Intervista e z. Ilir Meta per z. Janusz Bugajski ne “Albanian Screen”

Emri: Meta-lsi-300x225.jpg Shikime: 379 Madhësia: 19.1 KB

Kemi shumë pyetje. Lejomëni t’ia filloj me atë që besoj se është çështja me e rëndësishme për vendin dhe për njerëzit. Dhe kjo është gjendja e ekonomisë. Sipas shifrave që kam, ekonomia është rritur vetëm me 1.3% gjatë vitit 2013. Në opinionin tuaj, a do të mbesë rritja relativisht statike gjatë 2014-ës, dhe ç’nënkupton për standardin e jetesës të shqiptarëve?

-Unë besoj se ekonomia është çështje e rëndësishme për të gjithë qytetarët shqiptarë dhe natyrisht që në radhë të parë përmirësimi i situatës ekonomike kërkon reforma të tilla strukturore, të cilat të garantojnë një rritje më të madhe dhe mbi të gjitha afatgjatë në vitet që vijnë. Në këtë këndvështrim duhet parë edhe marrëveshja e Qeverisë Shqiptare me Fondin Monetar Ndërkombëtar, apo edhe me Bankën Botërore, si një garanci për të ardhmen e ekonomisë së vendit tone, por edhe për të ardhmen e ekonomisë familjare, që është më e rëndësishme për çdo qytetar. Ne kemi qenë këtu edhe më pare, në këtë studio, dhe ndoshta në kohën kur Lëvizja Socialiste për Integrim ka qenë pjesë e koalicionit me Partinë Demokratike dhe nuk kemi ndarë ato vlerësimet rozë për situatën ekonomike. Pra, kemi qenë të ndërgjegjshëm për këto probleme të mëdha me të cilat është ndeshur ekonomia shqiptare dhe si rezultat i presioneve nga jashtë, nga kriza financiare në Eurozonë dhe në Bashkimin Evropian, apo nga situata kritike e partnerëve tanë kryesore ekonomike dhe tregtare, siç janë Greqia apo dhe Italia. Në këtë drejtim, unë besoj se qeveria është e ndërgjegjshme, është e angazhuar, ka ndërmarre një set masash, të cilat reflektohen edhe në buxhetin e këtij viti dhe në paketën fiskale për t’i dhënë fund rrëshqitjes ekonomike në pasiguri dhe njëkohësisht për t’i ndërtuar një shtrat sa më të sigurt për të ardhmen.

Nga sa kam kuptuar, rritja projektohet në 2%. A mendoni se kjo është e arritshme? Apo mos vallë është ca si tepër optimiste?

-Shpresojmë se për sa i takon rritjes së vitit që lamë pas do të na duhet ende kohë për të parë sesa ajo është realisht, ndoshta do të jetë më pak sesa ju përmendët. Ndërkohë që, shpresohet për vitin 2014 për një rritje ekonomike mbi 2%. Megjithatë, çdo gjë do të varet nga shumë parametra dhe mbi të gjitha do të varet nga ecuria e reformave strukturore, por do të varet edhe nga aftësia dhe efikasiteti i qeverisë. Jo vetëm për t’i dhënë mbështetje më të madhe bujqësisë dhe prodhimit,bujqësor në vend, por dhe për të mbështetur eksportet në tërësi. Në këtë drejtim qeveria është angazhuar për të sjellë brenda muajit mars edhe një paketë me incentiva mbështetje për sa i takon biznesit fason. Në mënyrë të veçantë pasi është biznesi kryesor punëdhënës në vend, por edhe në përgjithësi për një klimë sa më mbështetëse ndaj investitorëve. Dikush mund të pyesi pse qeveria nuk e bëri këtë gjë përpara pak javësh, meqenëse u kalua edhe një paketë fiskale në Parlament? Përgjigja është shumë e thjeshtë dhe besoj e kuptueshme për të gjithë, sepse qeveria ka patur si parësore që të mbyllë një marrëveshje me Fondin Monetar Ndërkombëtar. Një marrëveshje e cila pritet të kaloj në bordin e FMN-së muajin e ardhshëm dhe ndërkohë një marrëveshje, e cila i siguron qeverisë një mundësi të shkëlqyer financiare që të shlyej të gjitha borxhet e prapambetura ndaj biznesit, ndaj kompanive vendase apo të huaja që kanë kryer punë publike për të cilat ato nuk janë shpërblyer ende nga qeveria. Edhe pse mund të kenë marrë kredi nëpër banka dhe ato tashmë mund të kualifikohen në kredi të këqija, apo dhe për rimbursimin e TVSH, që është një tjetër problem serioz, parësore ka qënë realizimi i marrëveshjes të Fondit Monetar Ndërkombëtar. Ka qenë e rëndësishme për të fituar kohë për të bërë jo vetëm shumë konsultime me sipërmarrjen vendase dhe të huaj, por njëkohësisht edhe për të patur kohë për ta konsultuar edhe një paketë të tillë nxitëse, stimuluese ndaj biznesit me Fondin Monetar Ndërkombëtar, me Bankën Botërore dhe me partnerë të tjerë të rëndësishëm.

Më lejoni t’ju pyes specifikisht mbi FMN-në. Nga sa kuptoj, Fondi ka miratuar 300 milionë $ për një periudhë tre vjeçare. Pra, 900 milionë $ në total. A është kushtëzuar kjo me reforma specifike? Pra, me reform fiskale dhe të mbledhje më të shëndetshme të të ardhurave? Por pyetja që kam është, a është kjo e mundur? Me fjalë të tjera, a mund të mbledhë qeveria shqiptare të ardhura më të mëdha në vazhdën e paketës së FMN-së?

-Patjetër që kjo është e arritshme dhe do të arrihet permes shumë reformave, të cilat kanë të bëjnë jo vetëm me sektorët kryesor përgjegjës për këtë gjë, me Doganat dhe me Tatimet, por dhe në tërësinë e një lufte më të fuqishme për t’i dhënë fund dhe për të reduktuar ndjeshëm evazionin fiskal, informalitetin në shumë drejtime në shumë sektor. Duke filluar që nga ai i lojërave të fatit, që ishte një ndër aksionet e para për të vazhduar me informalitetin në fushën e ndërtimeve. Sigurisht dhe unë jam i bindur që do të ketë një rritje te ndjeshme te të ardhurave si rezultat i këtyre angazhimeve, por ajo që është e rëndësishmë është të garantojmë rritjen e ekonomisë. Se rritje e ekonomisë dhe formalizimi i saj patjetër që në mënyrë të menjëhershme do të jap impaktin e saj edhe tek rritja e të ardhurave. Dhe në këtë drejtim unë besoj se edhe kjo marrëveshje e qeverisë me Fondin Monetar Ndërkombëtar edhe me Bankën Botërore, është në radhë të parë një marrëveshje për të siguruar një rritje të vazhdueshme dhe të qëndrueshme të ekonomisë shqiptare.

A do të jetë nevoja për masa të reja kursimi në Shqipëri, të ngjashme me ato në Greqi? Kam dëgjuar se disa njerëz janë shumë të shqetësuar se do të ketë shkurtime të sigurimeve shoqërore dhe shpenzimeve shtetërore, por edhe të pensioneve dhe të pagave të administratës. Me fjalë të tjera, çfarë kushtesh përmban paketa?

-Kjo marrëveshje nuk synon masa të cilat do të rrezikonin në një dëmtim të elementit social le të themi, por padyshim që i hap rrugën reformave të rëndësishme strukturore dhe mbi të gjitha synon të eleminojë abuzivizmin, i cili ka qenë mjaft prezent në dhënien e ndihmës ekonomike. Mjafton të përmendim disa raste të deritanishme të evidentuara, kur këshillat e ndryshme në komuna japin një ndihmë ekonomike jo të bazuar në ligj dhe mjaft fonde shpërdorohen në vend që ato të shkojnë pikërisht tek shtresat që kanë nevojë. Në këtë drejtim unë do të doja të përmendja, meqënëse jemi në fillim të vitit, si një objektiv madhor gjatë këtij viti edhe të kuvendit, jo vetëm të qeverisë, pikërisht reformën administrative territoriale. Ajo do të ndihmoje për të garantuar shërbime më të mira ndaj qytetarëve në nivel vendor, përmes një reforme që do të forcoj realisht pushtetin vendor, përmes rritjes së kapaciteteve njerëzore apo rritjes së mundësisë për të bërë investime duke evituar një shpërdorim edhe të fondeve dhe të shumë investimeve, të cilat janë mjaft të fragmentuara dhe që asnjëherë nuk krijojnë asnjë impakt në jetën e qytetarit. Unë do të nënvizoja domosdoshmërinë e shpejtimit të kësaj reforme të gjithëpërfshirjes në radhë të parë në Kuvendin e Shqipërisë, edhe të opozitës dhe të gjithë forcave politike. Kemi gati 20 vite që vazhdojmë me këtë reformë, me këtë numër kaq të madh të njësive vendore. Janë rreth 400 të tilla bashki dhe komuna. Ndërkohë në Kosovë janë rreth 30 të tilla dhe duket që ka rezultuar të jetë mjaft efikase. Besoj se dhe kjo reformë do të na ndihmojë të arrijmë një standard europian në nivel të qeverisjes vendore, të kemi më pak njësi, por më shumë mundësi për t’u shërbyer qytetarëve dhe për të garantuar ato shërbime të domosdoshme dhe në cilësinë e duhur.

Le të kthehemi tek ekonomia paksa. Doja t’ju pyesja mbi tablonë e gjerë ekonomike, ku dhe Shqipëria po drejtohet. Qeveria po bën përpjekje t’i jap fund një borxhi në rritje. Mendoj se arrin në 75% të GDP-së së këtij viti. Ç’impakt do të ketë kjo në buxhetin shqiptar në afat të gjatë, në aftësinë për të marrë hua në tregje ndërkombëtare, dhe në fund tek qytetarët shqiptarë sa i takon shpenzimeve, investimeve dhe standartit të jetesës?

-Së pari duhet të kemi parasysh që Qeveria më shumë ka legalizuar një borxh, i cili ekzistonte dhe i cili nuk njihej dhe nuk ishte i legalizuar. Së dyti duhet të kemi parasysh, mos pagimin e borxheve ndaj kompanive, detyrimeve që shteti kishte për punët që ato kishin kryer. Ishte sjellë një situatë ngërçi në ekonominë e vendit por edhe në vete ekonominë dhe në vete funksionimin e këtyre bizneseve apo të këtyre kompanive, duke i vendosur ato në një gjendje të vështirë, një pjesë e të cilave kanë qenë të detyruara për një kohë të gjatë të marrin kredi në banka, dhe këto kredi një pjesë e mirë e tyre ishin tashmë kredi të këqija, për shkak të vështirësive të tyre. Besoj se kjo marrëveshje me FMN dhe ky vullnet i Qeverisë për t’i dhënë prioritet shlyerjes së borxheve sjellin një impakt më pozitiv në situatën ekonomike në vend, duke bërë të mundur që këto kompani dhe një pjesë e mirë e tyre të marrin frymë lirisht dhe të kënë mundësi të planifikojnë investime, ashtu sikurse të kenë mundësi që të afrojnë shumë nga llogaritë e tyre në bankar. Pra, Qeveria Shqiptare me pak fjalë është detyruar të legalizojë apo të formalizoj një formalitet , i cili ka qenë edhe më parë dhe përmes kësaj marrëveshje me FMN dhe me Bankën Botërore. Të ketë mundësi të zhvilloj disa reforma strukturore që do të japin mundësi që pas dy viteve përmes një programi konkret të monitoruar edhe nga FMN, të ulet në mënyrë të qëndrueshme edhe borxhi edhe defiçiti, dhe nga situata ekonomike në nivel makro të jetë më e qëndrueshme dhe më e besueshme për investitorët vendas dhe ndërkombëtar.

Pra, ky nuk është një borxh i pakontrollueshëm? Ju e shihni si të kotrollueshëm?

-Ky është një borxh, i cili do të kontrollohet dhe kjo është edhe arsyeja pse po bëhet kjo marrëveshje me FMN. Dihet që ky është instuticion i specializuar për të stabilizuar situatën makro-ekonomike, borxhin dhe defiçitin në radhë të parë. Kjo është një garanci edhe për tregjet ndërkombëtare.

Një pyetje në lidhje me planifikimin afatshkurtër në buxhetin e 2014-ës i cili është kritikuar nga opozita. Si do ta përmblidhni ju buxhetin? Çfarë duhet të dinë votuesit shqiptarë mbi shpenzimet qeveritare? Cilat janë prioritetet?

-Ky është një buxhet, i cili kritikohet pa të drejtë nga opozita. Është një buxhet realist. Nuk është një buxhet populist. Pra, një buxhet, i cili në rast se do të vazhdojë me traditën e mëparshme, që për hir të retorikës të planifikonte rritje pagash, pensionesh dhe ndërkohë që të mos kishte mundësi t’i mbulonte këto rritje me të ardhura reale nga ekonomia reale. Ashtu sikurse është një buxhet që planifikon një rritje të konsiderueshme të pagave për Policinë e Shtetit. Mendoj se kjo është pozitive dhe e domosdoshme, sepse është një domosdoshmëri mbështetja për Policinë e Shtetit në mënyrë që të forcohet më tej ligji, rendi publik, pasi pati një rënie, një degradim, sidomos në periudhën e fundit dhe është e domosdoshme të ketë një mbështeje për këtë sector, sepse pa forcimin e ligjit nuk mund të realizojmë dot as një formalitet më të madh të ekonomisë, as një luftë ndaj evazionit fiskal, as një luftë ndaj paligjshmërisë, korrupsionit dhe ndaj krimit të organizuar. Të gjitha këto kanë efektet e tyre në një përmiresim të ambientit ekonomik. Sigurisht që kemi një mbështetje më të madhe përsa i përket bujqësisë, sidomos përsa i takon mbështetjes së bujqësisë, subvencionimit të saj. Ky është një sector, i cili ka patur rezultate pozitive dhe ka ndikimet e veta pozitive për rritjen ekonomike, por me një mbështetje më të madhe. Padyshim që impakti i tij do të jetë akoma më i madh në rritjen ekonomike dhe në punësimin e qytetarëve tanë. Është një buxhet, i cili mendoj se hedh baza të sigurta për një rritje ekonomike më të madhe në vitet që do të vijnë, ashtu sikurse përmes reformave strukturore jep garancitë e duhura për të ulur në parametra më të pranueshem edhe borxhin edhe deficitin buxhetor. Kjo do të thotë që krijohen kushte akoma më të mira, jo vetëm për një rritje ekonomike, por edhe per një kosto më të ulët të këtij borxhi dhe për të patur më shumë mundësi dhe më shumë të ardhura dhe politika më të suksesshme sociale në të ardhmen.

Më lejoni të kthehem tek një faktor i rëndësishëm i mbledhjes së të ardhurave dhe tek taksimi, në termat e politikës publike. Taksa e sheshtë është hequr dhe ka hyrë në fuqi taksa progressive. Nga sa kuptoj, hiqet taksa 10% mbi fitimet e kompanive, dhe taksohen më tepër ata që fitojnë më tepër. A nuk bie kjo ndesh me pozitën e partisë tuaj si miqësore ndaj biznesit? A do ta frenojë taksa progressive biznesin? Cila është pikëpamja juaj? Pra, a ka dallime mes jush dhe PS-së në këtë çështje?

-Natyrisht që çdo rritje taksash nuk është e mirëpritur për opionin në tërësi, por edhe për ne si një forcë politike, por në fund të fundit ekonomia dhe buxheti është një ekuacion, i cili ka dy anë dhe kërkon gjithmone një balancë. Në këtë drejtim është e vërtet se kemi rritje të tatim-fitimit për biznesin e madh nga 10% në 15%, por duhet të kemi parasysh se dhe përfituesi më i madh edhe nga kjo marrëveshje me FMN, dhe nga ky angazhim i Qeverisë Shqiptare për të shlyer borxhin ndaj këtij biznesi, si në drejtim të punëve publike dhe si në drejtim të rimbursimit të TVSH është përsëri ky biznes. Pra, kjo është një mënyrë e kompensimit. Vërtet do të kontribuoj më shumë, por edhe do të përfitoj më shumë. Ajo që unë gjykoj se është më e rëndësishme sesa taksa, niveli i taksës 10 apo 15 %, është pikërisht klima dhe mjedisi që krijohet ndaj biznesit, nga administrata tatimore dhe doganore dhe në përgjithësi nga administrata publike. Që do të thotë se është e vërtet se biznesi paguante më parë 10% ose deri tani paguante 10 % tatim-fitim, por nëqoftëse do të kemi parasysh kostot e tjera, të cilat kanë të bëjnë me rimbursimin e TVSH, qe vonoi për vite të tëra dhe që bëhej në mënyrë selektive. Absolutisht, që kjo ishte një kosto shumë e madhe sesa diferenca që do të duhet tani që të paguaj biznesi, nëqoftëse kemi parasysh që lejet e ndërtimit për arsye të karakterit burokratik zvarriteshin për periudha të gjata. Ashtu sikurse edhe dhënia e shumë mundësive të tjera licencave e kështu me radhë, apo të veprimeve të karakterit administrativ, të cilat duhen bërë në kohë, por qe zvarriteshin. Padyshim që kostot shkojnë shumë më tepër. Pra, nëse qeveria dhe për shkak të detyrimit të saj për të rritur të ardhura për të patur rigorozitet më të madh fiscal, ishte e detyruar dhe në mënyrë të veçantë Ministria e Financave për të kërkuar këtë masë, është tani e domosdoshme për të marrë një sërë masash, një sërë reformash, të cilat lehtësojnë kostot që ishte i detyruar të paguante më parë biznesi, duke qenë këtu të ndërgjegjshëm dhe për një shërbim më të shpejtë, dhe për një luftë pa kompromis të qeverisë të administratës tatimore, doganore, kundër korrupsionit, në mënyrë që biznesi të mos ketë kosto shtesë në të ardhmen. Unë kam një kundërpyetje për të gjithë ata të cilët ngrenë shqetësimin se me rritjen e taksës prej 10% do të përkeqësohet klima ndaj biznesit. Natyrisht që çdo rritje takse nuk është e mirëpritur nga ana e biznesit, por duke qënë se Shqipëria për vite të tëra ka patur këtë taksë, pra 10% të tatim-fitimit, atëherë si shpjegohet se Shqipëria në vitet e fundit në të gjitha raportet ndërkombëtare, të institucioneve të rëndësishme, përsa i takon indikatorëve, që përcaktojnë klimën e biznesit, Shqipëria ka pësuar një përkeqësim në renditjen e saj. Ndërkohë që, taksa tatim-fitimi 10% ndaj biznesit nuk ka ndryshuar, pra ky tatim-fitim është për një periudhë të gjatë. Pra ka shumë faktorë të tjerë.

Pra nuk ishte vetëm çështja e taksës, por kishte dhe problem të tjera si korrupsioni, transparenca, etj…

-Ka qenë çështja e korrupsionit, sjellja arbitrare e tatimeve në të kaluarën, e cila ka qenë e pashembullt dhe kjo duhet të ndryshojë nga qeveria e re nga Ministria e Financave, nga Drejtoria e Përgjithshme e Tatimeve. Ka qenë zvarritja pafund e rimbursimit. Duhet të shkojë te rimbursimi automatik, në mënyrë që të ketë transparencë maksimale dhe që biznesi të mbetet në varësi të trajtimit selektiv nga Drejtoria e Pergjithshme e Tatimeve, për sa i takon rimbursimit. Është problemi i lejeve. Duhet të zhbllokohet historia e lejeve dhe përsëritja e planeve dhe masterplaneve sa herë ndërrohen qeveritë. Një nga mangësitë kryesore të qeverisjes së mëparshme mendoj se ka qenë zvarritja pafund e studimeve, planeve, masterplaneve dhe sidomos përsa i takon zhvillimit të bregdetit. Dhe ne sot kemi një realitet, ku në këto 8 vitet e qeverisë së mëparshme nuk kemi një resort turistik të standardeve më të larta europiane. Nuk kemi një resort, i cili të ketë minimalisht disa nga ato standard, të cilat ekzistojnë kudo si p.sh. në Greqi, Itali dhe në shumë vende të tjera dhe ndërkohë që politika jonë në zhvillimin e turizmit mbetet ende në nivelin e propagandës dhe jo në një realitet me standarde te larta. Ndërkohë që ka pasur dhe ka kërkesa për të bërë investime të tilla në vendin tonë. Shpejtësia në plotësimin e kërkesave të biznesit për investimet, të biznesit vendas, të investitorëve te huaj do të jetë përcaktuese për zhvillimin ekonomik të vendit. Ndoshta ju mund të keni qënë në Malin e Zi. Eshtë një port shumë interestant jahtesh “Oporto Montenegro’. Kam pasur rastin të shkoj dhe jam impresionuar. Një investim i jashtëzakonshëm, me një investitor kanadez. Dhe e vërtete është që ky investitor kishte ardhur më parë në Shqipëri dhe mbasi ishte lodhur kishte shkuar në Malin e Zi dhe atje u krijuan të gjithë lehtësitë për të bërë një investim që ndryshonte imazhin e një vendi të tërë. Është përcaktuese sjellja e qeverise dhe administratës me transparence, me efikasitet, shpejtësi në plotësimin e kërkesave të investitorëve, numri i të cilëve është i pafund pavarësisht nga kriza e përgjithshme për të përcaktuar një rritje më të lartë të vendit gjatë këtij viti dhe më tutje në në ardhmen.

Pajtohem plotësisht me ju. Konsistenca, parashikueshmëria dhe transparenca në mbledhjen e taksave është jashtëzakonisht e rëndësishme. Kam dëgjuar se disa kompani të huaja mund të jenë të shqetësuara, sepse nuk luajnë sipas rregullave… Pra ato janë më të rrepta në lidhje me moskryerjen e korrupsionit, ndërkohë që disa kompani shqiptare e dinë se si të luajnë apo se si janë këto rregulla. Pra, kompanitë e huaja do të vuajnë më tepër si pasojë e taksave më të lartë. Si i përgjigjeni kësaj?



-Mendoj se sfida e Shqipërisë dhe e administratës fiskale është që përmes kësaj politike të re fiskale, që u aprovua në parlament, të arrihen rezultate më të larta në drejtim të mbledhjes së te ardhurave, të realizohen ato objektiva dhe mundësisht të tejkalohen ato që janë vendosur në buxhetin e këtij viti dhe të minimizohet informaliteti. Një politikë që sjell edhe rritjen e taksave, ashtu sic ka sjellë edhe uljen e taksave në shumë drejtime të tjera, përsa i takon biznesit të vogël, patjetër që duhet të jape një impakt shumë pozitiv ekonomik dhe biznesi i madh që do të duhet të paguajë më shumë duhet të përfitojë një shërbim më transparent, shumë më të përgjegjshëm nga administrata tatimore. Duhet të marre zgjidhje shumë më të shpejta për problemet administrative me të cilat ndeshet. Unë besoj që të gjitha këto përcaktojnë ndaj biznesit, por edhe koston reale të biznesit . Shpresoj që do të ecet në këtë drejtim dhe kjo do të thotë që kostot që biznesi duhet të paguajë gjatë këtij viti do të jenë më të ulëta se sa në të kaluarën. Kosto shumë e rëndësishme mbetet koha, pra zgjidhja e një problemi në kohë është një element shumë i rëndësishëm i kostos financiare.

Element rëndësishëm i kësaj lufte mbetet kërkesa e qeverisë për të konfiskuar asetet e gjithë personave publikë, ku dyshohet dhe provohet se këto janë vendosur përmes veprimeve abuzive, korruptive apo të pajustifikuara nga ligji.

Në lidhje me këtë, unë di se qeveria ka miratuar së fundmi një plan veprimi kundër korrupsionit, i cili centralizon përpjekjet kundër korrupsionit në Gjykatën e Krimeve të Rënda. Dhe ka kritika nga pala amerikane dhe ajo evropiane se kësaj gjykate i mungon specializimi dhe burimet e duhura, gjë e cila mund të shpjerë në bllokime në disa gjyqe dhe hetime mbi kompani apo individë të akuzuar për korrupsion. Cila është përgjigja juaj ndaj kësaj?

-Shqipëria ka një legjislacion në këtë drejtim. Ka edhe një pakënaqesi te opinionit publik, por edhe atij ndërkombëtar të zbatimit të këtij legjislacioni që ka të bëjë me faktin që shkalla e ndëshkueshmërisë, jo ajo që është pritur, por që ka të bëjë edhe me mënyrën e funksionimit të gjyqësorit në Shqipëri, ku kërkohet një llogaridhënie më e madhe prej tyre dhe, në këtë drejtim qeveria përmes disa përmirësimeve në legjislacion ka shprehur vullnetin e saj për ta ashpërsuar luftën kundër korrupsionit. Element i rëndësishëm i kësaj lufte mbetet kërkesa e qeverisë për të konfiskuar asetet e gjithë personave publikë, ku dyshohet dhe provohet se këto janë vendosur përmes veprimeve abuzive, korruptive apo të pajustifikuara nga ligji. Gjë që do të ishte goditje e rëndë ndaj atyre që shkelin ligjin dhe abuzojnë me të. Lidhur me cështjet më konkrete, qeveria ka sjellë mendimet dhe idetë e saj në kuvend. Ne jemi në një proces diskutimi dhe konsultimi edhe me partnerët ndërkombëtarë dhe me institucionet e tjera të pavarura dhe besoj që do gjejmë zgjidhjet më të mira, të cilat sjellin forcim të legjislacionit dhe luftën kundër korrupsionit, por pa cenuar pavarësinë e institucioneve e duke rritur llogaridhënien e tyre.

Ndonjëherë më duket sikur publiku është paksa cinik për çështjen e korrupsionit të zyrtarëve. Mendoni se gjatë këtij mandati qeveritar, publiku mund të marrë siguri që qeveria e ka marrë seriozisht luftën kundër korrupsionit? Cili është ndikimi në ekonomi?

-Besoj se qeveria është plotësisht e angazhuar dhe e vendosur në këtë drejtim, por është një luftë që nuk i takon vetëm qeverisë, sepse sfera e veprimtarisë së qeverisë është e gjerë por edhe e kufizuar. Duke pasur parasysh që një rol vendimtar ka Prokuroria, Gjykata, nga ana e Kontrollit të Lartë të Shtetit dhe shumë institucioneve të tjera të pavarura. Por edhe nga ana e Kuvendit që ka përgjegjësitë e tij për të përforcuar bashkëpunimin dhe për ta kërkuar këtë edhe nga institucionet kushtetuese dhe të pavarura, që janë të zgjedhura nga kuvendi. Besoj që përmes një koordinimi dhe një bashkëpunimi transparent në interes të forcimit të ligjit, ne do arrijmë të kemi suksese në këtë rrugë dhe t’i japim fund një zhgënjimi të opinionit public, i cili për këto probleme dëshiron të shohë fajtorë konkretë. Mendoj se shumë procese kanë nisur . Duhet vendosmëri për të shkuar deri në fund. Ministria e Drejtësisë dhe Këshilli i Lartë i Drejtësisë duhet të jenë të vëmendshëm për të parë edhe përformancën e çdo gjykatësi, sjelljet dhe vendimet e tyre, për të gjitha rastet që janë sensitive në lidhje me çështjet e korrupsionit, apo shkeljen e ligjit nga zyrtarë të lartë dhe nga përfaqësuesit e administratës shoqërore.

Tani do flasim pak për postin tuaj të ri si kryetar parlamenti. Eshtë post krejt i ri për ju. Eshtë punë e vështirë. Mund të na thoni si po i balanconi këto interesa dhe poste të ndryshme në Parlament, duke u përpjekur të ruani konsensusin? A është e mundur arritja e konsensusit, kjo është pyetja? Si e shihni ju rolin tuaj? Sa i rëndësishëm është ai?

-Mendoj që është plotësisht e mundur që parlamenti ynë të tregojë një nivel edhe më të lartë të përfaqësimit politik që meritojnë qytetarët tanë dhe këtu është shumë për t’u bërë, përsa I takon këtij përfaqësimi që kërkohet . Kjo është në radhë të parë cështje e vullnetit politik, sepse në të dyja krahet si të maxhorancës, si të opozitës ka mjaft kualitete dhe profesionistë, mendimi i të cilëve duhet të dalë në plan të parë. Në një parlament, debati është i kuptueshëm, por që debati të jetë konstruktiv, të mos dëmtojë disa interesa që janë madhore përsa i takon interesave të të gjithë palëve. Në këtë drejtim, sfida ime nuk është e lehtë, në kuptimin e përpjekjes time për të drejtuar parlamentin, në një mënyrë sa më gjithëpërfshirëse dhe të balancuar. Prioriteti im përvec respektimit të rregullores për të mbajtur gjithmonë të perfshirë opozitën në debat, në të gjithë të drejtat e saj për t’u respektuar dhe për të pasur mundësinë për të dhënë qëndrime dhe alternativat e saj dhe besoj se e kemi arritur këtë gjë deri tani. Dhe pse nëse ju do pyesni përfaqësuesit e opozitës , ata do kenë pretendimet e tyre, por ashtu jam i kënaqur që deri tani nuk kemi patur incidente në kuvendin tonë, nuk kemi patur ndërprerje të seancës për shkak të tensionit politik , nuk kemi patur raste të përjashtimit të deputetëve për shkak të sjelljes jo shumë të denjë, por të gjitha këto mendoj se janë arritje minimale.

Nuk ka pasur ende bojkote.

-Edhe bojkoti sigurisht, por këto janë minimale duke I vlerësuar me ato që duhet të sjelli kuvendi në raport me qytetarët tanë: një përgjeshmëri më të madhe, një vetpërmbajtje edhe më të madhe dhe një përqendrim te cështjet më të rëndësishme, të cilat kërkojnë një zgjidhje. Por këto zgjidhje nuk mund të jenë të njëanshme, sepse edhe opozita ka përgjegjësinë e saj për të qenë pjesë e zgjidhjeve dhe mos të kundërshtojë një propozim vetëm pse ka ardhur si propozim i qeverisë. Ne dhamë një shembull të mirë në nëntor, kur ndërtuam një rezolutë të përbashkët për cështjet e integrimit evropian. Kemi mjaft raste të zhvillimeve pozitive në Kuvendin e Shqipërisë, ku njëri nga këto është krijimi i aleancës se grave deputete që ndodh për herë të parë në kuvendin tonë dhe një alencë që po jep shembuj tepër pozitivë të bashkëpunimit ndërpartiak. Une do përpiqem të kontribuoj sa më shumë per frymën e bashkëpunimit për interesa të përgjithshme, të cilat kanë të bëjnë me zhvillimin e vendit , me integrimin evropian, përmirësimin e ekonomisë, fuqizimin e institucioneve, me rritjen e llogaridhënies së tyre. Por, mbeten ende shumë sfida për Kuvendin e Shqipërisë, që të jetë një institucion i dashur për qytetarët, ku aty të shohin ngritjen e problemeve dhe vullnetin për t’i zgjidhur ato. Mos të jetë një institucion që t’u krijojë dhimbje koke, kur të degjojnë debate të ashpra që nuk zgjidhin asgjë.

Siç e dini, në SHBA, Kongresi nuk shihet me sy të mirë. Mendoj se pëlqyershmëria e tij ka rënë shumë dhe mendohet se nuk po bën aq sa duhet, nuk po miraton ligjet e duhura e me radhë. Nuk e di sa janë përqindjet këtu. Sa është përqindja e pëlqyeshmërisë së Parlamentit shqiptar? Ka sondazhe në Shqipëri për Parlamentin?

-Nuk besoj që ka ndonjë sondazh, por nuk jemi aty ku duhet, ndaj theksoj qëndrimin tek problemet, tek zgjidhja e tyre dhe jo thjesht tek kundërshtimi i njëri-tjetrit. I kemi kapacitetet nga të dyja anët, kemi përfaqësues me eksperiencë, me mundësi për të kontribuar për zgjidhjen dhe kemi mundësi për të shmangur një polarizim, i cili duket si i një periudhe të fillimit të trazicionit, por në thelb është tërësisht jashtë kohe, sepse nuk ndodh në shoqërinë tonë, ku shkalla e mirëkuptimit dhe emancipimit është shumë e lartë

Po planifikoni ndryshime në Kushtetutë? E thënë ndryshe, roli i presidentit, mundësia e zgjedhjes direkt nga populli, ndryshimi i numrit të votave për mocionin e mosbesimit në Parlament dhe çështje të tjera të ngjashme. Ka ndonjë plan në hartim e sipër për ndryshime kushtetuese?

-Në ndryshimet e Kushtetutës, e rëndësishme është se nëse do ndodhnin, të vinin pas një procesi debatues dhe gjithëpërfshirës. Të mos ndodh si herën e fundit në 2008, ku për nevoja politike të ditës u bënë disa ndryshime jo të matura dhe të pjekura. Për momentin, priotiteti ynë kryesor është ai administrativ dhe territorial dhe krijimi në parlament i një komisioni gjithëpërfshirës, i cili brenda këtij sesioni që fillon shumë shpejt të sjelli një draft në kuvend për t’u votuar në kohën e duhur. A do sillte kjo reformë ndryshim në Kushtetutë? Nuk mund ta them me siguri. Besoj se do jetë e diskutueshme. Për ne është e rëndësishme reforma në fushën e drejtësisë, sepse ka ligje që kanë nevojë për t’u rivlerësuar në kushtet e reja. Por as për këtë nuk mund të them me bindje a sjell apo jo ndryshime në Kushtetutë. Është me rëndësi që kjo cështje të rivlerësohet hap pas hapi, sepse qëllimi nuk është për të bërë ndryshime të karakterit utilitar, por për të bërë përmirësime afat-gjata, të cilat vijnë nga domosdoshmëria e reflektimit të ketyre problemeve, që janë hasur në aplikimin e Kushtetutës tonë pas 15 vitesh, që nga miratimi i saj.

E përmendët disa herë reformën administrative. Sa komuna do ketë tani Shqipëria? Kjo ishte pjesa e parë e pyetjes. E dyta, ç’do të thotë kjo për ata që janë të punësuar në komuna? Me fjalë të tjera, do rritet papunësia mes ish-nëpunësve vendorë?

-Kur flasim për reforma administrative territoriale nuk kemi problem kryesor as punësimin e nëpunësve në këto njesi dhe as shkurtimin e këtyre vendeve të punës. Shqipëria ka gati 20 vite që ka të njëjtën ndarje administrative territoriale. Mund të them me bindje të plotë që ka komuna me 300-400 banues që nuk banojnë në zona të thella malore po banojnë në qytete, që marrin ndihma ekonomike si në komunat e tyre. Dhe që shkojnë në këto komuna vetëm kur ka zgjedhje lokale për drejtuesit e këtyre komunave. Këta nuk kanë mundësi të bëjnë politikë zhvillimore nëpër komuna. Reforma administrative në radhë të parë do të thotë fuqizim real i pushtetit vendor. Mundësi për të mbajtur njesi, që mbajnë veten e tyre, duke qenë në gjendje të mirëmenaxhojnë resurset dhe burimet e territorit përkatës dhe duke krijuar stafe të afta dhe të specializuara për t’i menaxhuar këto burime. Së dyti ne synojmë të anëtarësohemi në BE dhe të përfitojmë nga projektet e BE-së dhe na duhet të krijojmë një lloj kontabiliteti midis njesive tona të pushtetit vendor dhe atyre me nivel evropian. Kështu do kursejmë shumë fonde të cilat sot shkojnë dëm dhe nuk menaxhohen mirë. Në këtë mënyrë do krijojmë më shumë vende pune, jo vetëm në administrate, por edhe duke i përdorur më mirë resurset e burimet natyrore të njesive tona vendore.

Çështjes administrative do i kthehemi edhe në një moment tjetër. Cila është axhenda, ose kalendari i procesit të reformës?

Për këtë cështje besoj se na duhet të flasim përsëri edhe me opozitën, sepse kjo është një reforme, që duhet të jetë gjithëpërfshirëse dhe të gjithë janë shprehur pro kësaj reforme, madje janë shprehur se është e vonuar, dhe në të vërtëtë është e vonuar. Por besoj se është mjaft e rëndësishme që brenda muajit korrik, në të arrijmë të mbyllim një draft që të vijë në kuvend për t’u miratuar. Përsa u takon numrit dhe kritereve te tjerë besoj që është e hapur për diskutime dhe alternativa. Do të ketë parasysh një traditë, vazhdimësi gjeografike, resurse natyrore, numrin e popullsisë. E gjithë puna do bëhet mbi disa kritere. Janë angazhuar edhe ekspertë evropianë në këtë reformë, ashtu sikur jam shprehur që duhet të ketë një politikë mbrojtëse, sepse përfshihen edhe pakicat. Kjo reformë nuk do përjashtojë njesitë vendore që kanë të bëjnë me minoritetin grek, apo maqedonas në Shqipëri. Sepse kjo është ngritur si shqetësim në media nga përfaqësues të caktuar. Por përkundrazi Shqipëria është vend evropian dhe do ketë një politikë mbrojtëse ndaj këtyre pakicave.

Të flasim tani për vendimin e BE-së për statusin e vendit kanditat për Shqipërinë. Si mendoni, ç’e motivoi një vendim të tillë? Mos vallë fakti që Shqipëria nuk ka arritur standardet e pritshme, nuk ka përmbushur kushtet që iu caktuan, apo kemi të bëjmë me diçka më të thellë? Ndoshta pak paragjykim nga ana e disa prej vendeve evropiane anëtare për ta pranuar Shqipërinë në BE? Cili është këndvështrimi juaj për këtë çështje?

-Motivimi vjen nga demotivimi, pra ka një demotivim përsa I përket zgjerimit dhe kjo është e kuptueshme. Ne nuk na vjen mire, por duhet të jemi të ndërgjegjshëm për këtë demotivim. Kjo cështje është lënë për më vonë për disa arsye dhe nuk ka të bëjë me plotesimin dhe mosplotësimin nga ana e Shqipërisë të atyre kërkesave që iu kërkuan Shqipërisë për marrjen e statusit kandidat, sepse Shqipëria I ka plotësuar të gjitha. Përndryshe nuk do kishte asnjë arsye që Komisioni Evropian të bënte nje rekomandim pa kushte për Shqipërine. Mendoj se Komisioni Evropian është institucioni më i specializuar i vetë BE-së për të bërë një vlerësim të tillë dhe nga ana profesionale, por ka pasur një vendim politik , i cili ka të bëjë me mekanizmin politik te marrjes së vendimeve të BE, një cështje e hapur për debat edhe brenda BE-së, mjafton një vend i vetëm të vendosi veton. Kjo është pjesë e këtij mekanizmi dhe në rastin konkret patëm një veto hollandeze. Përpara se kjo cështje të vlerësohej nga ministrat e jashtëm, Parlamenti Hollandez e mbylli këtë cështje. Pati dhe vende të tjera, të cilët u shprehën se për këtë cështje qershori do të ishte më i përshtashëm. Mos të harrojmë që Parlamenti Evropian ishte plotësisht pro dhënies se statusit kandidat dhe pothuajse ishte një vendim unanim. Mjaft ministra të jashtëm në letren e tyre publike drejtuar Presidencës Lituaneze dhe zonjës Ashton kërkuan që Shqipërisë t’i jepej statusi. Pra unë do ta vlerësoja këtë, jo se Shqipëria nuk i përmbushi kushtet për të marrë këtë status, por me demotivimin që ekziston në BE për të ecur drejt zgjerimit të paktën për momentin. Shqipëria nuk është klasifikuar si vend problematic, që e ka të domosdoshëm të motivohet për një arsye më të madhe se sa thjeshtë ecuaria e procesit të integrimit. Për ne është e rëndësishme të vazhdojmë në rrugën e reformave dhe do të vazhdojmë, sepse bëhen në interes të qytetarëve tanë dhe Shqipëria është dhe do të jetë një vend evropian dhe kjo është e përcaktuar, është zgjedhja jonë mbarëkombëtare. Por procesi i integrimit do të jetë i veshtirë, sepse vetë BE është në një moment të veshtirë, dhe në debate për të ardhmen e tij. Në këtë bashkim edhe pa Shqipërinë, dhe me vendet e tjera si anëtare, por edhe me vende të tjera potenciale në të ardhmen.

E shihni këtë si dallim paragjykues mes Shqipërisë dhe Serbisë? Siç e dini, Serbia e ka marrë statusin e vendit kandidat, tani po hapin bisedat për anëtarësim, po vendosin nga cilët kapituj të fillojnë nga “acquis communautaire” dhe Shqipëria duket sikur ka ngecur. Nuk e dimë nëse vendimi për statusin do jepet në qershor, gjatë samitit të radhës të Këshillit të BE-së. Mos vallë ka paragjyqim? Mos vallë ngaqë Shqipëria shihet si një vend me shumicë myslimane, që ka konotacione paragjykuese në disa vende të Evropës perëndimore? Cili është mendimi juaj?

-Nuk kemi asnjë kompleks pse një pjesë e mirë e shqiptarëve gëzojnë besimin mysliman, përkundrazi. Ne jemi një vend evropian dhe këtë ne e kemi treguar, sepse kemi bashkëjetesën e shkëlqyer në harmoninë e jashtëzakonshme që ekziston në këtë vend dhe është e hershme mes të gjitha besimeve. Ekzistojnë paragjykime edhe ndaj vendit tonë në këtë aspekt, por paragjykime nga ata që nuk kanë njohjen e duhur. Ekzistojnë edhe lojëra politike për shkak të interesave elektorale. Është fakt i njohur që drejtues të partive ekstremiste në vende të europës, si rasti I Geert Wilders në Hollandë që është partia e parë në të gjitha sondazhet, dhe ishte partia që inicioi mocionin në Parlamentin Hollandez “Partia e Lirisë” për të bllokuar një qëndrim pozitiv të Qeverisë Hollandeze dhe të ministrave të jashtëm. Është shprehur disa herë kundër Shqipërisë në Europë duke asociiuar me besimin fetar të paragjykuar prej tij. Ky nuk është qëndrim vetëm ndaj Shqipërisë, por edhe ndaj vendeve të tjera, si dhe ndaj vetë BE-së. Por qëndrime të tilla nuk janë pa ndikim, sepse Hollanda në mars ka zgjedhjet vendore dhe kjo forcë politike është në krye të sondazheve dhe po i merr terren partive që janë në qeveri më këtë lloj retorike, duke shfrytëzuar pakënaqësitë e opinionit publik, situatën ekonomike, sociale. Asnjë qeveri nuk do të donte të rëndonte pozitën e saj brenda vendit për hir të perspektivës europiane të Shqipërisë. Ky është një realitet dhe këtë duhet ta dijë shumë mirë zoti Basha, i cili e njeh shumë mirë Hollandën. Gjithashtu edhe Berisha. Më vjen keq kur ata për arsye të politikës përpiqen të neglizhojnë arsye të tilla. Edhe sikur zoti Berisha të ishte kryeministër, por edhe zoti Basha, e kemi të thjeshtë që të fajësojmë për cdo gjë qeverinë, sepse nuk jemi më në qeveri, kur ka disa arsye që nuk kemi nevojë pse t’i duartrokasim.

Më duket se disa prej këtyre paragjykimeve dhe politikave populiste do vazhdojnë ta bllokojnë Shqipërinë në qershor. Cili do jetë reagimi i qeverisë shqiptare? Do përvijohen kushte të reja apo do bëhen bllokime të reja që Shqipëria ta marrë statusin kandidat?

Kam pasur mundësinë të bëj një bisedë me kryeministrin Rama, dhe besoj se është një ide shumë e mirë që cilido të jetë vendimi i BE-së lidhur me statusin e Shqipërisë, i cili nuk ka të bëjë me progresin real që do zhvillojë Shqipëria, por ka të bëjë me problemet reale që ka Shqipëria. Në problemet që ka vetë BE, për disa zgjedhje vendore të BE-së në muajin mars, kemi zgjedhjet për Parlamentin Europian përpara Qershorit. Jane disa faktorë që nuk mund të parashikohen dhe ndikohen nga ne. Ne kemi dicka që mund të bëjmë pavarësisht këtyre faktorëve, të fitojmë kohën për hapjen e negociateve dhe që ne të fillojmë t’i adresojmë kapitujt më të rëndësishëm, edhe të vetë negociatave me BE-në, ato të cështjeve të brendshme, të drejtësisë. Duke angazhuar administratën me përgatitjen në procesin e negociatave edhe tani, edhe pse se kemi marrë anëtarësimin e vendit kandidat . Besoj se kjo është kohë e fituar. Tregon vendosmërinë tonë për të ecur drejt integrimit europian.

Po ndryshoj temë dhe dua të flasim pak për takimin e parë ndërqeveritar mes Shqipërisë dhe Kosovës në Prizren ditët e fundit. Mund të na jepni një pamje të përgjithshme të nismës ndërqeveritare. Besoj se kryeministri Thaçi foli për zhvillimin e një qeverisjeje të përbashkët strategjike, nuk jam i sigurt se ç‘do të thotë, por mund të na i përmblidhni iniciativat që janë marrë, qëllimet e këtyre takimeve dhe si e shihni zhvillimin e mëtejshëm?

-Mendoj se është një takim mjaft pozitiv. Marrëdhëniet e Shqipërisë me Kosovën janë unike. Janë marrëdhëniet e dy vendeve fqinje, por jo vetëm kaq, janë më shumë. Janë dy vende që të ardhmen e qytetarëve të tyre e shohin në BE. Kemi mundësi më të mëdha për të shfrytëzuar resurset për një zhvillim më të shpejtë, për të integruar më shpejt, por edhe për të përdorur më mirë resurset e njeri- tjetrit. Si në aspektin energjetik. Shqipëria dhe Kosova kanë më shumë mundësi të përfitojnë më shumë nga sistemet energjetike. Shqipëria bazën kryesore të energjisë e ka nga energjia e rinovueshme, hidro. Ndersa Kosova e ka nga energjia, e cila prodhohet nga termocentralet. Bashkëpunimi i këtyre vendeve do të rezultonte me një dobi shumë të madhe edhe për Kosovën edhe për Shqipërinë dhe do ta bënte sistemin energjetik shumë efikas. Edhe në shumë fusha të tjera mund të arrihet një shkallë shumë më e lartë e përfitueshmërisë reciproke. Ky bashkëpunim duhet parë si një mundësi për të eksploruar të gjitha mundësitë e fjetura deri tani për një zhvillim edhe më të mirë ekonomik, por edhe për të dhënë ndonjë shembull të një bashkëpunimi tepër konstruktiv edhe në rajon. Në këtë drejtim unë besoj se ky bashkëpunim nuk është i vetmi edhe pse është mjaft unik. Shqipëria ka edhe marrëdhënie të mira edhe me vende të tjera, qe është bashkëpunim i domosdoshëm, që eshtë në ADN-në e vet të politikës së jashtme të Shqipërisë, politikë e fqinjësisë së mire, politike bashkëpunimi, pragmatike, që shikon drejt të ardhmes, zgjidhjes së problemeve. Ka qenë një mbledhje e paramenduar. Ideja për të realizuar një bashkëpunim sa më të dobishëm nga Shqipëria me Kosovën, ka qenë një ide përpara zgjedhjeve dhe pas tyre. Unë besoj se takimi iPrizrenit do të pasohet me takime të tjera. Kemi nevojë për vendime konkrete, si p.sh konsullatë apo ambasada të përbashkëta. Kjo është pozitive, jo vetëm me Kosovën, por edhe me vendet e tjera. Kur ne duhet të japim shërbimin tonë ndaj fqinjëve tanë, por edhe të shfrytëzojmë burimet tona, sepse nuk kemi mundësi të hapim konsullata kudo. Këto forma bashkepunimi janë të dobishme dhe me interes konkret edhe praktik për qytetarët tanë.

Eshtë një shembull i mirë. Kohët e fundit isha në Podgoricë dhe u habita që polakët dhe gjermanët kishin hapur një ambasadë të përbashkët në Podgoricë, në Mal të Zi. Dhe këto dy vende kanë pasur marrëdhënie armiqësore gjatë gjithë historisë. Nëse arrijnë ta realizojnë ata, padyshim, mund ta realizojë dhe Shqipëria me Kosovën. Dua të kaloj te një pyetje tjetër. Po u afrohemi pyetjeve të fundit. Jo marrëdhënie të mira fqinjësie, por marrëdhënie të mira aleate. Si do i përshkruanit marrëdhëniet Shqipëri-SHBA pas vendimit për lëndët kimike siriane? Refuzimin që Shqipëria i bëri propozimit të SHBA-së. Si mendoni, ishte ky reagimi i duhur nga ana e Tiranës? A ka pasoja negative? Ndoshta edhe positive si rrjedhojë e këtij vendimi?

-Marrëdhëniet e Shqipërisë me SHBA-në janë marrëdhënie tepër solide dhe besimi të fuqishëm reciprok. Marrëdhënie të provuara në kohë të vështira. Janë tepër solide për t’i rezistuar cdo lloj aludimi, sic kemi edhe në rastin konkret. Jam i bindur se janë marrëdhenie me një të ardhme të shkëlqyer, të cilat nuk mundet kurrsesi të cënohen nga një vendim sovran i qeverisë shqiptare në një moment të caktuar, ku shprehen dhe rrethanat ne te cilat ky vendim është marrë. Nuk ka të bëjë me refuzimin, por me vlerësimin e pamundësisë për te patur ato kapacitete që do të kërkonte përfshirja e Shqipërisë me sukses ne një operacion të tillë.

Pyetja e fundit ka të bëjë… A keni ndonjë ambicie tjetër politike? Keni mbajtur postin e kryeministrit, jeni kryetari i partisë së tretë më të madhe, tani kryetar i Parlamentit. I vetmi post i lartë që ka mbetur në Shqipëri është ai i presidentit. Keni një ambicie të tillë në të ardhmen?

-Nuk besoj se jam në presionin e kuriozitetit për të provuar cdo lloj pozicioni politik. Është një fakt i qartë se unë gjithmonë kam qenë i prirur për të qenë i dobishëm në jetën politike, publike qoftë përmes dorëheqjeve apo marrjes së përgjegjësive. Për mua është e rëndësishme të jem i dobishëm në një detyrë, në një pozicion publik, sepse kjo është një sfidë, e cila përvec vështirësive synon të japi kënaqësi dhe kënaqësia ime është kur jam i dobishëm për të kontribuar për dicka më positive. Nuk jam në stadin për të provuar një pozicion të caktuar, por jam në atë të kontributit përmes një përgjegjësie të caktuar dhe jam ende në fillimet e kryetarit të parlamentit ndaj do t’ju lutesha të mos më shpërqendroni nga kjo detyrë, që ka vështirësitë e saj, por edhe përgjegjësitë.

MAPO