Postuar më parë nga
Llapi
Në rast nevoje, policia do të ndërhyjë edhe në veri
Nga Express më 30 prill 2011 në ora 15:00
Shefi i Policisë së Kosovës, Reshat Maliqi, thotë se forcat e rendit janë duke e kontrolluar të gjithë territorin e Kosovës dhe se po punojnë maksimalisht që sa më parë të barten kompetencat ekzekutive nga misionet ndërkombëtare.
Ai ka thënë se policia është vendosur që të luftojë krimin e kontrabandën në çdo pjesë te vendit, duke përfshirë këtu edhe pjesën veriore.
Në një intervistë për Kosovapress, Maliqi ka kërcënuar të gjithë atyre që mendojnë të veprojnë në kundërshtim me ligjet e Republikës së Kosovës, se do të përballen fuqishëm me forcat e rendit. Sipas tij, edhe pse aktualisht në pjesën veriore përgjegjësi më të madhe ka misioni EULEX, në rastet kur rrezikohet jeta e qytetarëve, njësitet e Policisë së Kosovës do të reagojnë pa leje të askujt dhe do të ndalojnë veprimet kriminale.
“Edhe pse herë pas here EULEX-i deklarohet se është kompetencë e rezervuar e tyre, që ata janë përgjegjës për pjesën veriore, ne kemi një marrëveshje me ta që në vendbanimet ku kemi popullatë të përzier nuk na duhet që ne të kërkojmë ndonjë leje të posaçme prej tyre që të intervenojmë në rast se rrezikohet jeta dhe prona e qytetarëve. Në rast se kemi aktivitete të abuzimit të ligjit, kontrabandim, kemi informata të sakta se në Lagjen e Boshnjakëve dhe në Suhadoll kemi lëvizje të grupeve kriminale, që ose abuzojnë ligjin me qëllim të kontrabandimit ose rrezikohet jeta apo prona, neve nuk na duhet që të kemi ndonjë leje të posaçme që të jemi prezentë me njësitë tona të specializuara atje, por ne dalim veprojmë dhe e kryejmë punën tonë”, ka thënë ai.
Statistikat dëshmojnë se krahasuar me vitet 2009 dhe 2010, këtë vit në tremujorin e parë Policia e Kosovës ka shënuar rezultate më të mira në luftimin e korrupsionit, krimeve ekonomike dhe trafikimit të qenieve njerëzore.
Si rezultat i përmirësimeve dhe ngritjes profesionale tashmë një pjesë e kufirit të Kosovës nga kompetencat e KFOR-it ka kaluar tek Policia e Kosovës, e cila suksesshëm po kryen këtë detyrë.
Policia Kufitare po fuqizohet
Maliqi vlerëson se ky është një tregues që Policia Kufitare është duke u fuqizuar në ruajtjen e brezit kufitar dhe se pas marrjes së kompetencave në kufirin me Maqedoninë, nga muaji gusht-shtator do të merren kompetencat edhe në pjesën me Malin e Zi, mandej edhe me Serbinë.
“Me Maqedoninë ne i kemi pasur dy faza të bartjes së kompetencave dhe tani do të ndodh edhe faza e tretë e bartjes së kompetencave për kufirin mes Kosovës dhe Maqedonisë. Shpresoj se në gusht apo në shtator do të ndodh e njëjta gjë edhe në pjesën me Malin e Zi. Kurse sa i përket Serbisë, tanimë veç janë duke u zhvilluar negociata teknike mes Republikës së Kosovës dhe Serbisë. Duhet të shohim se në atë drejtim a ka ndonjë rezultat. Ne si polici kemi staf të mjaftueshëm, kemi planifikuar pajisje të mjaftueshme, trajnime për kolegët dhe jemi të gatshëm të veprojmë”, ka thënë ai.
Por pavarësisht sukseseve të shënuara në shumë fusha, drejtori i përgjithshëm i Policisë së Kosovës, Reshat Maliqi tregon se misioni EULEX edhe pse ka kërkuar asistimin e tyre, nuk ka qenë sa duhet bashkëpunues, sidomos në rastet e arrestimeve të ish-pjesëtarëve të UÇK-së dhe komandantit të stacionit në Prizren.
“Kemi kërkuar që në të ardhmen së paku të na njoftojnë, sepse ne deri më tani nuk kemi qenë pengesë e sundimit të ligjit asnjëherë dhe nuk do t’i pengojmë as në të ardhmen në rast se ekziston dëshmi e mjaftueshme që dikush ka bërë abuzim të ligjit. Së paku është korrekte, kolegiale dhe profesionale që të na njoftojmë, sepse ne kemi mundësi që në ato raste të ndihmojnë e jo të pengojmë dhe kjo është dëshmuar se edhe vetë kolegu i ka kontribuar asaj dhe ka thënë se është i gatshëm të ballafaqohet me ligjin dhe drejtësinë”, është shprehur ai.
Në këtë rast, Maliqi tha se synim kanë dhe po angazhohen që sa më parë të gjitha kompetencat ekzekutive të EULEX-it të barten te Policia e Kosovës, pasi që ky mision nuk duhet të jetë gjithmonë në Kosovë.
Kurse ristrukturimi i Policisë së Kosovës, siç thotë drejtori Maliqi do të bëhet gjatë këtij viti, sepse kështu sigurohet ngritje e efikasitetit në punë dhe implementim më i lehtë i misionit për ruajtjen e rendit dhe sigurisë.
“Unë nga fillimi kam thënë dhe them përsëri se jam kundër pozitave me ushtrues të detyrës. Ne do të kemi shumë më lehtë kur të kemi strukturën e plotë edhe për departamentet, drejtoritë regjionale dhe të fillojmë me implementimin e strukturës së re. Mirëpo për këto na duhet një periudhë kohore, sepse emërimi i komandantëve të stacioneve me ligj është i paraparë që shkon përmes një procedure që ne duhet të kemi një komunikim dhe përfshirjen e kryetarëve të komunave dhe kjo na merr disa javë derisa të kompletohet”, ka thënë ai.
Sipas tij, janë duke u bërë përpjekje maksimale që në muajin shtator të jetë gjithçka e gatshme për të filluar me procesin e gradimeve.
Ndërkaq duke komentuar incidentin që ndodhi pas ndeshjes së basketbollit, Sigal Prishtina-Bambi, drejtori Maliqi thotë se përveç dy suspendimeve edhe ndaj 5 policëve tjerë janë duke u bërë hetime dhe në të gjitha rastet ku gjendet se ka tejkalim të përdorimit të forcës do të marrim masa.
“Ne kemi nevojë, qytetarët e Kosovës kanë nevojë për një polici profesionale dhe të disiplinuar, që është për trajtim human e të barabartë të qytetarëve. Ne do të angazhohemi dhe nuk do t’i lejojmë askujt që sillet ashtu siç ka dëshirë, por sipas ligjit dhe rregullit. Ne duhet të jemi shembulli më i mirë i respektimit të ligjit”, theksoi Maliqi.
Policia e Kosovës ka mbi 8 mijë pjesëtarë, të cilëve prej muajit mars Qeveria e Kosovës u ka ngritur pagat prej 40 për qind. Drejtori Reshat Maliqi vlerëson se kjo rritje e të ardhurave për policët do të reflektohet edhe në rritjen e efikasitetit në punë. (Kosovapress)
Përgjigju Duke Cituar
Krijoni Kontakt