Sekuestrohen rreth 600 kg drogë në një trajler në Portin e Durrësit
Sekuestrohen rreth 600 kg drogë në një trajler në Portin e DurrësitDURRES - Policia kufitare e Portit të Durrësit sekuestroi mbrëmjen e sotme një sasi të konsiderueshme lëndë narkotike, të llojit kanabis sativa, në një trajler në port.
Burime nga policia bëjnë me dije se rreth 600 kg kanabis janë gjetur në tavanin e një trajleri që kishte destinacion shtetin fqinj, Italinë. Droga është gjetur pas informacioneve të siguruara nga policia në rrugë operative.
Mësohet se policia ka shoqëruar drejtuesin e trajlerit, Eduart Gjinaj, ndërsa po punon për të identifikuar persona të tjerë të përfshirë në këtë rrjet trafiku. Kjo është sasia më e madhe e drogës e kapur gjatë muajve të fundit në portin e Durrësit.
Mbrëmjen e djeshme në portin e Durrësit u sekuestruan rreth 10 kg lëndë narkotike të llojit kanabis sativa, në një automjet që po imbarkohej në traget. Droga ishte fshehur në automjetin tip ‘Citroen’ me targa DR131ZF, që drejtohej nga shtetasi Alberto Coldani, i cili u ndalua nga policia. Lënda narkotike ishte fshehur në serbatorin e makinës, ndërsa kishte destinacion Italinë.
(er.nu/BalkanWeb)
Krijoni Kontakt