“Brenda 2012 Tirana, furnizim 24 orë me ujë”
» Dërguar më: 15/01/2012 - 16:36
Ermelinda Hoxhaj
Depozitat e ujit, të cilat gjenden me dhjetëra në çdo pallat të kryeqytetit, me fillimin e vjeshtës së këtij viti do të hiqen nga drejtoria e Ujësjellësit. Depozitat, sipas ministrit të Punëve Publike Sokol Olldashi, do të jenë të panevojshme, pasi do të arrihet furnizimi me ujë 24 orë në 24, për të gjithë qytetarët e Tiranës. Kjo deklaratë e kreut të Transporteve, është bërë gjatë inspektimit të njërës prej depove më të madha të ujit në kryeqytet, e cila ndodhet në zonën e qytetit “Studenti”.
Inspektimi
Ndërmarrja e Ujësjellës-Kanalizimeve të Tiranës do të nisë në fillim të vjeshtës së këtij viti, heqjen e depozitave të ujit nga pallatet e kryeqytetit. Në inspektimin e realizuar në njërën nga depot më të mëdha të ujit në kryeqytet, në zonën e qytetit ‘Studenti’, Olldashi u shpreh se projekti- pilot do të nisë fillimisht vetëm në një zonë të kryeqytetit. Ky projekt do të ndërmerret, pasi gjatë këtij viti Tirana do të furnizohet 24 orë me ujë pa ndërprerje dhe depozitat nuk do të jenë më të nevojshme. Sipas ministrit të Punëve Publike, ndërmarrja e Ujësjellës- Kanalizimeve të Tiranës ka kryer investime prej 600 milion lekësh, ku pjesa më e madhe, rreth 470 milionë prej tyre janë investuar nga buxheti i vetë Ujësjellësit. Të ardhurat e Ujësjellësit këtë vit pritet të jenë më të larta, kjo falë edhe rritjes së tarifës së ujit, edhe pse kjo rritje nuk është e mjaftueshme sipas drejtuesve të kësaj ndërmarrjeje. Rritja e tarifave është e konsiderueshme për xhepat e konsumatorëve, por sipas drejtorit të Ujësjellës-Kanalizimeve, në vlerë monetare nuk cënojnë buxhetet e familjeve dhe bizneseve. Vendimi i Entit Rregullator të Ujit, sipas Sahit Dollapit, krijon probleme me financat e kompanisë, pasi kostoja e shërbimit që u ofrohet konsumatorëve është më e lartë dhe se sa tarifat e reja që kanë nisur të aplikohen këtë fillim viti. “Rritja shkon rreth 27%. Tarifa e ujit të pijshëm shkon, nga 33 lekë në 45 lekë, ujë me shumicë nga 10 lekë në 12 lekë/m3, largimi i ujërave të ndotura nga 10 lekë në 11 lekë/m3. Janë ngritje jo të mëdha. E konsiderojmë jo të mjaftueshme për ndërmarrjen tonë, por është një rritje lehtë e përballueshme nga qytetarët”,- ka thënë drejtori i Ujësjellësit pak kohë më parë.
gazeta shqiptare
Krijoni Kontakt