Komisioni pozite-opozite mbi zgjedhjet e kaluara

[Albo]

PD i lë hapësirë partive të vogla në strukturën me 16 anëtarë


Komisioni, Pollo e PAD tani në koalicion me BF

--------------------------------------------------------------------------------

Ermal Ngjelina

PD-ja zyrtarizoi dje aleancën e përfolur me PAD-in dhe PD(r)-në. Këtë ajo e bëri në mbledhjen e grupit parlamentar. Në këtë mbledhje PD-ja vendosi që të përfaqësohet në komisionin e përbashkët pozitë-opozitë vetëm me dy kandidatë. Dy vendet e tjera në komision ajo i lëshoi për PAD-in dhe PD(r)-në, për të realizuar koalicionin që Berisha shpalli pak kohë më parë.

Lëshimet
Në mbledhjen e djeshme të grupit parlamentar, PD-ja vendosi që në komisionin e përbashkët pozitë-opozitë për zgjedhjet, ajo të përfaqësohet vetëm me dy anëtarë. Në bazë të protokollit Nano- Berisha, PD-ja duhet të përfaqësohej atje me 4 anëtarë; 4 të tjerë do të ishin nga aleatët e tij. Ndërsa dje u vendos që PD-ja të përfaqësohet në këtë komision vetëm me dy anëtarë. Kjo lëvizje nga PD-ja u bë me synimin që në komision të përfaqësohen me anëtarë edhe partitë që Berisha u bëri ftesë për aleancë. Këto janë: PD(r) dhe PAD. Që këto dy parti t'i përgjigjen PD-së pozitivisht për aleancën e deklaruar, Berisha lëshon dy anëtarë të tij, duke ia kaluar këto 2 vende bosh në komisionin pozitë-opozitë PAD-it dhe PD(r)-së. Pra, grupi opozitar në komisionin e përbashkët pozitë- opozitë për zgjedhjet, do të jetë i përfaqësuar nga 2 anëtarë të PD-së dhe nga një anëtar, përkatësisht për partitë: PR, PLL, PBK, PAD, PD(r), PLD. Lëshimi i dytë që bëri dje PD-ja, ka të bëjë me sistemin zgjedhor. Partitë e vogla kërkuan që, pas nëshkrimit të protokollit Nano-Berisha, komisioni i përbashkët të ndryshonte jo vetëm ligjin për zgjedhjet, por edhe sistemin zgjedhor. Ato kërkuan që sistemi zgjedhor aktual, nga maxhoritar, të kthehej në proporcional. Dje Berisha deklaroi se PD-ja, që deri në atë kohë kishte kundërshtuar, do të përkrahte sistemin proporcional të kërkuar nga aleatët e vet.

Strategjia
Me dy lëshimet e fundit, PD-ja e rrit koeficientin e saj të sigurisë për praninë e PAD-it dhe të PD(r)-së në aleancën e madhe që kërkon të realizojë. Kështu, të paktën në komisionin për zgjedhjet PD-ja, në ndryshim nga PS-ja, shkon me 6 aleatë. Ky formacion politik për momentin e konkurron lehtësisht PS-në për zgjedhjet presidenciale. Nëse PD-ja do të dijë t'i menaxhojë edhe në të ardhmen kërkesat e aleatëve, ky formacion do ta konkurrojë PS-në në zgjedhjet e tjera.


Anëtarët e Komisionit

PD: Jemin Gjana, Sokol Olldashi
PR: Aleksandër Garuli
PLL: Sadedin Balla
PBK: Shpëtim Roqi
PLD: Teodor Laço
PAD: Preç Zogaj (diskutohet sot)
PD(r): Nard Ndoka
PS: Bashkim Fino, Ylli Bufi,
Taulant Dedja, Blendi Klosi,
Durim Hushi
PSD: Engjëll Bejta
PBDNJ: Ligoraq Karamalo
PA: Ndue Preka