Në shtëpinë e kreut të Partisë Demokratike në Pogradec, Luan Lipo, ka pasur një shpërthim granate natën e së dielës, por fatmirësisht pa lëndime në njerëz. Shpërthimi ka ndodhur në katin e parë të banesës private të Luan Lipos, në lagjen numër 5 të qytetit, në një kohë kur e gjithë familja ka qënë brenda, por fatmirësisht shpërthimi ka shkaktuar vetëm dëme materiale.
Luan Lipo u shpreh sot për “News 24″ mbi ngjarjen duke u shprehur se nuk ka pasur konflikt me asnjë person. Lipo e ka cilësuar ngjarjen krejtësisht për motive politike dhe kërkon nga policia të zbardhet e vërteta.
Ndërkohë sipas policisë bëhet e ditur se një granatë ofensive ishte vendosur poshtë derës së jashtme të banesës private 3-katëshe të Lipos. Deri tani policia ka shoqëruar në komisariat 20 persona, të cilët po merren në pyetje në lidhje me ngjarjen.
“Rreth orës 23.35, në lagjen numër 5 të qytetit është dëgjuar një shpërthim, ku dhe ka plasur një granatë dore, dhe ka dëmtuar lehtë derën e jashtme të banesës së shtetasit L.L. Nga ky shpërthim nuk ka dëme në njerëz apo dëmtime të tjera materiale. Ndërkohë u ngrit grupi hetimor dhe po punohet për zbardhjen e plotë të ngjarjes dhe kapjen e autorëve të kësaj ngjarjeje”,- thuhet në njoftimin e policisë.
Krijoni Kontakt