Lirohet krimineli Ilia Basho

[Brari]

MAPO

-


Lirohet Ilia Basho: Jam pa faj, të afërmit e Elenit: Ta gjejnë kush e vrau



Tiranë Plot dy muaj e 20 ditë pasi Ilia Basho u mbyll në qeli si i dyshuar për vrasjen e bashkëshortes, prokuroria kërkon lirimin e tij me argumentin se nuk ka prova. Në një seancë larg syve të medias, prokurori i çështjes Etien Kapo i kërkoi gjyqtarit Altin Shkurtit ndryshimin e masës së sigurimit “arrest me burg”, duke kërkuar detyrim për t’u paraqitur në organet hetimore. Kjo kërkesë është argumentuar nga prokurori me faktin se nga hetimet e deritanishme nuk është provuar lidhja e Ilia Bashos me ekzekutorin e bashkëshortes së tij, Eleni Basho. Për këtë arsye, prokurori kërkoi hetimin e të dyshuarit në gjendje të lirë. Kërkesa e bërë nga prokurori u pranua nga gjyqtari Altin Shkurti, i cili 2 muaj e 20 ditë më parë vendosi të lërë në qeli Ilia Bashon si i dyshuar për organizimin e vrasjes së bashkëshortes së tij. Ilia Basho u arrestua disa javë pas vrasjes së bashkëshortes së tij, pas dëshmive që tregonin se ai kishte një lidhje jashtë martese e pas SMS-ve të shkëmbyera me të dashurën e tij. Si argument u përdor fakti se bashkëshortët Basho kishin pasur konflikte mes tyre, çka mund t’i çonin ata drejt një divorci të mundshëm. Një gjë e tillë ishte pranuar nga Basho në disa SMS që policia sekuestroi në cilësinë e provës, edhe pse përmes tyre nuk mund të provohej organizimi i një vrasjeje. Por asokohe, vetëm mbi bazën e këtyre mesazheve dhe dëshmive që konfirmonin një konflikt të mundshëm familjar, Prokuroria tha se Ilia Basho është i dyshuar si organizator për vrasjen e bashkëshortes së tij. Ndërsa dje, gati tre muaj nga kjo deklaratë, prokurori tha se nuk mund të provohet lidhja e të dyshuarit me ekzekutorin, i cili mbetet ende i paidentifikuar. I kontaktuar nga “Mapo”, avokati mbrojtës Lazër Sokoli tha se me vonesë, por drejtësia u vu në vend. “I njëjti prokuror që kërkoi arrestin e klientit tim, dje kërkoi të lirohej. I njëjti gjyqtar që vendosi masën e sigurimit “arrest me burg” dje vendosi lirimin e Ilia Bashos”- tha avokati, duke shtuar se më këtë vendim, prokuroria dhe gjykata korrektuan me vonesë vetveten. Por asnjë prej drejtuesve të prokurorisë nuk pranoi të jepte një prononcim zyrtar rreth kërkesës së djeshme, pasi 2 muaj e 20 ditë më parë, me bindje u shprehën se Basho kishte organizuar vrasjen e së shoqes. Pas vendimit të gjykatës, Ilia Basho la mesditën e djeshme qelinë dhe u kthye në shtëpinë e tij, në Shkozë të Tiranës. Eleni Basho u vra më 2 shkurt të këtij viti, pak metra larg shtëpisë së saj në Shkozë të Tiranës. Hetimet u përqendruan fillimisht tek biznesi i çiftit Basho, ndërsa më pas u zbuluan problemet në çift, për shkak të një lidhje të Ilias me një femër tjetër. Pas lirimit të bashkëshortit, prokuroria kthehet sërish në pikën zero për zbardhjen e vrasjes së Eleni Bashos. Leonard Bakillari



Ilia Basho: Jam i pafajshëm, do të

luftoj për zbardhjen e së vërtetës

Pas lirimit nga qelia, Ilia Basho thotë se gjëja e parë që do të bëjë është përqafimi i fëmijëve. “Dua që askujt tjetër në botë mos t’i ndodhë kjo që më ndodhi mua. Vetëm unë e di se çfarë padrejtësie kam pësuar në kurriz dhe çfarë vuajtjesh të padrejta…”

Intervistoi: Habjon Hasani

Pak minuta pasi ka lënë qelinë e burgut, Ilia Basho uron që “askujt të mos i ndodhë ajo që hoqi vetë në kurriz”. Ngulmon se është i pafajshëm dhe se vetëm ai i di padrejtësitë dhe vuajtjet që ka hequr në kurriz, ndërsa thotë se gjëja e parë që do të bëjë është përqafimi i dy fëmijëve. Nuk e zgjat shumë me gazetarët, duke i fajësuar ata për fatin e tij të këtyre muajve, ndërsa shton se “lufta’ e tij nuk mbaron këtu. “Dua thjesht tani të shijoj këto momente të para dhe të luftoj për zbardhjen e së vërtetës në vazhdim”,-thotë Ilia Basho për “MAPO”-n.

Zoti Basho, gjykata e Tiranës vendosi sot t’ju lironte. Si ndiheni?

Ndihem i përmalluar për fëmijët e mi dhe të afërmit. Mezi po pres të shkoj të përqafoj fëmijët e mi.
Është e njëjta gjykatë, që disa muaj më parë ju ka lënë në burg zoti Basho. Si e komentoni këtë fakt?

Nuk dua të futem në detaje apo të komentoj më tepër. Dua që askujt tjetër në botë mos t’i ndodhë kjo që më ndodhi mua. Vetëm unë e di se çfarë padrejtësie kam pësuar në kurriz dhe çfarë vuajtjesh të padrejta…
Si e cilësoni vendimin e prokurorisë, që ju la thuajse tre muaj në burg zoti Basho?

Sigurisht që ka gabuar, pasi unë jam i pafajshëm. Por nuk dua të komentoj më tepër pasi më ka mbajtur në burg edhe për shkakun tuaj.
Për shkakun tonë?

Po, po për shkak të medias, pasi është shkruar aq shumë për mua dhe më është bërë gjyqi nëpër faqe gazetash dhe jo në gjykatë. Janë mediat ato që kanë nxitur dhe deformuar gjithçka me ato që kanë shkruar.

Zoti Basho, policia dhe prokuroria nuk ka paraqitur gazetat si prova në gjykatë, por të tjera materiale që ju janë gjetur juve apo jo?

E di shumë mirë këtë gjë, por gazetat kanë luajtur një rol shumë negativ në gjithë këtë histori dhe këtë ua përsëris. Mund t’u them vetëm atë që ju thashë në fillim, që dua të shijoj momentet me fëmijët e mi, me shpresën që drejtësia do funksionojë.

Cilat janë pretendimet tuaja zoti Basho, çfarë të pavërtetash ka publikuar media??

Unë nuk preferoj të hyj në detaje dhe këto gjëra nuk kanë rëndësi. Nuk dua të hyj në detaje të gjërave, pasi janë shumë gjëra që mund të thuhen. Dua thjesht tani të shijoj këto moment të para dhe të luftoj për zbardhjen e së vërtetës në vazhdim.



Të afërmit e Elenit presin ftohtë

lirimin e Bashos: Shteti të gjejë autorin

Pak orë pas lirimit të Ilia Bashos nga burgu, familjarët e Elenit kërkojnë nga organet e hetimit të zbulojnë autorësinë e vrasjes. Të kontaktuar nga “MAPO” pas lirimit të dhëndrit të tyre, ata thotë se presin që organet shtetërore t’u thonë se kush e vrau Elenin. Ndërsa kanë qëndruar gjatë gjithë pasdites në shtëpinë e tyre, e cila është fare pranë shtëpisë së Ilia Bashos, të afërmit e Elenit thonë se në rrethanat kur Basho është lënë i lirë për mungesë provash, atëherë është detyrë e organeve hetimore zbardhja e ngjarjes. “Nëse është siç thoni ju, që prokuroria ka bërë kërkesë për arsye të pamjaftueshmërisë së provave, atëherë i bie që prokuroria dhe policia ende nuk kanë gjetur autorin. Në këto kushte, ne kërkojmë nga organet shtetërore të gjejnë autorin dhe s’kemi pse komentojmë të tjera gjëra”, u shpreh dje një i afërm në emër të familjes së Eleni Bashos. Ndërsa Ilia Basho hyri dje pasdite në shtëpinë e tij mësohet se asnjë prej të afërmve të Elenit, që jetojnë fare pak metra larg në vilën e tyre nuk ka dalë të presë apo të takojë atë. Deri në orët e vona të mbrëmjes, mes dy familjeve nuk ka pasur asnjë lloj kontakti.


MAPO