Mafia napolitane në Itali, arrestohet boksieri shqiptar Orial Kolaj

[Albo]

Orial Kolaj, boksieri shqiptar nën urdhrat e “Camorra”-s

NGA: EDUARD ILNICA


Orial Kolaj, boksieri shqiptar nën urdhrat e “Camorra”-sROME-Arrestohet në Itali si bashkëpunëtor i mafias, boksieri shqiptar Orial Kolaj, fitues i kampionateve italiane dhe europiane në peshat e mesme. Siç bëjnë të ditur mediat italiane, Kolaj është arrestuar nga policia e Romës bashkë me 15 vetë të lidhur me klanin mafioz të Kazalezëve (Casalesi).

Të akuzuar për vepra të ndryshme, si mashtrim, vjedhje, gjobëvënie bizneseve, konkurrencë e paligjshme me kërcënime dhe dhunë, armëmbajtje pa leje, së bashku me boksierin shqiptar u janë vënë prangat. Vlera e sekuestrimit të të mirave materiale të tyre arrinte në shifrën e 30 milionë eurove. Aktiviteti i tyre kryesor i paligjshëm është kontrolli mbi sallat e lojërave të fatit, videopoker dhe bastet.

ROLI I KOLAJT

Për t'u vënë "kapakun" grupeve rivale duhej edhe një boksier. Dhe është boksieri shqiptar Orial Kolaj, me pasaportë italiane, i cili bashkë me shqiptarë të tjerë, të quajtur si "boksierët" ekzekutonin dënimet e rivalëve. Kola me shokë dërgoheshin te njerëzit që kundërshtonin, ose te konkurrentët dhe rrihnin barbarisht, madje edhe në publik, si për t'u treguar se çfarë ishin në gjendje të bënin, në mënyrë që rivalët të hiqnin dorë menjëherë.

Grupi shqiptar i boksierëve, i kryesuar nga Orial Kolaj, vepronte në zonën e Lacios në Romë, por mësohet se ata
më parë kanë vepruar edhe në Napoli, duke qenë të organizuar. Pas lidhjes me klanin kazalez, shqiptarët kanë vepruar më shumë në Romë.

Përveç kontrollit të lojërave të fatit, videogamet, bastet e ndryshme, qofshin sportive, qofshin baste normale, boksierët kanë bërë presione edhe në sallone të ndryshme makinash të cilindratave të mëdha, teksa i merrnin shumë lirë me anë të kërcënimeve dhe pastaj i rishisnin. Vlera e këtij aktiviteti kriminal shkonte në miliona euro dhe kishte filluar të shtrihej edhe jashtë Romës.

KARRIERA

Orial Kolaj u lind në Lezhë më 23 gusht të vitit 1983. Nga viti 2007 deri më 2011-ën, karriera e tij nuk është kushedi, më shumë garon në boksin amator, duke pasur më shumë humbje se sa fitore. Në 2011-ën kalon në boksin profesionist dhe ngjit shpejt shkallët e karrierës. Kolaj fiton kundër dy boksierëve më të mirë të Italisë në peshën e tij, Moreti dhe Nikoliç. Në vitin 2012 merr nënshtetësinë italiane dhe ndeshet për titullin kampion në Itali me kampionin në fuqi Danilo D'Agata. Kolaj e fiton këtë ndeshje me pikë dhe shpallet kampion i Italisë.

Por Kolaj kërkon më shumë dhe ia del mbanë. Ai ndeshet për titullin kampion të Komunitetit Europian kundër Dario Çishelos dhe e fiton atë. Më pas e mbron këtë titull kundër Tomas Adamek, teksa fiton pastër me nokaut. Kolaj po përgatitej për një tjetër ndeshje ndërkombëtare, por ende nuk ishte mësuar rivali i tij. Pas arrestimit dhe nëse ai shpallet fajtor, do t'i hiqen titujt. Mbetet për t'u parë se kush tjetër boksier shqiptar ka qenë i përfshirë në organizatën kriminale, ku 15 vetë u arrestuan dje.

(m.s/gazetashqiptare/BalkanWeb)