Topi jashtë Parlamentit, por FRD i heq dy mandate të djathtës
Ish-presidenti merr 10 mijë vota, por nuk e kapërcen dot pragun për një mandat në Tiranë. Të zhgënjyer nga zgjedhjet edhe AK e Kreshnik Spahiut dhe dy kandidatët e pavarur
Tiranë Ish-presidenti Bamir Topi nuk e kapërceu dot pragun që e ndante nga Kuvendi i Shqipërisë. Sfida e partisë së tij për të kandiduar e vetme mes dy blloqeve të mëdha nuk u përkthye në mandate, edhe pse arriti të mbledhë rreth 30 mijë vota në të gjithë vendin. Megjithatë, efekti i përçarjes së të djathtës ka ndikuar direkt në tri qarqe. Vetë Topi ka marrë një numër të konsiderueshëm votash në Tiranë, por rritja e pjesëmarrjes ka rritur edhe pragun për Frymën e Re Demokratike. Edhe pse vetë nuk do të jetë në Kuvend, ish-presidenti ka arritur t’i heqë një mandat PD-së në Tiranë, duke e gozhduar përfundimisht rezultatin në 19 mandate për të majtën dhe 13 për të djathtën. Në dy qarqe, në Tiranë dhe në Lezhë, FRD ka marrë aq vota sa t’i heqë mazhorancës së djathtë nga 1 mandat. Më konkretisht, në Tiranë koalicioni i djathtë ka arritur të marrë 182 030 vota, të cilat përkthehen në 13 mandate. Por këtyre votave, po t’i shtosh edhe 10 mijë votat që ka marrë FRD e Bamir Topit, koalicioni i djathtë do të arrinte të mbante mandatin e 14. Po ashtu, në qarkun e Lezhës ka ndodhur i njëjti fenomen, ku koalicioni i djathtë për vetëm pak vota ka humbur mandatin e 4. Në këtë qark, koalicioni i majtë ka marrë 39 242 vota, ndërsa koalicioni i djathtë, 38 902 vota, pra rreth 300 vota më pak. 935 votat e FRD-së në këtë qark kanë minimizuar shanset e së djathtës, e cila ka humbur në Lezhë edhe për këtë shkak. Një qark tjetër ku votat e FRD-së kanë efekt direkt në mandatet e mazhorancës është edhe ai i Kukësit. E djathta pretendon se ka marrë mandatin e tretë në këtë qark, të cilin e kërkon gjithashtu edhe kandidati i LSI-së. Efekti gërryes i partisë së Topit do t’i kishte shuar këto dilema me kohë. Një tjetër i zhgënjyer i madh i këtyre zgjedhjeve është edhe Kreshnik Spahiu i Aleancës Kuq e Zi. I pompuar mediatikisht si lider i një partie me mbështetje të madhe, Spahiu ka mundur të grumbullojë shumë më pak vota se Bamir Topi, duke arritur një përqindje të ulët në këto zgjedhje. Dy partitë jashtë koalicioneve provuan edhe një tjetër herë se ky sistem nuk i favorizon ata që kandidojnë më vete. E kundërta vlen të thuhet për partitë e vogla, të cilat kandiduan brenda koalicioneve. PDIU ka arritur të sigurojë 4 mandate në këto zgjedhje: në Tiranë, Elbasan, Fier dhe në Vlorë. Edhe Fatmir Mediu i PR-së ka arritur një shifër të mirë: tri mandate deputetësh. Në parlamentin e ri do të përfaqësohen edhe dy partitë aleate të koalicionit të majtë: PBDNJ e Vangjel Dules dhe një parti e re, për të cilën kandidonte Mark Frroku, vëllai i të akuzuarit për vrasjen e një komisari policie. Një tjetër zhgënjim në këto zgjedhje u takon dy kandidatëve të pavarur, Dritan Prifti dhe Arben Malaj. Edhe pse kanë marrë një numër të konsiderueshëm votash, asnjëri prej tyre nuk do të jetë i përfaqësuar në parlamentin e ri, që pritet të konstituohet në shtator.
FRD
29 209 vota në rang vendi
10 002 vota në Tiranë
MAPO
Krijoni Kontakt