Banorët, kryesisht gratë dhe fëmijët, janë parë me valixhe në duar duke u larguar nga shtëpitë e tyre.
E marte 10 Prill 2012 9:33
Një ndjenjë e thellë e pasigurisë ka prekur shqiptarët të cilët jetojnë në lagjen e Tre Rrokaqiejve në veri të Mitrovicës.
Të lodhur nga shqetësimet dhe kërcënimet e vazhdueshme, vrasja e fqinjit duket se i dha fund durimit dhe pritjes se një ditë do të bëhet më mirë.
Banorët, kryesisht gratë dhe fëmijët, janë parë me valixhe në duar duke u larguar nga shtëpitë e tyre.
Në fakt shqiptarët, shumica e të cilëve jetojnë prapa dyerve të blinduara, thonë se kanë para vetes vetëm dy zgjidhje, mbrojtjen e pragut të shtëpisë ose braktisjen e saj njëherë e përgjithmonë.
Se këtu mbretëron urrejtja ndëretnike e tregojnë edhe muret e shkarravitura me mbishkrime nacionaliste kryesisht serbe e po kështu edhe xhamat e thyer në po thuaj secilin kat të ndërtesës.
Vetëm dy pjesëtarë policie janë parë duke patrulluar në këtë zonë të nxehtë. Ndërsa ka munguar tërësisht prezenca e KFOR-it dhe policisë së EULEX-it.
Nga ana tjetër, familjen e Selver Haradinajt e ka kapluar dhimbja e humbjes së rëndë për ta, Por përtej kësaj ata shprehin mllefin ndaj institucioneve shtetërore të cilat për 13 vjet nuk ofruan sigurinë e mjaftueshme. Këtu detyrimisht ata kujtojnë edhe kryefamiljarin e tyre të vrarë po nga forcat serbe në ditën që ishte nënshkruar marrëveshja e Kumanovës.
Teksa tregon përpjekjet e bashkëshortit për të ruajtur pragun e shtëpisë për 13 vjet me radhë, bashkëshortja e Selver Haradinajt, rrëfen tmerrin që përjetoi një natë më parë, kur derisa po flinin shpërtheu bomba që i mori jetën bashkëshortit të saj.
Rrëfimi i bashkëshortes së Selverit është i gjatë. Ajo tregon se bashkëshorti i saj ishte i papunë dhe nuk kishte probleme me askënd përveç nëse problem konsiderohet përkatësia e tij etnike. Ndërkaq edhe një ndihmë sociale që merrte nga autoritetet komunale i ishte ndërprerë në nëntor të vitit që shkoi.
Ivanoviq: KFOR dhe EULEX të ndërhyjnë
Sekretari për Kosovën në qeverinë e Serbisë, Oliver Ivanoviq ka kërkuar ndërhyrjen e KFOR-it dhe EULEX-it në veri.
Mediat serbe që citojnë Ivanoviqin, thonë se ai ka kërkuar nga trupat ndërkombëtare dhe misioni evropian që të ndërmarrin masa për normalizimin e gjendjes në veri të Mitrovicës.
“Besoj që këta përgjegjës të sigurisë do të arrijnë të sigurojnë qetësinë për qytetarët e këtij vendi”, ka thënë ai.
Ivanoviç paralajmëron se në veri mund të ndodhin edhe incidente të tjera, në rast se nuk merren masat e nevojshme. /tch/
Ku jeni ju ooo Aksh .ska met tjeter veq me dhez me vra edhe na civil serb kopa nga inati po na largojne nga vatrat tona qe 200 vite me radh po na marin tokat tona .Kosova ska burra pom doket
ma
Krijoni Kontakt