Debate në Ksh. Bashkiak për kazinotë, kalon ligji pa votën e PS -
09 Tetor 2012
Debate të shumta në Këshillin Bashkiak i cili u mblodh sot, një muaj pas anulimit të mbledhjes së 6 shtatorit. Gjatë mbledhjes së sotme pritet të miratohen disa projektvendime të rëndësishme, ndër to edhe transferimi i lojërave të fatit në periferi të kryeqytetit dhe vendosjen e një takse të përkohshme ndaj lojërave të fatit, projekt- vendim i cili kaloi vetëm me 28 votat e të djathtëve, pa votën e këshilltarëve të majtë, të cilët bojkotuan.
Këshilltarët e opozitës, të cilët kanë qëndruar gjatë gjithë kohës në këmbë duke ngritur zërin ndaj kryebashkiakut Basha, këmbëngulën që ata nuk mund të tolerojnë që dera e këshillit bashkiak t’u mbyllet në fytyrë dhe institucioni i këshillit bashkiak të përdhoset sipas interesave politike të Bashës.
Këshilltarët e Partisë Socialiste janë shprehur të irrituar mbi faktin që nuk iu kërkua ndjesë për anulimin sipas tyre, pa arsye dhe asnjë shpjegim të një muaji më parë. Ata ngritën akuza ndaj kryebashkiakut Lulzim Basha, pasi sipas tyre veprimi ishte antiligjor.
Këshilltari i Partisë Socialiste, Aldrin Dalipi, tha se nuk do të bëhet asnjë votim nga ana e tyre nëse më parë nuk i kërkohet ndjesë për mos realizmin e mbledhjes së mëparshme. Sipas tij kjo është mungesë integriteti në sallën e Këshillit Bashkiak.
“As mos t’i shkojë nëpër mendje të na barazojë ne si mbrojtës të ndonjë kazinoje. Mbyllini të gjitha dhe ato 400 që janë pa leje, s’na intereson. Ajo që na intereson ne është vendosja e integriteti në këtë sallë. Në qoftë se ju jeni dakord që këshilltarëve të PS tu mbyllet dera, dhe t’i lëshohen sms 4 minuta para që shpërndahet mbledhja dhe që 3 muaj këshilli bashkiak të mos mblidhet, më vjen keq po nuk jemi dakord.”, u shpreh Dalipi.
Nga ana tjetër, kryetari i bashkisë Lulzim Basha gjatë fjalës së tij tha se projektvendimi për lojërat e fatit është mjaft i rëndësishëm ndërsa foli edhe për vendosjen e një takse të përkohshme për të nxitur më tej transferimin e tyre në periferi.
Duke iu referuar debateve të krijuara në sallë nga ana e këshilltarëve të majtë, Basha e komentoi këtë fakt si lobim politikë dhe mbrojtje të interesave të disa bizneseve dhe jo të qytetarëve.
“Sot është problem shtrirja e kazinove në lagjet e qytetit tonë. Numri i kazinove frikshëm po i afrohet numrit të shërbimeve të tjera të qytetit, siç janë furrat e bukëve. marketet e dyqanet e zarzavateve. Ftoj Këshillin t’i largohet porosive politike dhe të hedh poshtë lobimet politike, të votojë për interesin qytetar”, tha kryebashkiaku Basha.
Pavarësisht pretendimeve të këshilltarëve të majtë se anulimi i mbledhjes së datës 6 shtator ishte i paligjshëm, dhe se nuk do të votonin asnjë projekt vendim pa u kërkuar falje, projekt-vendimi për transferimin e kazinove në periferi dhe vendosjen e një takse të përkohshme ndaj lojërave të fatit, u hodh në votim dhe u miratua me 28 votat e të djathtëve, pa votën e këshilltarëve të majtë, të cilët e bojkotuan votimin.
Redaksia Online (Gre.M/Shqiptarja.com)
Krijoni Kontakt