, 6 muaj nga jeta e tij. Ai qe ndaluar para pak ditësh nga policia e Durrësit nën motivacionin se me rrëfimin publik për marrëdhëniet e tij intime me L.K (në libër është shkruar emri dhe mbiemri i plotë) ka shtyrë këtë të fundit në vetëvrasje.

Kur u bë ndalimi juaj?
Në radhë të parë nuk dua që të konsiderohem si i arrestuar. Mua, më mirë të themi, më kanë rrëmbyer jo për t'u arrestuar po për të verifikuar ca gjëra dhe kjo është më se normale . Ndalimi im nuk është bërë në Shijak siç është deklaruar. Më kanë marrë nga Tirana dhe më kanë çuar pastaj në Durrës.

Për çfarë arsye?
Më thanë se unë nëpërmjet librit tim "6 muaj seks me L.K" kisha bërë që L.K të tentonte vetëvrasjen. Gjë që unë e mohoj kategorikisht. Libri, që në fakt nuk e kam shkruar unë, (historia është imja) është proza më e bukur për dashurinë, që trajtohet e prekshme, konkrete.

Nuk jeni ju autori i librit?
Jo, është Alban Toska. Unë kam treguar historinë, ai e ka përdorur si subjekt.

Dhe çdo gjë që përshkuhet është reale? A përmendet aty emri i saj?
Po, janë 6 muajt e lidhjes sime me L.K nga Ishmi. Kam qenë i fejuar me të. Kam rrëfyer marrëdhëniet e mia intime, orët e dashurisë, por mendoj se nuk ka asgjë të keqe në këtë mes. Eshtë jeta ime personale dhe kam të drejtën time ta bëj publike, ta rrëfej, ta shkruaj.

E njihnit autorin e librit?
Po, e njihja, prandaj ia besova atij historinë time.

Ku është botuar libri?
Në Itali, është shitur atje dhe një pjesë e kopjeve kanë mbërritur dhe këtu.

Në sa kopje është tregtuar?
Janë botuar rreth 40 kopje. Nuk është fort e lehtë për të gjetur ndonjë prej tyre, vetëm po të ribotohet.

Ju besoj do të keni ndonjërën?
Po, po për momentin ia kam dhënë një të njohurit tim për ta lexuar.

A mund të na flisni pak për të, për përmbajtjen, formën e rrëfimit…?
Eshtë rrëfim në prozë, ju thashë. Ka 164 faqe. Në të tregoj si jam njohur me L.K, marrëdhënien tonë në të gjitha detajet.

A nuk menduat se L.K do të prekej nga kjo? Nuk i morët lejë asaj para se të vendosnit për botim?
Nuk ka arsye për t'u prekur. L.K ka qenë pjesë e jetës sime në atë periudhë, për këtë nuk duhet t'i vijë keq. As nuk mendoj se ka qenë kjo arsyeja e tentativës për vetëvrasje. Unë mendoj se kanë qenë kushtet ekonomike dhe ajo çfarë i ndodhi më voni, ato që e shtynë t'i japë fund jetës.

Pse mendoni kështu?
Se ndalimi im ndodhi një muaj pas aktit të saj. Sepse jam dhe në dijeni për gjëra të tjera që i kanë ndodhur që mund të shpjegojnë tentativën e saj.


Shtyu në vetëvrasje një 24-vjeçare

Arrestimi dhe lirimi i poetit të seksit

DURRËS - Kristaq Papa, 40 vjeç, lindur në Sarandë dhe banues në kryeqytet u arrestua tri ditë më parë nga Policia e Durrësit nën akuzën se ka shtyrë në vetëvrasje një vajzë. L.K., 24 vjeçe, kishte tentuar të vetëhelmohej me pesticide, pasi kishte lexuar librin e Papës, ku përshkruheshin momente intime mes tij dhe 24-vjeçares. Kjo e fundit duke qenë e fejuar me një person tjetër (pasi ishte ndarë nga Papa), ka ndier turp për atë që ishte shkruar për personin e saj në poezitë erotike të Papës dhe kishte vendosur të vetëhelmohej. Por fatmirësisht ndërhyrja e mjekëve të spitalit Ushtarak ka bërë që vajza t'i shpëtojë vdekjes dhe të tregojë para hetuesve shkaqet e këtij veprimi. Pas denoncimit të vajzës, policia kryen arrestimin e Kristaq Papës nën akuzën e "shtyrjes në vetëvrasje". Por pas dy ditësh gjykata vendos lirimin e tij, pasi prokurori nuk kishte mundur të ngrinte ndonjë akuzë ndaj 40-vjeçarit. "Nuk ka elementë që plotësojnë akuzën e ngritur nga policia", është shprehur prokurori përpara trupit gjykues, duke kërkuar hetimin e Papës në gjendje të lirë.


Si e njoha L.K në Krishtlindjet 2001

Eshtë njohur me L.K në vigjilje të Krishtlindjeve të 2001-it. Ajo ishte 19 vjeç, ai po prekte të dyzetat. "Ka qenë dashuri me shikim të parë", pohon Kostaq Papa, tani kur po bën pothuaj një vit që është ndarë prej saj. "E pashë në rrugë, më pas u takuam rastësisht në një sebep familjar. Fejesën e bëmë pas dy muajsh, në shkurt të vitit 2002. E kam dashur shumë, kam investuar për të, e kam ndihmuar. Ajo ishte jetime dhe familja e saj ishte në gjendje të vështirë ekonomike". Por ditët e lumtura janë numëruar të pakta bashkë me fundjavat e mrekullueshme në Sarandë, Elbasan e gjetkë. Kanë pasuar mosmarrëveshjet, sipas Papës ajo nuk i kishte respektuar ndjenjat e tij. Janë ndarë 6 muaj më vonë.


Kishte prirje edhe për politikë

Papa, si e krijoi partinë e tij

TIRANE - Perveç se një poet erotik, i cili e merrte frymëzimin nga ngjarje reale të përjetuara, Kristaq Papa figuron edhe si kryetar i Partisë së Emigracionit. Me sa duket, 40-vjeçari Papa ka pasur edhe aftësi bindëse politike përderisa ka arritur të mbledhë 1000 firma për të themeluar Partinë e Emigracionit. Megji thëse kjo parti rezulton e regjistruar në gjykatë, ende nuk dihet aktiviteti i saj. Hetuesit janë duke punuar për të verifikuar arsyet që e kanë shtyrë Papën të themelojë një parti të tillë-fantazmë.