Selanik, gjuha shqipe në Universitetin “Aristoteli”
Anila Jole
Nga sot, në Universitetin “Aristoteli” të Selanikut do të zhvillohen orë të posaçme për mësimin e gjuhës shqipe.
Paradite në rektoratin e Universitetit “Aristoteli” në Selanik u zhvillua ceremonia e përurimit të kurseve të gjuhës shqipe, që do të zhvillohen per studentët në auditorët e këtij Universiteti.
Universiteti "Aristoteli" i Selanikut bëhet kështu universiteti i parë grek, që fut në programin e vet akademik mësimin e gjuhës shqipe. Vitin e parë, mësimi do të jepet nga pedagogia shqiptare e Fakultetit Gjuhë-Letërsi në Tiranë, Dr.Rozana Rushiti, por stafi akademik mund të rritet, në varësi të interesit që do të ketë në vazhdim nga studentët.
Zhvillimi i mësimit të shqipes në Universitetin grek është kuadër i marrëveshjes së bashkëpunimit shkencor mes Universitetit të Tiranës dhe atij “Aristoteli” të Selanikut, të cilën e kanë nënshkruar rektori i universitetit të Tiranës, profesor Dhori Kule dhe homologu i tij grek i “Aristotelit”, profesor Janis Mylopoulos.
Nënshkrimi i marrëveshjes mes dy Universiteteve dhe jetësimi i saj u arrit me ndërmjetësimin e konsullit të Përgjithshëm i Shqipërisë në Selanik, z.Riza Poda.
Në ceremoninë e zhvilluar sot në rektoratin e Universitetit “Aristoteli” ,nga Shqipëria merrnin pjesë rektori i UT, Profesor Dhori Kule, Profesor Shezai Rokaj, dekan i Fakultetit të Histori-Filologjisë, Profesor Mynyr Koni, dekan i Fakultetit të Shkencave të Natyrës, profesor Sulo Haderi, dekan i Fakultetit të Ekonomisë dhe zoti Riza Poda, Konsull i përgjithshëm i Shqipërisë në Selanik.
Ndodheshin të pranishëm rektori i Universitetit “Aristoteli”, profesor Janis Mylopulos, dekani i fakultetit të Filozofisë, të Shkencave, të Ekonomisë dhe Shkencave politike si dhe dekani i Fakultetit të Gjuhëve të huaja në këtë Universitet.
Pjesëmarrësit shprehën vlerësimin e tyre për jetësimin e kësaj marrëveshjeje të rëndësishme mes dy universiteteve, si një hap më shumë drejt afrimit të kulturave, popujve e dy vendeve.
Në takim u fol gjithashtu lidhur me përgatitjet për Simpoziumit që do të organizohet në pranverë nga Universiteti "Aristoteli" i Selanikut në bashkëpunim me atë të Tiranës, aktivitet për të cilin disa javë më parë ranë dakord rektori i "Aristotelit", Janis Mylopoulos dhe Konsulli i përgjithshëm i Shqipërisë në Selanik, Riza Poda, gjatë një takimi të zhvilluar mes tyre. Simpoziumi shkencor do të përqëndrohet në tre fusha; rritja ekonomike, kultura e arsimi si dhe mjedisi.
Balkanweb
Krijoni Kontakt