Laç: Deputeti socialist Armando Prenga plagos familjen Cali ne komisariat

[Albo]

Kanto Cali: “Deputeti qëlloi me pistoletë në polici, me armë edhe vëllai i tij”

Nga: EDLIRA MEMA*

KURBIN – Kushëriri i parë i të plagosurve të familjes Cali, Kanto Cali deklaroi se deputeti i Partisë Socialiste, Armando Prenga ka qëlluar me armë në ambientet e komisariatit të Kurbinit, ku mbetën të plagosur 7 persona. Në një intervistë për “Gazeta Shqiptare”, Cali tha se dhe vëllai i Prengës kishte armë, ndërsa sipas tij, polici nuk ndërhyri për të normalizuar situatën.
Ç’mund të na thoni në lidhje me konfliktin e ndodhur mesnatën e së premtes?
Gjithçka e nisi deputeti Armando Prenga. Ai erdhi me makinë në rrugën që shkon për në plazhin e Patokut, poshtë lokalit të kushëririt tim, Gjok Cali. Më pas ai ka qëlluar me qytën e armës kushëririn tim, Gjokën. Kjo mund të verifikohet fare mirë, pasi lokali ka qenë i pajisur me kamera sigurie, të cilat i ka sekuestruar policia në cilësinë e provës. Më pas kushërinjtë shkuan të bëjnë një denoncim në komisariatin e Laçit.
Burime nga policia deklaruan ditën e shtunë se zoti Gjok dhe të afërm të tij i kanë zënë pritë me makinë deputetit Armando Prenga. Është i vërtetë ky fakt?
Absolutisht që nuk është i vërtetë! Të gjitha janë sajesa të policisë.
Çfarë ndodhi më pas?
Në kohën kur kushëriri im Gjoka po jepte dëshminë e tij brenda në komisariat, ndërsa të afërmit e tjerë policia i ka nxjerrë jashtë, në këtë kohë kanë hyrë brenda të afërmit e deputetit Prenga, me në krye vetë Armandon. Ata kanë qëlluar me armë në hyrje të ambientit të komisariatit, konkretisht te porta. Aty ka dhe fakte që është qëlluar me armë, pasi ka pasur gjak gjithandej, kjo është e vërtetuar. Di që është gjuajtur disa herë me armë, pasi aty ka pasur disa të tilla.
Ju po thoni se nuk ka qenë vetëm zoti Prenga i armatosur?
Përveç tij, i armatosur ka qenë dhe vëllai i tij. Nga të shtënat e armëve u plagosën Tom Cali dhe Nikollë Cani, të dy me armë zjarri. Kushërinjtë e mi kanë ndenjur për rreth 15 minuta në ambientet e policisë të plagosur dhe askush nuk i ka ndihmuar. Edhe pse po humbisnin shumë gjak, desh i kanë lënë të vdesin aty. Më pas i çuan me makinë policie në spital.
Zoti Cali, fisi juaj a ka pasur konflikte të hershme me familjen Prenga?
Ne nuk kemi pasur asnjë problem me familjen Prenga dhe s’kemi asnjë tendencë për ngjarjen. Ne ishim në një proces gjyqësor me shtetin. Ndërkohë, policia nuk ndërhyri, por u fshehën nga frika nën tavolina.

(er.nu/Gazeta Shqiptare/BalkanWeb)

[Albo]

Rrëfimi i Gjon Calit: Prenga u tha nipave të mi “Do t’ju shfaros si fis”



Vëllai i Gjok Calit, pronarit të lokalit në Luginën e Patokut, që u godit me tytë pistolete nga deputeti Armando Prenga, thotë se ngjarja ka ndodhur brenda në Komisariatin e Laçit.

Gjon Cali akuzon Policinë se i ka prerë në besë familjen e të afërmit e tij, duke u thënë që do t’i ndihmonte dhe në fund e ka lejuar Armando Prengën që t’i rrahë e t’i plagosë. Në një intervistë për gazetën “Panorama”, Cali tregon detajet e ngjarjes, ashtu siç ia kanë shpjeguar vëllezërit dhe nipat që mbeten të plagosur në Komisariatin e Laçit.

Keni qenë i pranishëm në momentin kur ka ndodhur ngjarja në Patok dhe në Laç?
Jo, nuk kam qenë. Po të kisha qenë atë natë, edhe unë sot ose do të isha i arrestuar, ose në spital i plagosur si vëllezërit e mi. Ose edhe të dyja bashkë.
Çfarë dini rreth ngjarjes, keni marrë vesh se si ka nisur konflikti?
Konfliktin e ka nisur Armando Prenga, te lokali i vëllait tim në Patok. Ai ka kërcënuar fillimisht me armë dy nipat e mi, para se të ndodhte ngjarja. Ata kanë lajmëruar vëllain tim, Gjok Calin, i cili ka shkuar për të sqaruar situatën e është pritur me armë nga Armando Prenga. Ai e ka goditur me tytë pistolete në kokë dhe ka qëlluar në ajër. E gjithë kjo është filmuar nga kamerat e sigurisë së lokalit që i ka marrë Policia e Prokuroria.
Ju keni biseduar me vëllezërit dhe nipat për rrethanat e ngjarjes, dhe vendin ku ka ndodhur?
Plagosjet kanë ndodhur brenda në Komisariatin e Laçit. Këtë ua them me siguri të plotë. Të dy vëllezërit e mi janë plagosur brenda në Komisariat. Madje, edhe po të shkoni tani do të gjeni gjurmë gjaku aty brenda.
Po nga kamerat e sigurisë së lokalit, çfarë duket?
Nga kamerat duket me zë dhe figurë që ka shkuar deputeti te lokali i vëllait tim në Patok. Ai i ka kërcënuar të dy nipat e mi duke u thënë:
“Do t’ju shfaros të gjithëve si fis”. Nga pamjet duket edhe momenti kur vëllai im shkon aty dhe i kërkon shpjegime se përse kishte shkuar aty dhe Armando Prenga shihet që e godet me tytën e pistoletës.
Pas kësaj ngjarjeje besoj është lajmëruar Policia?
Po e kemi marrë 6 herë 129­n dhe policët talleshin me ne. Morëm edhe Saimir Tahirin, por nuk na u përgjigj. Ne jemi prerë në besë nga Policia, sepse na thanë që do të na mbrojnë, ndërkohë që na çuan vetë te deputeti për të na rrahur e për të na plagosur.
Pra, në një farë mënyrë, ju po thoni që nuk keni më besim te Policia?
Pavarësisht të gjithave, ne do të vazhdojmë të presim që të bëhet drejtësi. Do të shikojmë se çfarë do vendosë drejtësia.
Në të kundërt, do të bëni vetëgjyqësi?
Do të presim çfarë do të vendosë drejtësia. Sot kemi dorëzuar edhe një shkresë tek Ambasada Amerikane në Tiranë. I kemi kërkuar që të asistojnë gjatë kryerjes së hetimeve sepse kemi dyshime se mund të hetohet ashtu siç duhet kjo ngjarje. Ju e shihni vetë. Të gjithë ata persona që janë plagosur, të afërmit e mi, thonë që janë plagosur brenda Komisariatit nga deputeti Armando Prenga. Ndërsa Policia thotë se ngjarja ka ndodhur jashtë. Pse nuk ju lënë që të futeni brenda dhe ta shikoni? Po ne kemi besim se edhe Amerika do të na mbështesë në këtë rast.

(d.b/Panorama/BalkanWeb)

[Albo]

Prokuroria: Prenga plagosi me armë pa leje, është i rrezikshëm

TIRANE- Deputeti Armando Prenga paraqet rrezikshmëri të lartë shoqërore pasi ka plagosur një person me armë pa leje dhe ka kërcënuar anëtarë të tjerë të fisit “rival” për peshkimin në Patok. Këto janë disa nga argumentet përmes të cilave Prokuroria e Përgjithshme i kërkon Kuvendit të Shqipërisë autorizimin për arrestimin e deputetit socialist të Lezhës i cili u përfshi në një përleshje të armatosur të shtunën pas mesnare para ambienteve të komisariatit të Kurbinit. Kërkesa zyrtare i është dorëzuar mesditën e kësaj të diele Kuvendit.

Sipas organit qendror të hetimit Prenga dyshohet se ka konsumuar tre vepra penale, atë të të armëmbajtjes pa leje, plagosje e rëndë me dashje dhe kanosje serioze për jetën.

Në kërkesë derguar kuvendit të Shqipërisë prokuroria rendit argumentet të cilat çuan në arrestimin e deputetit. Ndryshe nga policia, Prokuroria e Përgjithshme thotë se ka dyshime të mjaftueshme se Prenga gjatë konfliktit me pjesëtarë të familjes Cali ka përdoruar armën e zjarrit tip pistoletë, armë kjo të cilën sipas akuzës ai e mbante pa leje. Prenga ka dëmtuar me armë shëndetit e Tom Cali, thotë Prokuroria, duke qëlluar mbi të. Ndërsa me veprimin e tij të nxjerrjes dhe drejtimit të armës ndaj shtetasve që shoqëronin Gjergj Cali para Komisariatit të Policisë Kurbin, me bashkëpunimin e disa personave të tjerë, deputeti Armando Prenga ka konsumuar elementët e veprës penale “Kanosje”, në bashkëpunim.

Bazuar në këto argumente prokurori i Përgjithshëm Adriatik Llalla me qëllim për t’i hapur rrugë një hetimi të plotë dhe të gjithanshëm kërkon nga Kuvendi i Shqipërisë dhënia e autorizimit për arrestimin e deputetit të Kuvendit të Shqipërisë Armando Prenga.

Kerkesa zyrtare e Prokurorise se Pergjithshme per Kuvendin

Prokuroria e Përgjithshme kërkon nga Kuvendi i Shqipërisë autorizimin për arrestimin e deputetit Armando Prenga

Prokuroria e Përgjithshme i kërkon Kuvendit të Shqipërisë autorizimin për arrestimin e shtetasit Armando Prenga, me funksionin “Deputet”, i dyshuar për konsumimin e elementëve të veprave penale; “Prodhimi dhe mbajtja pa leje e armëve luftarake dhe municionit”, “Plagosje e rëndë me dashje” dhe “Kanosje”, të parashikuara nga nenet 278/4, 88, 84 e 25 të Kodit Penal.

Në kërkesën drejtuar Kuvendit të Shqipërisë, Prokurori i Përgjithshëm, z. Adriatik Llalla, është shprehur se, nga provat e administruara deri në këtë fazë të hetimit, rezulton se deputeti Prenga dyshohet se ka konsumuar elementët e veprave penale të sipërcituara gjatë një konflikti me disa shtetas të tjerë, ngjarje e ndodhur në mesnatën ndërmjet data 04.09.2015-05.09.2015, në qytetin e Laçit.

Gjithashtu, në kërkesën për autorizimin e arrestimit, theksohet gjithashtu se deputeti i Kuvendit të Shqipërisë Armando Prenga dyshohet se ka kryer vepra penale me rrezikshmëri të theksuar shoqërore dhe që parashikohen si krim nga Kodi Penal.

Në bazë të veprimeve të deritanishme hetimore, Prokuroria e Përgjithshme ka krijuar dyshimet e arsyeshme për kryerjen e veprave penale nga ana e deputetit Prenga, në bazë të argumentave si më poshtë:

- Me veprimin e tij të mbajtjes dhe përdorimit të armës së zjarri tip pistoletë, armë kjo tjetër nga ajo për të cilin është pajisur me leje nga organet kompetente, gjatë konfliktit të ndodhur në mjedisin publik para Komisariatit të Policisë Laç, deputeti Armando Prenga ka konsumuar elementët e veprës penale “Mbajtja pa leje e armëve luftarake”, parashikuar nga neni 278/4 Kodit Penal.

- Me veprimin e tij të dëmtimit me armë të shëndetit të shtetasit T.C, duke qëlluar mbi të, deputeti Armando Prenga ka konsumuar elementët e veprës penale “Plagosje e rëndë me dashje”, parashikuar nga neni 88 i K.Penal.

- Me veprimin e tij të nxjerrjes dhe drejtimit të armës ndaj shtetasve që shoqëronin shtetasin GJ.C. para Komisariatit të Policisë Kurbin, me bashkëpunimin e disa shtetasve të tjerë, deputeti Armando Prenga ka konsumuar elementët e veprës penale “Kanosje”, në bashkëpunim, parashikuar nga neni 84 e 25 i K.Penal

Për këtë arsye, me qëllim për t’i hapur rrugë një hetimi të plotë dhe të gjithanshëm nga Prokuroria, bazuar në nenin 73/2 të Kushtetutës së Republikës së Shqipërisë, si dhe nenin 288 të Kodit të Procedurës Penale, kërkohet nga Kuvendi i Shqipërisë dhënia e autorizimit për arrestimin e deputetit të Kuvendit të Shqipërisë Armando Prenga.

Shqiptarja

[Qyfyre]

Po ja fusin apo po e mbrojne?

Se njof po si tip skuthi duket ne foto

[goldian]

te ishte ne kohen e albos as nuk do dilte ne media e jo me te arrestohej po edvinua ben keto budallalliqe

[Albo]

Deputeti i arrestuar tha para gjykatës: Nga PD-ja ika, kurse PS-ja më shiti

Deputeti i arrestuar Armando Prenga, sot në Gjykatën e Lartë, ka deklaruar ndër të tjera se nga PD-ja ika vetë kurse PS-ja me shiti.
Mësohet se edhe deputeti i PS-së në Lezhë Arben Ndoka është thirrur nga Kryeministri Edi Rama që të jepte dorëheqjen nga mandati i deputetit sepse do të miratohet në Parlament dekriminalizimi ku do tju ndërpritej mandati cdo zyrtari që rezulton me dosje apo i dënuar.
Deputeti socialist i Lacit kur ka dalë jashtë dyerve të gjykatës ka thënë se do ta dorëzoj mandatin e deputetit sapo të mbaroj gjyqin.
Me sa duket po fillon stina e kataklizmës në PS.

Koha Jone

[Albo]

Ministri Panariti, ku di gjë unë për tenderin e Luginës së Patokut



Tenderi për Lagunën e Patokut është shkaku i përplasjes së armatosur mes familjes Cali dhe deputetit Armando Prenga, e cila la 7 të plagosur. Tenderi i zhvilluar në muajin prill iu dha kompanisë “Tenki 01” të Eduard Prengës, vëllait të deputetit Armando Prenga. Familja Cali akuzoi menjëherë Ministrinë e Bujqësisë për favorizim të kompanisë “Tekni 01” për shkak se pas saj qendronte deputeti i mazhorancës. Por, ministri i Bujqësisë, Edmond Panariti thotë se nuk e ka ditur që firma fituese është e vëllait të deputetit Prenga, raporton TV Klan. Familja Cali e ka çuar tenderin në Gjykatë dhe seanca e parë u zhvillua dy ditë para konfliktit të armatosur, ku deputeti Prenga plagosi një anëtarë të familjes Cali, siç thotë Prokuroria. Ministri i Bujqësisë thotë se kompania e vëllait të deputetit Prenga nuk është favorizuar, por e ka fituar garën pasi ka patur ofertën më të madhe. Kompania “Tenki 01” ishte krijuar vetëm pak muaj para garës, por ministri thotë se eksperienca nuk ka qenë kriter. Familja Cali që përfaqëson peshkatarët e zonës, e shfrytëzonte lagunën prej dy dekadash. Ajo tashmë po përballet me një proces gjyqësor. Tenderi i lagunës së Patokut nuk është i vetmi që i kundërshtohet Ministrisë së Bujqësisë. Një ditë më parë 30 peshkatarë të lagunës së Vainit në Lezhë kanë protestuar pasi janë nxjerrë me forcë nga punonjës të firmës që ka fituar tenderin e shfrytëzimit, për të cilën punonin prej 5 muajsh madje pa u paguar ende. Pergjigjia për këtë shqetësim të qytetarëve të cilët sigurojnë të rdhurat për familjet e tyre me këtë punë është e thjeshte: T’i drejtohen gjykatave.

Koha Jone

[Albo]

Ministri Panariti, ku di gjë unë për tenderin e Luginës së Patokut



Tenderi për Lagunën e Patokut është shkaku i përplasjes së armatosur mes familjes Cali dhe deputetit Armando Prenga, e cila la 7 të plagosur. Tenderi i zhvilluar në muajin prill iu dha kompanisë “Tenki 01” të Eduard Prengës, vëllait të deputetit Armando Prenga. Familja Cali akuzoi menjëherë Ministrinë e Bujqësisë për favorizim të kompanisë “Tekni 01” për shkak se pas saj qendronte deputeti i mazhorancës. Por, ministri i Bujqësisë, Edmond Panariti thotë se nuk e ka ditur që firma fituese është e vëllait të deputetit Prenga, raporton TV Klan. Familja Cali e ka çuar tenderin në Gjykatë dhe seanca e parë u zhvillua dy ditë para konfliktit të armatosur, ku deputeti Prenga plagosi një anëtarë të familjes Cali, siç thotë Prokuroria. Ministri i Bujqësisë thotë se kompania e vëllait të deputetit Prenga nuk është favorizuar, por e ka fituar garën pasi ka patur ofertën më të madhe. Kompania “Tenki 01” ishte krijuar vetëm pak muaj para garës, por ministri thotë se eksperienca nuk ka qenë kriter. Familja Cali që përfaqëson peshkatarët e zonës, e shfrytëzonte lagunën prej dy dekadash. Ajo tashmë po përballet me një proces gjyqësor. Tenderi i lagunës së Patokut nuk është i vetmi që i kundërshtohet Ministrisë së Bujqësisë. Një ditë më parë 30 peshkatarë të lagunës së Vainit në Lezhë kanë protestuar pasi janë nxjerrë me forcë nga punonjës të firmës që ka fituar tenderin e shfrytëzimit, për të cilën punonin prej 5 muajsh madje pa u paguar ende. Pergjigjia për këtë shqetësim të qytetarëve të cilët sigurojnë të rdhurat për familjet e tyre me këtë punë është e thjeshte: T’i drejtohen gjykatave.

Koha Jone

Mire tha ministri. Ai qe ben "oferten me te madhe", e fiton tenderin. 20% ne xhep te kryeministrit, 10% ne xhep te ministrit, peshkataret e zones le te peshkojne ku te duan, nuk na intereson.

Albo

[Albo]

Incidenti me Prengën, zbardhen SMS-të e familjes Cali me Ramën e Tahirin

Pak ditë pas incidenteve në Patok të Laçit të tjera detaje zbulohen lidhur me komunikimin e anëtarëve të familjes Cali me drejtues të lartë të shtetit shqiptar si kryeministrin Edi Rama dhe ministrin e Brendshëm Saimir Tahiri.



Mesazhet telefonike
‘ABC News’ thotë se ka arritur të siguroj tekstin e mesazhit, që Gjok Cali mbrëmjen e datës 4 shtator, vetëm pak minuta pasi është goditur me armë nga deputeti Armando Prenga I ka shkruar ministrit të brendshëm Sajmir Tahirit.

Sipas mesazhi, që mban orën 23:46 shtetasi Gjok Cali i shkruan ministrit, duke njoftuar për ngjarjen dhe kërkon ndihmë pasi sic thotë ai policia e Lacit nuk shkon në vendin e ngjarjes.

“Zoti Sajmir Tahiri, deputeti Armando Prenga më ka gjuajtur me pistolet dhe jam I gjakosur, policia nuk vjen fare në vendngjarje. Ju lutem merrni masa”.

Ky mesazh, rezulton se është nisur nga shtëpia e Gjok Calit që ndodhet në Fush-Kuqe, vetëm pak minuta pas përplasjes me deputetin Prenga në rrugën Patok –Laç. Më pas, referuar materialeve të prokurorisë, Gjok Cali I shoqëruar nga policia dhe pjesëtar të familjes së tij është nisur drejt Komisariatit të Laçit për të bërë denoncimin. Dhe pikërisht këtu, pjesëtar të familjes Cali janë përplasur fizikishtë dhe me armë me të afërmit dhe deputetin Prenga, ku për pasojë mbetën të plagosur 7 persona, dy prej tyre me armë zjarri.

Pasi sherri është qetësuar në komisariat, të plagosurit janë dërguar drejt Spitalit të Laçit për të marr mjekimet e para dhe më pas drejt SPitalit Qendror të Traumës në Tiranë. Dhe pikërisht në këtë kohë, rezulton se ministri i Brendshëm i kthen përgjigje Gjok Calit, duke njoftuar se kishte marr masat e duhura.

“Do marr masa patjetër. Është angazhuar e gjithë poliçia”

Ky mesazh mban orën 01:33 minuta dhe në atë kohë rezulton se gjithçka ishte shuar mes dy familjeve, të cilët ishin nisur drejt spitalit në Tiranë ku edhe u shoqëruar nga poliçia së bashku me deputetin Prenga.

Por nuk janë të vetmit këto mesazhe që familja Cali I ka dërguar ministrit të brendshëm, atë e kanë njoftuar edhe gjatë muajt gusht për ndërtimin e paligjshëm që kompania e vëllait të deputetit po bënte në Lagunën e Patokut. Në mesazh, ata I kujtojn ministrit se për ndryshimin e një tjegulle në cati arrestohen personat, ndërsa për deputetin që po kryen ndërtim të paligjshëm në Lagunë nuk merren masat.

“I nderuar zoti ministër na fal për shqetësimin, por na duket e pa drejtë që policia e shtetit ndlon fshatarët e mi për të ndërruar 2 tjegulla të shtëpisë dhe deputeti i zonës së Lacit vazhdon ndërtimin në mes të Lagunës së PAtokut dhe për çudi poliçia nuk merr asnjë masë por e mbështet në punimet që bënë. Aq më tepër që në vendin ku po ndërtojnë janë sjellë edhe 400 pisha të sapo prera. Me respekt kryetari I fshatit Patok.

Ky mesazh mban datën 19 gusht ora 8:23 minuta dhe përgjigjia e ministrit vjen në 9:52 minua, fiks 1 orë e 29 minuta ku ministri i thotë se policia po merr masa për të gjithë qytetarët.

“Policia merr në procedim të gjithë qytetarët, pa dallim, që ndërtojnë pa leje. Në këtë rast, i dërgova policisë shqetësimin tënd për të bërë të gjitha verifikimet”.

Si këto mesazhe, familja Cali ka dërguar edhe në drejtim të kryeministrit Edi Rama, duke e vënë në dijeni për procesin e tenderit, proçedurat e shkelura nga MInistria e Bujqësisë si dhe vendimarrja për ndryshimin e pronësisë së liçençës së shfrytëzimit, nga familjes Cali tek vëllai I deputetit Prenga. Por pavarësisht mesazheve të nisura, rezulton se familja Cali nuk ka marr asnjë përgjigje me telefon. Sic duket edhe nga mesazhet dërguar kryeministrit, familja Cali e ka paralajmëruar dhe ka kërkuar marrjen e masave për këtë tenderim, duke akuzuar ministrin se po i hiqte bukën e gojës peshkatarëve të zonës për t’I bërë nder deputetit të Laçit.

Panorama

[Albo]

Dëshmia e vëllezërve Cali: Prenga qëlloi 30 herë me automatik

Zbardhen dëshmitë e dhëna në sallën e gjyqit të Gjykatës së Lartë nga Gjok dhe Gjergj Cali, dy vëllezërit që pretendojnë të jenë sulmuar fizikisht nga ana e deputetit Armando Prenga mbrëmjen e së premtes së kaluar në Laç.


Gjergj Cali duke hyre ne Gjykaten e Larte


Gjok Cali dje në Gjykatën e Lartë

Duke iu referuar deklarimeve të dhëna në Prokurori nga ana e deputetit Armando Prenga, përfaqësuesit e Prokurorisë thanë dje se dyshohet se Gjok Cali është përballur në rrugë me deputetin, pasi ky i fundit kishte qenë te lokali i tyre.

Sipas deputetit, Cali mbante një thikë në dorë dhe e ka kërcënuar, ndaj ai ka nxjerrë armën dhe e ka qëlluar me qytën e saj në kokë dhe ka shtënë një herë në ajër. Deklarimet e deputetit u kundërshtuan me forcë nga ana e të dyshuarit, Gjok, në sallën e gjyqit.

“Unë nuk kam pasur asnjë mjet në dorë. Nuk kam shkuar të rrihem e as të kërcënoj njeri. Ai ka dashur të më vrasë. Ishin nja tre veta të tjerë aty që i dolën para dhe e mbajtën, se do më kishte qëlluar drejt. Unë i kam çuar SMS ministrit të Brendshëm, Saimir Tahiri, pasi më lajmëruan të afërmit e mi se Armando Prenga i kishte kërcënuar te lokali në lagunë. I kam thënë që dua të denoncoj, por nuk kam besim te Policia e Laçit. M’u përgjigj me SMS dhe më tha “I kam marrë të gjitha masat”. Kjo që ndodhi, është e prerë në bësë nga Policia e Shtetit”, tha Gjok Cali.

Më herët, avokati i tij mbrojtës tha se klienti i tij Gjok, kishte shkuar në Polici i shoqëruar nga një furgon policie. “Ai nuk ka pasur besim të bënte denoncim në Laç, por ka dashur të shkojë dhe të denoncojë në Drejtorinë e Përgjithshme të Policisë së Shtetit në Tiranë”, tha avokati.

Sipas tij, pasi ka njoftuar drejtonin e Policisë dhe ministrin e Brendshëm, dhe ka marrë garanci për të bërë denoncimin, i dyshuari Gjok ka shkuar me makinën e tij personale në komisariat, ndërkohë që shoqërohej nga një furgon policie.

Avokati saktësoi se pasi ka mbërritur në komisariat, ai është marrë në zyrat e brendshme për të dhënë deklarime dhe bërë kallëzim, ndërsa të afërmit e tij janë nxjerrë jashtë, ku edhe ka ndodhur përplasja e dhunshme.

DESHMIA E GJERGJ CALIT
I dyshuari Gjergj Cali, kryetar i komunës së Patokut, e kishte të pamundur të përmbante mllefin në sallën e gjyqit. Kjo u bë shkak që kryesuesja t’i kërkonte që të ruante qetësinë dhe të fliste më qartë.

Gjatë dëshmisë së tij, Gjergj Cali akuzoi direkt deputetin Armando Prenga se i kishte marrë punën, se i kishte vrarë dhe se po i burgoste.

“Armando Prenga na ka vrarë në oborr të Policisë. I kërkoj ndjesë Gjykatës për tensionin. Prenga goditi me pistoletë kur unë isha 30 centimetër larg një polici. I kam kërkuar ndihmë oficerit roje. Nëse unë kam prekur një fije floku të ndokujt aty, le të dënohem me burgim të përjetshëm. Armando Prenga na mori punën. Armando Prenga nga vrau. Armando Prenga edhe po na burgos tani. Pse nuk e thotë prokurori që Edmond Prenga ka qëlluar 30 herë me automatik. Mua sot më vjen marre që kam hekura në duar. I kam kërkuar ndihmë Policisë. Edhe në spital kur mbërritëm në Tiranë kanë ardhur të na vrasin. Te komisariati mund të kenë qenë mbi 200 gëzhoja. Ne shkuam në Komisariatin e Policisë, por na thanë ‘jashtë, jashtë, se jeni persona të padëshiruar këtu’”, dëshmoi Gjergj Cali.

ARMAND BAJRAMI

Panorama

[Albo]

Video/ Armando Prenga plagosi dy vëllezërit Cali, jo vetëm njërin



Në konfliktin e Laçit, ku u përfshi deputeti i PS-së, Armando Prenga, e pas të cilit përfundoi edhe në burg me akuzën për plagosje mbetën dy persona të plagosur me armë zjarri, ndërkohë që policia deklaroi vetëm një.

Sipas njoftimeve të policisë, deputeti socialist plagosi me pistoletë vetëm Tom Calin, gjatë konfliktit në Laç, kurse vete mjeku i spitalit të Traumës në deklaratën e asaj dite njoftoi për dy të plagosur me armë zjarri.

Ne kete video, te siguruar nga ABC News, në Spitalin e Traumës, ku duken qartë plagët me armë në këmbët e dy vëllezërve Tom dhe Nikoll Cali.

Panorama

[Albo]

Pse Panariti dhe Meta duhet të bëjnë publike dosjen e krimit të Patokut



Ministri Panariti dhe shefi i tij Ilir Meta nuk mund të fshihen më si struci. Pas ngjarjes së rëndë të Laçi t ata duhet të dalin dhe të flasin, madje të hapin fletë për fletë dosjen e një tenderi të dyshuar si abuziv, i cili u bë shkak për përleshjen e armatosur mes fiseve Prenga dhe Cali. Dyshimet janë të forta. Ato pretendojnë së në prill të këtij viti, me proceduara të përçudnuara, ministria e Panaritit i ka dhënë tenderin e lagunës së Patokut vëllait të deputetit Prenga. Ajo që nuk thuhet botërisht është fakti se kjo ujdi qe kurdisur si një allishverish mes Ilir Metës dhe deputetit të Laçit, në mënyrë që ky i fundit ta ndihmonte në zgjedhjet lokale për fitoren me çdo kusht të Viktor Tushajt në Lezhë. Ashtu sikurse koha provoi më pas, Ilir Meta i trembej bojkotit që mund ti bënte elektorati socialist. Dhe për këtë filloi të blejë, të rektutojë dhe të bëjë për vete me cdo çmim. Pjesë e këtij çmimi qe edhe laguna e Patokut. Dyshohet se pakti u krye dhe ministria e bujqësisë e shpërbleu deputetin socialist në këmbim të mbështetjes që ai do ti jepte. Këto janë dyshimet dhe ato që përfliten në koridoret e politikës. Ato u bënë të ditura që kur ABC Neës transmetoi një kronikë për tenderin e Lagunës. Peshkataret e saj kërkonin në atë kohë anulimin e tenderit që pati fituar kompania e sapo krijuar e vëllait të deputetit Armando Prenga. Sipas tyre ajo u shpall fituese (pas dy anullimeve të tenderit) edhe pse kishte vetëm dy muaj e regjistruar dhe kishte mangësi të theksuar dokumentacioni.

Për të fashitur këto dyshime që bien mbi LSI-në si një parti që “vjedh Shqipërinë për të vjedhur vota dhe vjedh vota për të vjedhur Shqipërinë” (shprehje e famshme e Ramës) ministri i Bujqësisë Panariti dhe shefi i tij Meta duhet të bëjnë në mënyrë urgjene publike dosjen e tenderit për lagunën e Patokut. Publiku ka të drejtë të mësojë nëse ajo ka qenë një aferë e pisët në funksion të blerjes së zgjedhjeve. Publiku ka të drejtë të informohet për dyshimet se si i rekruton LSI-deputetët e së majtës. Publiku gjithashtu duhet të dijë edhe shkaqet e vërteta sepse kriminaliteti qëndron i lartë në këtë vend. Pikërisht se zyrtarët i përdorin tenderat dhe paratë shtetërore në mënyrë abuzive duke i shpënë njerëzit drejt vetgjyqësisë. Publiku ka të drejtë të dijë se nëse deputetët e fortë të këtij kuvendi nuk janë mëkatarë vetëm për të shkuarën e tyre, por nëse ata veprojnë si të tillë edhe sot.

Për të gjitha këto arsye Edmond Panariti duhet të bëjë urgjent publike dosjen e tenderit të Lagunës. Nëse ai se bën, një gjë e tillë i kërkohet Ilir Metës. Dhe nëse të dy këta zyrtarë të lartë nuk kanë guximin ta hedhin këtë hap, topi mbetet tek Edi Rama. I takon atij të na mbushë mendjen se nuk ka zënë vendin e Berishës në dyshen e të gjatit me të trashin që “vjedhin Shqipërinë për të vjedhur vota’. Përgjegjësia e tij tani nuk është vetëm se ka përzgjedhur një deputet të fortë, por se me filozofinë e tij e la atë të sillet si i tillë edhe me fuqinë e shtetit.

Lapsi

[Albo]

Laguna, Prenga tentoi t’ia shesë licensën familjes Cali për 500 mijë Euro

Deputeti Armando Prenga, pasi fitoi tenderin nga Ministria e Bujqësisë për shfrytëzimin e Lagunës së Patokut, ka tentuar t’ia shesë licencën kundrejt 500 mijë eurove, peshkatarëve të familjes Cali, që deri në mars të 2015 e kishin ata në shfrytëzim.



Ky fakt u konfirmua nga Gjon Cali, administratori dhe përfaqësuesi i peshkatarëve që për 10 vite kishin licencën e shfrytëzimit të Lagunën së Patokut, të dhënë nga ish-ministri I Bujqësisë Agron Duka në vitin 2004.

Sipas Gjon Calit, deputeti Prenga i shoqëruar nga vëllai i tij dhe dy persona të tjerë, vetëm pak ditë pasi ministria që drejtohet nga Edmond Panariti e kishte shpallur fitues të liçencës së shfrytëzimit të lagunës së Patokut ka takuar pjesëtarë të familjes Cali duke i ofruar shitjen e licensës.

Por, pjëstarët e familjes Cali e kishin kundërshtuar, duke ankimuar vendimin e shpalljes së fituesit të tenderit në Gjykatën Administrative. Kjo e fundit pasditen e së hënës, do të vazhdoje seancën e radhës gjyqësore, ku pritet që Ministria e Bujqësisë të dorëzoje dosjen e plote të tenderit të zhvilluar në Mars të këtij viti.

Burimet nga prokuroria i thanë ABC News-it, se ka qenë ky ankim në Gjykatë, që është bërë edhe shkaku i përplasjes fizike dhe me armë mes pjesëtarëve të familjes Cali dhe Prenga mbrëmjen e 4 shtatorit në rrugën Patok –Laç dhe pranë komisariatit të Kurbinit. Ku për pasoj u plagosen 7 persona, mes tyre dy Nikoll dhe Tom Cali të cilët dyshohen se janë qëlluar me armë zjarri nga deputeti Armando Prenga.

ABC News ka kontaktuar avokatin Qazim Gjonaj, që mbron interesat e deputetit Prenga, në lidhje me pretendimin e familjes Cali por ai tha se zyra ligjore nuk ka dijeni për këtë takim apo ofertë të klientit të tij.

Ndërkohë në spitalin qendror të traumës, ku po mjekohen dy vëllëzërit Cali, me kërkesë të prokurorisë mjekët i kanë hequr predhën nga këmba 66 vjeçarit Tom Cali. Predha e cila, sipas hetuesve, është dërguar për ekzaminim në Laboratorin e Policisë Shkencore për të bërë krahasimin me gëzhojat e gjetura pranë Komisariatit të Laçit, ku ishte edhe vendi i ngjarjes.

Nga ana tjetër, edhe pse kanë kaluar mbi dy javë nga ngjarja, efektivët e Forcave të Ndërhyrjes së Shpejt të policisë së shtetit janë urdhëruar të ruajnë dy të plagosurit brenda dhomës së spitalit, ku ata po mjekohen. Ky urdhër, mësohet se është marre për efekt sigurie, që të evitohen përplasjet e mundshme mes dy familjeve brenda ambienteve të Spitalit në Tiranë.

ABC News

[Albo]

Gjykata Administrative, Fiton familja Cali, do të ribëhet tenderi për Lagunën e Patokut



Gjykata Administrative pranon kërkesën e familjes Cali. I heq lejen e shfrytëzimit vëllait të deputetit Armando Prenga dhe vendos ribërjen e tenderit për Lagunën e Patokut.
“Ministria e Bujqësisë s’ka marrë parasysh dokumentet e Cali sh.p.k. Min.Bujqësisë s’ka zbatuar korrekt ligjin gjatë tenderit” thuhet në vendim, informon gazetari Klodi Karaj.
Pasi ka dëgjuar palët Gjykata Administrative ka dalë në krah të familjes Cani duke theksuar se ata kanë investuar një shumë prej 30 milionë lekësh gjatë kësaj kohe për këtë Lagunë dhe duke kërkuar të ribëhet tenderi
Në mars të vitit 2015 Ministria e Bujqësisë me një tender të hapur i hoqi të drejtën e shfrytëzimit të Lagunës së Patokut familjes Cali dhe ia kaloi vëllait të deputetit Prenga.
Vendim ky që u ankimua nga familja Cali në Gjykatën Administrative, me arsyetimin se kompania e tyre nuk ka eksperiencën e duhur, pasi kishte vetëm dy muaj që ishte krijuar.

Reagon familja Cali- “Ishte një vendim që e prisnim” kanë thënë të afërmit e familjes Cali pas vendimit.

Konflikti për Lagunën e Patokut shkaktoi dhe një përplasje me armë ku u përfshi dhe deputeti socialist, Armando Prenga.
.
Prenga ndodhet i arrestuar ndërsa nga përplasja u plagën disa persona.
Ankesat per tenderin– Familja Cali kishte një lum ankesash për procedurat e tenderit.
Referuar dokumenteve të QKR-së, kompania “TENKI 01” e vëllait të deputetit u krijua dy muaj para tenderit.
Ministria e Bujqësisë në tre raste dështoi në organizimin e procedurave për të shpallur fituesin. Kompania fituese u shpall në konkurimin e katërt.
Ajo ishte kompania “TENKI 01”, e cila siguroi vetëm pesë pikë më shumë se kompania e familjes Cali. Ata akuzuan zyrtarët e Ministrisë së Bujqësisë për favorizimin e vëllait të deputetit dhe për falsifikim të dokumenteve.
Propozimi surprizë 500 mije euro- Pavarësisht kundërshtimeve të shumta të familjes Cali, Ministria e Bujqësisë shpalli fitues kompaninë “TENKI 01” të vëllait të deputetit. Çuditërisht, kur pritej të fillonte investimi i deklaruar në planin e biznesit, kompania “TENKI 01” u ofron një propozim suprizë peshkatarëve të Lagunës.
Gjon Cali: “Një ditë që ka ardhur aty na ka thënë se nëse doni tjua shes unë jua shes. Por ai këkon 500 mijë euro për licencë. Sa të jetë gjallë ta mbajë këtë lagunë jo dhjetë vjetë por gjithë jetën me këto kushte që ka nuk i merr 500 mijë euro.”
Laguna e Patokut- Laguna e Patokut ndodhet në bregun e Adriatikut, pikërisht mes Lumit Mat në Veri dhe Ishmit në Jug. Laguna shtrihet në një sipërfaqe prej 400 hektarësh dhe është e pasur me specie të ndryshme, ku karakterizohet nga një shumëllojshmëri e grupeve dhe llojeve të peshqve, nga molusqet, (midhjet dhe kermijte), deri tek gaforret dhe insektet. Qysh prej krijimit të saj, në vitin 1940, shfrytëzohej nga komuniteti i zonës, që e kanë patur peshkimin profesion të vetëm.

ORA NEWS

[Albo]

Prokuroria te hetoje e ti hedhi hekurat ministrit per kete afere te paster korruptive. Ne burg nuk duhet te perfundoje vetem Prenga, por edhe ministri qe me korrupsionin e tij ne tender, solli kete perplasje e konflikt te armatosur.

Keshtu ndertohet shteti e keshtu u futet frika ne palce te gjithe te korruptuarve ne ate vend.

Albo

[Albo]

Tre akuza penale për deputetin e PS-së

Prokuroria e Përgjithshme njofton se ka mbyllur hetimet për deputetin socialist Armando Prenga dhe ndaj tij ka ngritur tre akuza penale. Më poshtë njoftimi i plotë i organit të akuzës.

Në bazë të hetimeve, të nisura në dt. 05.09.2015, Prokuroria e Përgjithshme e akuzon shtetasin Armando Prenga për veprat penale, si më poshtë:

1. “Mbajtja pa leje e armëve luftarake”, në ambjente publike, e parashikuar nga neni 278/5 Kodit Penal,
2. “Plagosja e lehtë me dashje” e shtetasve Gjok Cali, Tom Cali dhe Nikoll Cali, e parashikuar 3 (tre) herë nga neni 89 i Kodit Penal,
3. “Kanosja” e shtetasve Tom Cali, Nikoll Cali, Gjergj Cali dhe Francesk Cali, e parashikuar 4 (katër) herë nga neni 84 i Kodit Penal.

Nga hetimet rezulton se, më datë 04.09.2015, rreth orës 2230’, personi nën hetim Armando Prenga, ka shkuar tek lokali i shtetasit Gjok Cali, ndodhur në Lagunën e Patokut, dhe tek ura e lokalit ka kontaktuar me djalin e tij Dorian Cali dhe nipin Julian Cali, me të cilët ka debatuar. Shtetasi Dorian Cali ka njoftuar për këtë ngjarje, nëpërmjet telefonit, babain e tij Gjok Cali. Shtetasi Gjok Cali është nisur menjëherë në drejtim të lokalit me automjetin e tij. Gjatë rrugës, ai është përballur në vendin e quajtur Fushë Kuqe me shtetasin Armando Prenga, i cili po udhëtonte me automjet bashkë me shtetasit Luigj Skura, Gazmir Jushi dhe Gjon Prenga. Në këtë moment, shtetasit Gjok Cali e Armando Prenga kanë ndaluar automjetet dhe shtetasi Gjok Cali i ka kërkuar shpjegime për ngjarjen e ndodhur me të birin pak më parë.

Më pas, ata janë konfliktuar mes tyre dhe personi nën hetim Armando Prenga ka nxjerrë pistoletën, dhe e ka goditur shtetasin Gjok Cali në kokë me qytën e saj, duke i shkaktuar dëmtime që sipas Aktit të Ekspertimit mjeko-ligjor nr.1632, datë 09.09.2015, klasifikohen si plagosje e lehtë.

Për këtë ngjarje shtetasi Gjok Cali, në orën 2340’, ka njoftuar sallën e komunikimit të Komisariatit të Policisë Kurbin se, “tek lokali i Çalëve në Patok është goditur me pistoletë nga deputeti Armando Prenga”. Pas marrjes së këtij njoftimi, grupi i drejtimit të Komisariatit të Policisë Kurbin ka shkuar në lokalin e shtetasit Gjok Cali dhe ka marre kontakt me të, duke i kërkuar të paraqitej në komisariat për të bërë kallëzim penal sipas ligjit dhe dhënë shpjegime për ngjarjen.

Në këto rrethana, shtetasi Gjok Cali, bashkë me vëllezërit e tij Tom Cali e Nikoll Cali dhe të afërmin Gjergj Cali, janë nisur me automjetin e tij “Mercedes – Benz”, me ngjyrë gri, me targa LA7227A, për në Komisariatin e Policisë Kurbin. Ata janë shoqëruar edhe nga shtetasi Francesk Cali, nipi i Gjokës, me një automjet tjetër të tipit “BMË”.

Me të mbërritur në Komisariatin e Policisë Kurbin, shtetasi Gjok Cali ka hyrë brenda ambjenteve të tij për të bërë kallëzim penal, ndërsa shtetasit që e shoqëronin kanë qëndruar në pritje të tij, jashtë ambjenteve te këtij Komisariati. Në këto momente, para Komisariatit të Policise ka mbërritur personi nën hetim Armando Prenga, i shoqëruar nga vëllai i tij Edmond Prenga, shtetasi Gazmir Jushi dhe disa persona të tjerë. Personi nën hetim Armando Prenga mbante në dorë një pistoletë dhe menjëherë ju është drejtuar shtetasve Tom Cali, Nikoll Cali, Gjergj Cali dhe Francesk Cali duke ju thënë: “Do t’ju qisim faret si fis”. Pas këtij momenti dy grupet kanë filluar të konfliktohen fizikisht me njëri tjetrin. Sipas deklarimeve të personave të pranishëm në vendngjarje, personi nën hetim Armando Prenga ka shtënë disa herë me një armë zjarri të tipit pistoletë. Në vendngjarje rezulton se është qëlluar dhe me armë zjarri automatikë.

Nga të shtënat me armë zjarri në vendngjarje, kanë pësuar dëmtime në këmbë shtetasit Tom Cali dhe Nikoll Cali. Sipas Aktit të Ek spertimit mjeko-ligjor, datë 09.09.2015 shtetasi Tom Cali ka një plagë me armë zjarri, depërtuese në kërcirin e djathtë, e konsideruar nga akti ekspertimit si plagosje e lehtë. Sipas Akt Ekspertimit mjeko-ligjor datë 09.09.2015, shtetasi Nikoll Cali ka një plagë me armë zjarri tejshpuese në kërcirin e djathtë, e konsideruar nga akti ekspertimit si plagosje e lehtë.

Nga provat e administruara deri tani rezulton se gjatë konfliktit para Komisariatit të Policisë Kurbin në orët e vona të datës 04.05.2015, personi nën hetim Armando Prenga ka mbajtur dhe përdorur një armë zjarri luftarake, të tipit pistoletë. Kjo armë zjarri, nga përfundimet e Aktit të Ekspertimit datë 05.09.2015, rezulton të jetë e ndryshme nga ajo për të cilën personi nën hetim Armando Prenga është paisur me leje nga organet e kompetente.

Shtetasit Gjok Cali, Tom Cali dhe Nikoll Cali, bazuar në përcaktimet e nenit 284 të Kodit të Procedurës Penale, kanë shprehur vullnetin e tyre para oficerit të policisë gjyqësore që të procedohet penalisht personi nën hetim Armando Prenga për plagosjet e lehta që u ka shkaktuar atyre, për veprën penale të plagosjes së lehtë me dashje, parashikuar nga neni 89 i Kodit Penal.

Përsa më sipër, me veprimin e tij të mbajtjes pa leje dhe përdorimit të armës së zjarri tip pistoletë, armë kjo tjetër nga ajo me nr. xxxx598 për të cilin është pajisur me leje nga organet kompetente, gjatë konfliktit të ndodhur në mjedisin publik para Komisaraitit të Policisë Kurbin, personi nën hetim Armando Prenga ka konsumuar elementët e veprës penale “Mbajtja pa leje e armëve luftarake”, në ambjente publike, e parashikuar nga neni 278/5 Kodit Penal.

Me veprimin e tij duke goditur me qytën e pistoletës në kokë dhe dëmtuar shtetasin Gjok Cali, personi nën hetim Armando Prenga ka konsumuar elementët e veprës penale “Plagosje e lehtë me dashje”, e parashikuar nga neni 89 i Kodit Penal.

Me veprimin e tij duke qëlluar me pistoletën pa leje në ambjentet para Komisariatit të Policisë Kurbin dhe duke dëmtuar në kërcirin e djathtë shtetasin Tom Cali, personi nën hetim Armando Prenga ka konsumuar elementët e veprës penale “Plagosje e lehtë me dashje”, e parashikuar nga neni 89 i Kodit Penal.

Me veprimin e tij duke qëlluar me pistoletën pa leje në ambjentet para Komisariatit të Policisë Kurbin dhe duke dëmtuar në kërcirin e djathtë shtetasin Nikoll Cali, personi nën hetim Armando Prenga ka konsumuar elementët e veprës penale “Plagosje e lehtë me dashje”, e parashikuar nga neni 89 i Kodit Penal.

Me veprimin e tij të nxjerrjes dhe drejtimit të armës ndaj shtetasve Tom Cali, Nikoll Cali, Gjergj Cali dhe Francesk Cali para Komisariatit të Policisë Kurbin, duke deklaruar “Do t’ju qisim faret si fis”, personi nën hetim Armando Prenga ka konsumuar edhe elementët e veprës penale të “Kanosjes”, e parashikuar nga nenet 84 i Kodit Penal.”

Lapsi

[Albo]

“Ja pse u lirua nga burgu deputeti socialist Armando Prenga”

Avokati i deputetit socialist Armando Prenga, Maks Haxhia ka sqaruar sot përse u lirua klienti i tij.

Avokati i socialistit Prenga nënvizoi se nuk ekzistonin dyshimet e arsyeshme që deputeti duhet të rrijë në burg.

“Kontradiksion lidhur me provat, të cilat bënë që të pranohej argumentimi jonë. Kemi parashtruar argumentet tona që në bazë të të dhënave të deritanishme, s’duhet të ishte në këtë masë sigurimi të rëndë sic është arresti me burg.

Nuk ekzistonin dyshimet e arsyeshme që ky person duhet të rrijë në burg… Do vijojë apo mund të pushohet cështja është një gjë që i përket të ardhmes”,- tha avokati.

Deputeti i Partisë Socialiste Armando Prenga është arrestuar mëngjesin e 5 shtatorit 2015, nën akuzën e “plagosjes së rëndë, me dashje”, “Armëmbajtja pa leje” dhe “Kanosje serioze për vrasje”.

Deputeti ishte njëri prej 6 të arrestuarve në flagrancë pas një përplasjeje me armë zjarri e mjete të ftohta mes disa pjesëtarëve të familjes Cali dhe familjes Prenga, që ndodhi mbrëmjen e 4 shtatorit dhe që përfundoi me 7 të plagosur. Mes të plagosurve ishte dhe i vëllai Eduard Prenga.

Sherri nisi fillimisht në Patok, aty ku dy familjet janë në gjyq për Lagunën, më pas vijoi para komisariatit të policisë së Kurbinit ku dhe njëri prej pjesëtarëve të familjes Cali, Gjok Cali kishte shkuar për të bërë kallzim se është goditur nga deputeti.


Panorama

[Albo]

Armando Prenga i kthehet Kuvendit, merr pjesë në Komisionin e Sigurisë

Armando Prenga, deputeti i përjashtuar nga PS-ja, i është rikthyer detyrës së tij si deputet i Kuvendit.

Prenga sot ne Komisionin e Sigurisë
Vetëm tre ditë pasi Gjykata e Lartë i ndryshoi masën e sigurisë, nga “arrest shtëpie” në “detyrim me paraqitje”, deputeti socialist Armando Prenga sot ka marrë pjesë në mbledhjen e Komisionit të Sigurisë.

Prenga është i pranishëm mes deputetëve të tjerë, ndërkohë që në komision po zhvillohet seancë dëgjimore me ministren e Mbrojtjes, Mimi Kodheli.

Ditën kur Gjykata e Lartë i ndërroi masën e sigurisë, avokati Maksim Haxhia tha se pas kësaj, Prenga është i lirë t’i kthehet jetës parlamentare.

Prenga është në proces gjyqësor për armëmbajtje pa leje, plagosje e lehtë dhe kanosje për jetën. Ai u përfshi në konflikt me armë me 8 shtator në Laç me familjen Cali pas konfliktit për Lagunën e Patokut.

Panorama

[Albo]

Armando Prenga: U përjashtova nga PS-ja, por nuk kam bërë asnjë krim



Deputeti i Lezhës, Armando Prenga ka deklaruar dje se nuk ka asnjë shqetësim nga ligji i dekriminalizimit, pasi ai nuk ka kryer vepër penale.

Prenga tha se ndaj tij ka pasur shumë akuza politike, por ai nuk ka kryer asnjë vepër penale që nga mosha 1 vjeç dhe deri më 41 vjeç.

“Kam dëgjuar shumë aludime dhe akuza në drejtimin tim. I bëj me dije opinionit publik se, që nga mosha 1 vjeç dhe deri tani që jam 41 vjeç nuk kam asnjë lloj vepre penale. Dhe në rast se ju do të gjeni ndonjë vepër penale ndaj Armando Prengës, do t’ju kërkoj ndjesë publikut, si brenda vendit ashtu dhe jashtë vendit. Do të kërkoj ndjesë publike dhe do të largohem nga politika”, tha dje ai.

Deputeti i Lezhës deklaroi se do të presë me qetësi çdo lloj vendimi që do të marrë Gjykata e Lartë në lidhje me çështjen e tij.

“Unë po pres vendimin e gjykatës me qetësi, çfarëdo lloj vendimi, si negativ, si pozitiv, unë e mirëpres”, tha Prenga. I pyetur për një rikthim të mundshëm në Grupin Parlamentar të PS-së, ai tha se është përjashtuar nga kjo parti dhe se nuk përjashtohet mundësia që të bëhet pjesë e grupeve të tjera parlamentare në Kuvend.

“Unë jam i përjashtuar nga PS-ja. Do të bëj jetën time parlamentare, do të përfaqësoj rrethin tim. Si i pavarur? Nuk është momenti për ta thënë tani, në vazhdimësi do ta bëj me dije. Do të rri në politikë dhe në momentin e fundit do shoh çfarë vazhdimësie do të vazhdoj”, tha deputeti i Lezhës.

Panorama

[Albo]

Topalli: Prenga në komisionin e sigurisë pasi qëlloi qytetarët me armë, poshtërim

TIRANË- Deputetja demokrate Jozefina Topalli ka reaguar pas kthimit të deputetit socialist Armando Prenga në Kuvend. Në faqen e saj të facebook, Topalli publikon dy fotot të Prengës në Komisionin parlamentar të sigurisë, pasi, siç thotë ajo qëlloi qytetarët e tij me armë.

“Në komisionin e sigurisë pasi qëlloi nga komisariati qytetarët e tij me armë! Kthehet si deputet dhe fill e në komisionin e sigurisë, të atij komisioni parlamentar që duhet të kërkojë llogaridhënie për sigurinë e rendin në vend! Është për të ulëritur!!! Dhe e gjitha kjo pas betejës që në Kuvend është bërë kundra njerëzve me rekorde kriminale, pas votimit të ligjit për dekriminalizimin, pas vizitës së Kerryt që kërkonte pikërisht zbatimin e këtij ligji”, shkruan Topalli.

Duke përshkruar situatën në komision pas mbërritjes së Prengës, Topalli shkruan: “Ministrja e NATO-s jepte llogari para tij. Të tjerët i uruan mirëseardhjen! O degradim! O turp! Të keqen e kalit të Caligola-s”. “Heshtja ndaj një poshtërimi të tillë na bën të gjithë bashkëfajtorë”, thekson Topalli.

(m.k/BalkanWeb)