Vret vëllanë me pushkë për një cigare
22-10-2011 16:31 CET
Xhafer Kajtazi (1970) nga fshati Dumnicë e Poshtme e Podujevës është vrarë të shtunën nga vëllai i tij, Rr. Kajtazi (1986), pas një mosmarrëveshje që ka ndodhur ndërmjet tyre.
Zëdhënësi i Policisë së Kosovës, Baki Kelani, tha se rreth orës 8:00 të mëngjesit të së shtunës njësitë policore në Podujevë e kanë marrë një informacion se në fshatin Dumnicë e Poshtme ka të shtëna me armë zjarri.
“Njësitet e Policisë kanë dalë menjëherë në vendin e ngjarjes së bashku me mjekun e Qendrës Emergjente në Podujevë dhe në vend-ngjarje kanë gjetur viktimën, i cili, sipas mjekut kujdestar, ka qenë pa shenja jete. Deri tash Policia ka arritur të kuptojë se në vendngjarje ka pasur të shtëna armësh, ku është gjetur një pushkë e gjatë 7.62 mm, me të cilën dyshohet se është kryer vrasja”, është shprehur zëdhënësi Kelani.
Sipas tij, në vendngjarje janë gjetur edhe dy gëzhoja të të njëjtit kalibër dhe dy karikatorë me 16 fishekë. ”Kufoma me urdhër të prokurorit është dërguar për obduksion, ndërsa personi i dyshuar është arrestuar pas orës 12 nga njësitet policore”, tha Kelani, raporton Koha.
Sipas burimeve të Kohës, viktima dhe i dyshuari kanë qenë vëllezër dhe të dy me të meta mentale. Ndërsa, sipas të njëjtave burime, vrasja ka ndodhur kur viktima kishte dashur ta sulmojë me një shkop vëllanë, pasi ky i fundit nuk ia kishte dhënë një cigare, kurse i dyshuari e ka qëlluar me pushkë.
zeri info
Krijoni Kontakt