Idioma: Faleminderit

[Albo]

Një nga fjalët më të përdorura në gjuhën shqipe, është edhe fjala "faleminderit". Eshtë një fjalë që e përdorim për të shprehur mirënjohjen tonë personale karshi aktit të një personi tjetër që na vjen në ndihmë. Por ndryshe nga shumë gjuhë të tjera që kanë një fjalë të veçantë për të shprehur këtë mirënjohje, në gjuhën shqipe fjala ka dy veçori të dukshme:

1. Faleminderit nuk është një fjalë e thjeshtë, por është një fjalë e përbërë nga bashkimi i disa fjalëve të thjeshta: Faleminderit = Falem me nderim. Të falenderoj = Të falem me nderim.
2. Mirënjohja për shqiptarin do të thotë të kërkosh të falur, dhe të nderosh mikun/fqinjin/personin me të cilin je duke komunikuar.

Interesante për origjinën e kësaj fjale është edhe fakti se "falja" është një fjalë që përdoret në dy raste: a) kur i falemi Zotit, kur jemi duke iu lutur Zotit b) kur i kërkojmë të falur një personi tjetër për sjelljen tonë. Kurse fjala "nder" apo "nderim" gjithashtu ka dy përdorime në trashëgiminë e traditës shqiptare, a) nderi karshi Zotit duke mbajtur e respektuar Fjalën e Zotit b) nderi karshi njëri-tjetrit, mbajtja e fjalës së dhënë karshi njëri-tjetrit si një dëshmi e besës në Zot.

Tradita e lashtë e popullit tonë na mëson me këtë fjalë të thjeshtë se nuk mund të jemi mirënjohës karshi njëri-tjetrit, pa qënë më parë mirënjohës ndaj Zotit për jetën tonë dhe të gjitha të mirat e tjera në jetë.