Nga Çim Peka
Kryeministri i vendit Edi Rama nisi një udhëtim një javor në SHBA në kuadrin e një vizite 45-minutëshe në Shtëpinë e Bardhë. Vizita e një kryeministri në Shtëpinë e Bardhë është lajm i mirë për shqiptarët, edhe pse Rama përfaqëson Kryeministrin e fundit Ballkanas që viziton Uashingtonin zyrtar.
Përpara Ramës, në Janar të këtij viti Shtëpinë e Bardhë e vizitoi edhe Kryeministri maqedonas Gruevski, në periudhën e pikës së tij më të ulët politike që nga ardhja ne pushtet. Në vizitën e 16 janarit, Zv/presidenti Biden i kërkoi Gruevskit të zbatonte marrëveshjen për daljen nga kriza politike. Më tu kthyer nga Uashingtoni, ai dha dorëheqjen si Kryeministër, dhe çoi vendin në zgjedhje të parakohshme. Por, ajo që bie në sy nga vizita e Ramës, është vajtja e tij plot një jave para takimit.
Nga zyra e tij, nuk është bërë publike asnjë element nga axhenda e tij, se kë do takojë, çfarë do bisedojë, dhe çfarë do bëjë këto 7 ditë në SHBA. Pati një takim të ftohtë dhe periferik me komunitetin shqiptar në Nju Jork. Ku kishte marrë me vete edhe vesin e tij, gënjeshtrën. Një këshilltar shqiptar në Nju Jork ua prezantoi të pranishmëve si deputet amerikan duke shkaktuar edhe të qeshura në sallë.
Gjithashtu me gjasë pati dhe një takim kortezie me Kryetarin e Bashkisë së Nju Jorkut, ku mund të themi me plot gojën se veç Ramës askush nuk e kupton se pse duhej të takohej me te, dhe si do i shërbejë Shqipërisë apo marrëdhënieve Shqipëri-SHBA një takim i tillë. Takime dhe madje edhe binjakëzime të tilla bën Xhelal Mziu çdo muaj.
Siç duket, Kryeministri ynë planetar do të përdorë këto dite për të bërë qokat e radhës në pritje të takimit të madh. Kaq shumë i rëndësishëm duket të jetë ky takim për Ramën, sa nga frika mos humbet avionin apo dhe nga padurimi, ai u nis për të vendin e lirisë një jave përpara.
Për tu kthyer tek takimi, duhet të theksohet, se pas blofit me lëndët kimike siriane, Kryeministrit ju kthye në makth një vizitë në Shtëpinë e Bardhë. Pas shumë ecë e jakeve nëpër Nju Jork këto tre vjet, dhe pas refuzimit të një vizitë në Shtëpinë e Bardhë prillin e kaluar, Rama gjeti çelësin e artë për ta realizuar ëndrrën e tij.
Pranimi i strehimit të të gjithë muxhahedinëve iraniane në Shqipëri, në mungesë të plotë transparence, mori në këmbim vizitën e tij në Pensilvania Avenue. Pra, ky vendim politik i tij, i cili me gjasë do të ketë pasoja politike, diplomatike dhe ekonomike në terma afat-gjatë nuk u bë në këmbim të forcimit të mëtejshëm të marrëdhënieve midis Shqipërisë dhe SHBA-së, por për të bërë të mundur shkeljen e tij në Uashington.
Rama ka dy kompani lobingu që i paguan prej më shumë se dy vitesh me paratë e shqiptarëve, të cilët më në fund i bënë të mundur realizmin e ëndrrës së tij. Po ashtu, ai po kalon një javë në Amerikë me enturazhin e tij pa bërë asnjë gjë, me paratë e taksa paguesve shqiptare.
Pas kthimit te tij nga Amerika, Rama u detyrohet shqiptareve transparencën e nevojshme për këto para të hedhura. Përtej stuhisë mediatike të pritshme të takimit në Shtëpinë e Bardhë, kjo vizitë më shumë se sukses i vetë Ramës, është një lajm i mirë për shqiptarët. Sepse, ashtu si Gruevskit, Ramës do ti kërkohen dy gjera në këtë takim: Reforma në Drejtësi dhe mos prekja e zgjedhjeve të përgjithshme vitin e ardhshëm. Prandaj, me të drejtë shqiptarët i urojnë atij suksese në këtë vizitë.
Krijoni Kontakt