Sherri për femrën, tentoi të vrasë një person, arrestohet kushëriri i Sokol Olldashit
DURRËS-Policia e Durrësit mundi të parandalojë sot një vrasje si dhe të shoqërojë autorin e kësaj ngjarjeje.
Sot rreth orës 13:00 në lagjen 4 të qytetit të Durrësit, një shtetas i identifikuar si Aldo Mamaqi, 23 vjec ka qëlluar me pistoletë ndaj nipit të pronarit të një lokali, por fatmirësisht ky i fundit u ka shpëtuar të shtënave. Skena u shënua brenda lokalit "Zoe Bar" ku ndodheshin dhe klientë, të cilët fatmirësisht u shpëtuan plumbave. Shërbimet e policisë kanë qenë shumë pranë ngjarjes dhe kanë ndërhyrë me shpejtësi duke vënë në pranga të riun.
Menjëherë në vendngjarje kanë shkuar forcat e policisë të cilat kanë bërë të mundur arrestimin e autorit të ngjarjes, person me disa precedentë penale të mëparshëm.
Shkak i ngjarjes mendohet të jetë sherri për një femër, ndërkohë mësohet se autori, kushëri (djalë daje) i ish-ministrit të Transporteve dhe Punëve Publike, Sokol Olldashi, njihet si person me precedent penalë.
Policia ndërkaq ka kryer shoqërimin e 6 personave si dëshmitarë në ngjarje. Në momentin e prangosjes, Mamaqi kishte lënë pistoletën në shkallët e lokalit.
(d.b/BalkanWeb)
Krijoni Kontakt