http://www.panorama.com.al/wp-conten...ia-235x167.jpg
Plumba kandidatit të PD për komunën e Dajtit, Kuka
Plumba kandidatit të PD për komunën e Dajtit, Kuka
e Shtunë, Prill 2nd, 2011
Kandidati i Partisë Demokratike për kryetar të komunës Dajt, Besim Kuka, i ka shpëtuar për mrekulli plumbave të një shotgani, pas një debati me mbështetësin kryesor të kundërshtarit të tij të opozitës, Kujtim Qefalia.Pronari i linjës së autobusëve të Dajtit, Ylli Hidri, ka qëlluar katër herë me armë zjarri në drejtim diagonal me Kukën, por fatmirësisht asnjë nga plumbat nuk ka goditur objektivin, duke shkuar në ajër. Ngjarja ndodhi rreth orës 21:00, pranë zyrës elektorale të komunës Dajt, tek rruga “Dalip Topi”, në afërsi të zonës së njohur si “Fresku”, në Tiranë. Besim Kuka, sapo kishte dalë nga takimi elektoral që kishte zhvilluar me banorët e komunës, kur është përballur me autorin, i cili kishte parkuar makinën përballë zyrës. Incidenti u shoqërua me armë zjarri, pas një debati mes Besim Kukës dhe Ylli Hidrit, me fyerje dhe kërcënime, derisa më pas autori nuk nguroi të shkrepte armën. Më pas ka tentuar të largohet me makinën e tij tip “Tuareg” në drejtim të malit të Dajtit, por forca të shumta policie të Komisariatit nr.4, i janë vënë në ndjekje, duke arritur ta ndalojnë në dalje të fshatit Linzë. Gjatë kontrollit në makinën e tij, policia nuk ka gjetur armën me të cilën Hidri ka qëlluar gjatë incidentit. Dyshohet se gjatë rrugës, ai mund ta ketë hedhur në greminë, në mënyrë që ta fshihte nga policia.
INCIDENTI
Kandidati demokrat për komunën e Dajtit, Besim Kuka, ka rrezikuar jetën mbrëmjen e djeshme pas një incidenti që ka pasur, menjëherë sapo ka dalë nga takimi elektoral që po zhvillonte me banorët e zonës përreth “Freskut”. Sipas burimeve nga Policia e kryeqytetit, incidenti që i ndodhi Kukës është klasifikuar si “tentativë vrasje”, pavarësisht se, për fat të mirë, asnjë nga plumbat nuk e ka goditur. Të njëjtat burime saktësuan se autori i “vrasjes së mbetur në tentativë”, Ylli Hidri, pasi ka qëlluar 4 herë me armë, është larguar nga vendi i ngjarjes me makinën e tij “Tuareg”, në drejtim të malit të Dajtit. Paraprakisht, grupi hetimor ende nuk ka zbuluar shkaqet e vërteta të konfliktit që Kuka ka pasur me Hidrin, por dyshohet se incidenti ka motive politike. Dëshmitarët në vendin e ngjarjes, të cilët janë ndodhur shumë pranë protagonistëve në momentin e incidentit, thanë që sherri mes tyre ka nisur me pyetjet “Pse më sheh?” dhe më pas është shoqëruar me fyerje, fillimisht nga Ylli Hidri dhe më pas është kundërpërgjigjur edhe Besim Kuka. Menjëherë pas debatit me tone të larta, Hidri është drejtuar tek makina e tij, e parkuar përballë zyrës elektorale të Partisë Demokratike dhe ka nxjerrë nga aty një armë tip “Shotgan”. Pa asnjë paralajmërim, duke e mbajtur armën në drejtim diagonal me Besim Kukën, Hidri ka qëlluar katër herë dhe më pas ka hipur në makinë, duke u larguar. Kandidati demokrat, Besim Kuka, garon për kryesimin e komunës së Dajtit, përballë socialistit Kujtim Qefalia.
Dibër, dy kandidatët përplasje me armë
Më 26 mars, në komunën Kala e Dodës në Dibër, ndodhi incidenti i parë që pas shpalljes së kandidatëve për zgjedhjet e 8 majit. Për shkak të një incidenti, të cilësuar nga policia e Dibrës si banal, (pas parakalimit me makinë) kandidati socialist, Bajram Himallari dhe ai i PD-së, Bujar Mahmutaj, u përplasën me armë. Himallari nxori pistoletën me leje, e cila sipas tij u shkreh pa dashje. Himallari pretendon se dhe Mahmutaj nxori një pistoletë, por që nuk u konfirmua nga policia. Hetimet vazhdojnë nga ana e Prokurorisë.
Krijoni Kontakt