Gafa e Veliajt: Caktoni koordinatorët e dhunës!
Ministri i Mirëqenies Sociale dhe Rinisë, Erion Veliaj, nuk u reziston gafave në një korrespondencë me kryetarët e bashkive të vendit.
Në një letër dërguar drejtuesve lokalë lidhur me caktimin e koordinatorëve kundër dhunës, Veliaj gabon si me terminologjinë e përdorur, ashtu edhe me afatet e përcaktuara.
Gafat
Më 18 janar 2014, ministri Veliaj u ka dërguar një letër krerëve të bashkive, ku që në kokën e saj ka gabime në termat e përdorur. Në lëndën e letrës thuhet: “Kërkesë për caktimin e koordinatorit të dhunës që do të marrë pjesë në trajnimin për përdorimin e sistemit online të regjistrimit dhe monitorimit të rasteve të dhunës në familje”. Gafa me termin “koordinatori i dhunës” dhe jo “koordinatori kundër dhunës” është përmendur edhe në dy paragrafë të tjerë të letrës së Veliajt. “MMRS, me mbështetjen e UNDP-së, ka planifikuar të organizojë në javën e fundit të janarit një trajnim të koordinatorëve të dhunës të Bashkive për përdorimin e sistemit kombëtar online të regjistrimit dhe monitorimit të rasteve të dhunës në familje”, thuhet në paragrafin e parafundit të letrës. Ndërsa në mbyllje të saj thuhet: “Për këtë arsye kërkojmë që brenda datës 17 janar 2014 të dërgohet emri dhe të dhënat e personit që ju keni caktuar si koordinator të dhunës në bashkinë tuaj, i cili do të marrë pjesë në këtë trajnim”. Gafa e dytë e ministrit Veliaj ka të bëjë me datat që përmban letra. Konkretisht, në krye të letrës thuhet se ajo është shkruar më 18 janar 2014, ndërkohë që në vendin ku shënohet protokollimi, pra dalja nga Ministria, rezulton se ajo ka dalë më 14 janar, pra 4 ditë më parë. Gafa me afatet vazhdon edhe më tej. Ndërkohë që letra është shkruar më 18 janar, në fund të saj kërkohet që brenda 17 janarit (pra një ditë përpara se ajo të shpërndahej), bashkitë e vendit duhet të caktojnë emrin e koordinatorit që do marrë pjesë në trajnimet e organizuara nga Ministria. Në letër thuhet më tej se “prioriteti ynë kryesor për këtë proces është koordinimi dhe sigurimi i angazhimit efektiv të të gjithë institucioneve publike në nivel qendror dhe vendor për të parandaluar, mbrojtur, mbështetur dhe rehabilituar viktimat e dhunës në marrëdhëniet familjare si dhe krijimin e një sistemi kombëtar online të regjistrimit dhe monitorimit të rasteve të dhunës në familje. Ky prioritet përputhet edhe me detyrimet që rrjedhin nga Progres Raporti i BE-së për dhënien e statusit të vendit kandidat”.
ADI SHKEMBI
Panorama
Krijoni Kontakt