Koalicioni LDK-PDK në Pejë zyrtarizohet pas festave
Nga Express | 29 Dhjetor 2013 21:27
PDK dhe LDK pritet të zyrtarizojnë koalicionin në Pejë në fillim të janarit. Muhamet Halitaj i PDK'së thotë kanë kërkuar t'i udhëheqin pesë drejtori. Pas Kaçanikut, kjo është lidhja e dytë mes këtyre dy partive.
Lidhja Demokratike dhe Partia Demokratike po presin vetëm përfundimin e festave të fundvitit për të lidhur koalicion për të bashkë qeverisur në Komunën e Pejës.
Ish-kandidati për Kryetar të Pejës nga PDK'ja, Muhamet Halitaj ka thënë se pas vitit të ri do të bëhet zyrtarizimi i lidhjes me LDK'në.
Ai ka thënë se aktualisht janë duke negociuar marrëveshjen për koalicion, por ende s'janë marrë vesh për ndarjen e pushtetit.
"Ne kemi kërkuar katër ose pesë drejtoritë kryesore. Do të shohim deri në fund se cilat prej drejtorive do të marrim", ka thënë Halitaj, për Express, të dielën.
"Ende nuk e kemi zyrtarizuar. Jemi në biseda dhe ende asgjë s'ka definitive. Sigurisht se pas vitit të ri do të zyrtarizohet koalicioni me LDK'në", ka shtuar ai.
Para një jave, Kryetari i ri i Pejës, Gazmend Muhaxhiri ka thënë për Express se vetëm me AAK'në nuk do të bëjnë koalcion.
"Ne i kemi opsion të gjitha partitë që janë të përfaqësuara në Asamble përveç AAK'së", kishte thënë ai.
Në zgjedhjet e fundit lokale, Gazmend Muhaxheri mori pozitën e Kryetarit të Pejës pas raundit të dytë, ku u ballafaqua me AAK'në. Ndërsa PDK në këtë qytet është renditur e treta.
Megjithëkëtë, në raundin e dytë, PDK kishte përkrahur Ali Berishën për Kryetar të Pejës. Madje, edhe Hashim Thaçi, Xhavit Haliti e Adem Grabovci patën kërkuar vota publikisht për kandidatin e AAK'së.
Krijoni Kontakt