Dy silura kundër KLD
nga
Artan-Hoxha
DY PROJEKTLIGJE KUNDER KLD
Ofensiva me front të gjerë e supermaxhorancës për vënien nën diktat të institucioneve që nuk janë në varësinë e drejtpërdrejtë të Qeverisë dhe Kuvendit, ka objektiv kryesor sistemin e drejtësisë.
Kundër Drejtësisë supermaxhoranca nisi që në fillim një fushatë denigruese, kombinuar me presione të hapura e nën rrogoz, ndërsa po ndërmerr nisma ligjore përmes të cilave, duke u kuturisur thellë në zonën e antikushtetutshmërisë së sigurt apo shumë të mundshme, synon të arrijë maksimumin e arritshëm pa ndryshime në Kushtetutë, për të cilën nuk i ka votat.
Pasi vuri nën diktat të plotë administratën dhe inspektoratet, pasi politizoi thellësisht Policinë e pasi u tregoi gjykatave se vendimet e tyre nuk i konsideron kur i ka kundër, Qeveria po tenton që përmes ligjeve të reja mbi rendin dhe Policinë të marrë kompetencat e Prokurorisë dhe përmes së ashtuquajturës reformë e Drejtësisë t’i vërë gjykatat nën diktat.
Në këtë vazhdë, në Kuvend presin për t’u diskutuar dy projektligje – de jure propozim i një grupi deputetësh supermaxhoritarë. Njëri nga projektligjet ndërhyn drejtpërdrejt në ligjin organik të Këshillit të Lartë të Drejtësisë (KLD), ndërsa tjetri ndërhyn në ligjin për Shkollën e Magjistraturës (SHM).
NDERHYRJET NE LIGJIN PER KLD
Çdokush që do të lexonte relacionin shpjegues të mbushur me akuza mbi bëmat e KLD, do të priste edhe një rrëzim në total të këtij modeli, edhe propozimin e një modeli krejtësisht të ri. Në fakt, në ligjin e KLD propozohen disa ndërhyrje, në dukje të vogla, por, si për të vërtetuar se te detajet fshihet dreqi dhe i biri, të paktën tri prej tyre janë tejet të rrezikshme.
Ndërhyrja e parë është kërcënim i drejtpërdrejtë për gjyqtarët. Dy ndërhyrjet e tjera janë kërcënime për anëtarët e KLD, veçanërisht ata të emëruar nga Kuvendi, duke lënë të kuptohet se anëtarët e emëruar në legjislaturën e kaluar i pret një shkarkim i shpejtë dhe të emëruarit e ardhshëm janë të paralajmëruar se mund të shkarkohen lehtësisht e në çdo moment për çdo përdredhje a mosbindje.
KERCENIMI I GJYQTAREVE ME PEZULLIM
Projektligji propozon që “në rastin kur është regjistruar një procedim penal ndaj një gjyqtari, KLD vendos pezullimin e gjyqtarit nga detyra derisa të merret vendimi gjyqësor i formës së prerë”.
Pezullimi nga detyra është një masë ndaluese, brenda kategorisë së masave siguruese, e parashikuar nga Kodi Procedurës Penale (KPP), për të cilën merr vendim gjykata rast-për-rast kur vlerësohet se vazhdimi i detyrës do të rrezikonte marrjen ose sigurinë e provave apo kryerjen e një krimi të njëjtë a më të rëndë nga personi nën procedim penal. Kjo masë zbatohet vetëm kur procedohet për vepra penale që kanë kufi maksimal dënimi më shumë se një vit dhe nuk zbatohet për personat e zgjedhur sipas ligjit elektoral.
Ligji për Organizimin e Pushtetit Gjyqësor (OPGJ) në nenin 29 parashikon që procedimi penal për gjyqtarin fillon vetëm pasi merret autorizimi nga KLD, bazuar në bindjen e krijuar mbi fakte dhe rrethana e të shprehur me votë. Dhënia e autorizimit nënkupton edhe pezullimin e gjyqtarit derisa të merret vendimi gjyqësor i formës së prerë. Sipas parimeve të shëndosha kushtetuese të balancës dhe kontrollit, kërkesa e prokurorisë vlerësohet nga një organ tjetër.
Ndryshimet kushtetuese në shtator 2012 përcaktuan se nisja e procedimit penal për shumë kategori zyrtarësh, përfshirë gjyqtarët, nuk kërkon më autorizim nga një organ tjetër, por është vetëm në vlerësimin e prokurorisë. Për këtë shkak, lidhur me pezullimin e gjyqtarit, si masë ndalimi/sigurie në kuptim të KPP, mund të mbahen dy qëndrime diametralisht të kundërta – njëri që ia lë pezullimin ekskluzivisht gjykatës dhe tjetri që pezullimin e konsideron automatikisht të aplikueshëm.
Nismëtarët e ndërhyrjes në ligjin e KLD kanë zgjedhur qëndrimin e dytë. Naivëve të dashuruar me Drejtësinë e kulluar ndërhyrja do t’u duket zgjidhja e artë. Meqë iu duket kështu, le të kërkojnë edhe pezullimin automatik të ministrave, deputetëve e zyrtarëve të tjerë të këtij shteti me të filluar ndaj tyre një procedim penal, pse jo, edhe masat e tjera të sigurisë, e kështu ta çojmë për dreq këtë shtet.
Fare për dreq, pasi pezullimi automatik jo vetëm nuk ndihmon, por mund të keqpërdoret lehtësisht nga kushdo me pushtet për të influencuar e diktuar për keq Drejtësinë, e cila, edhe me këto garanci të derisotme, është nën presion dhe shpesh influencohet a përkulet.
Nëse miratohet pezullimi automatik, qoftë në ligjin për KLD (dhe/ose në ligjin për OPGJ), pezullimi i gjyqtarit do të ndodhë pa vendim gjykate, pa vendim real të KLD, por automatikisht e sa herë që prokuroria do të regjistronte një procedim penal për një gjyqtar të shkallës së parë apo të apelit. Gjyqtarët do të ishin kategoria e parë e zyrtarëve mbi të cilët do të zbatohej automatikisht pezullimi.
Për rrjedhojë, nesër mund të ndodhë në plot raste që ndaj një gjykatësi, që po gjykon një çështje të caktuar e nuk i bindet palës së interesuar për favorizim, të nisë qëllimisht, pa baza apo me baza shumë të dobëta, një procedim penal sa për ta hequr qafe gjyqtarin nga çështja tjetër në fjalë. Një instrument i këtillë do të ishte i rrezikshëm qoftë edhe si mundësi për t’u përdorur abuzivisht, e jo më nëse do të aplikohej abuzivisht mbi gjyqtarët.
PARAPERGATITJE PER SHKARKIMIN E ANETAREVE TE KLD
Në nenin 7/1 të ligjit për KLD shtohet një fjali që përcakton se: “f) Anëtarët e zgjedhur nga Kuvendi shkarkohen për shkelje të Kushtetutës dhe ligjeve”, ndërsa heqja e paragrafit 2 të nenit 10 lë të kuptohet se konstatimi dhe vlerësimi i shkeljes për anëtarët e emëruar nga Kuvendi do të bëhet nga vetë Kuvendi bashkë me vendimin e ndërprerjes së mandatit, dhe jo më nga KLD.
Neni 7 i ligjit të KLD i ka trajtuar shterueshëm të gjitha rastet e nevojshme të ndërprerjes para afatit pesëvjeçar të mandatit të anëtarit të KLD. Shtimi i fjalisë së mësipërme krijon një situatë papërcaktueshmërie totale ligjore dhe pra, mundësi shumë të gjerë për abuzim nga Kuvendi ndaj anëtarëve të KLD, institucion të cilit Kushtetuta i dedikon gjashtë paragrafë dhe e përcakton jo vetëm si menaxhues të karrierës së gjyqtarëve, por edhe mbrojtës e garantues të integritetit të tyre nga sulmet dhe kërcënimet nga pushtetet e tjera, veçanërisht nga Qeveria.
NDERHYRJA NE LIGJIN PER SHKOLLEN E MAGJISTRATURES
Qëllimi i ndërhyrjes është evident – Shkolla e Magjistraturës (SHM) nuk duhet të jetë më në varësi të KLD. Ndërhyrjet ligjore në disa drejtime, nëse miratohen, e dobësojnë shumë lidhjen mes KLD dhe SHM, ndërsa shtojnë lidhjet dhe influencat e drejtpërdrejta apo të tërthorta të Qeverisë në SHM.
Për me tepër, mandati i drejtorit aktual, anëtarëve të këshillit drejtues dhe pedagogjik e deri te stafi pedagogjik ndërpritet para kohe nëse nuk plotësohen kriteret e reja të imponuara nga kjo ndërhyrje me arsyetime qartazi abuzive, duke përbërë një rast të rëndë antikushtetutshmërie. Efekti prapaveprues është kaq qartazi abuziv, sa edhe vetë autorët nuk kanë mundur ta kamuflojnë dhe rreken ta justifikojnë pa qullosur gjë.
Kjo shkollë, ndonëse aktualisht ka 27 studentë, e pak ka për të pasur në vite e ardhshme, ka pozicion kyç pasi nga këtu fillon karriera e gjyqtarëve. Ndaj diktati mbi këtë shkollë është shumë i rëndësishëm për suksesin afatgjatë të ofensivës së supermaxhorancës.
LEVIZNI SA ESHTE ENDE FILLIMI
Supermaxhoranca nuk do t’ia dijë që KLD, nën drejtimin e Presidentit Nishani, në më pak se dy vite ka arritur të plotësojë një pjesë të mirë të çështjeve të lëna zvarrë nga drejtuesit e mëparshëm, as që KLD ka përmirësuar ndjeshëm metodikën dhe kriteret e karrierës së gjyqtarëve, as që në një kohë rekord u mundësua fillimi i punës së gjykatave administrative që ish-opozita i pengoi katër vite rresht, as që gjatë këtyre dy viteve KLD ka vendosur shumë më shumë dënime administrative mbi gjyqtarët që kanë bërë shkelje. Supermaxhorancës i intereson pushtimi i gjykatave.
Kjo nuk është as shpikje, as zbulim, as ves vetëm i kësaj maxhorance, dhe s’ka si të jetë ndryshe. Dy ndërhyrjet e propozuara ligjore – si dy silurë kundër anijes së drejtësisë – janë vetëm vazhdimi i ofensivës së supermaxhorancës. Ndërhyrjet të tjera edhe më të rrezikshme fillojnë në shtator.
Kushdo që sot sinqerisht ankohet për Drejtësi të korruptuar dhe po sinqerisht shpreson te reformat e supermaxhorancës, i them sinqerisht të përgatitet që, pas suksesit të kësaj ofensive, do të ketë në kurriz një Drejtësi edhe më shumë të politizuar, edhe më shumë të korruptuar, edhe mashë e një klani të ngushtë në majat e pushtetit ekzekutiv për interesat e të cilit drejtësia e rilindur nuk do të kursejë askënd, as ata që do t’i votojnë ligjet e kësaj pseudoreforme, nëse lëvizin pak nga rreshti apo kur klanit do t’i duhet ndonjë kokë turku.
Ftillohuni sa s’është vonë. Lëvizni sa është ende fillimi.
Panorama.com.al
Krijoni Kontakt