Postuar më parë nga
ARIANI_TB
Selimi: Nëse Thaçi vazhdon kështu, me të do të merret drejtësia
Nga Express më 25 shkurt 2011 në ora 21:28
Të gjitha të këqijat që i kanë ndodhur Kosovës në vitet e fundit, fajtor është Hashim Thaçi deklaron deputeti i Lëvizjes Vetëvendosje, Rexhep Selimi në një intervistë për emisionin “IN pol” në “NEWSTV”, duke shtuar se nëse kryeministri vazhdon të punojë në mënyrë të tillë, me të do të merren organet e drejtësisë.
Kurse, duke folur për bisedimet e ardhme Kosovë-Serbi, deputeti Selimi ka deklaruar se do të vazhdojnë të jenë të vendosur kundër këtyre bisedimeve dhe që këto bisedime të mos ndodhin fare. Ai ka pohuar se nuk bëhet fjalë për bisedime teknike, por ato janë plotësisht politike, ngase sipas tij nuk mund të konsiderohen bisedime teknike derisa vlerësimi reciprok nuk është i tillë, por është politik.
BE-ja sipas Selimit kërkon bisedime për integrimin e Serbisë, e jo për Kosovën dhe ky skenar i bisedimeve është kundër Kosovës, kundër sovranitetit të Kosovës dhe është vetëm në të mirë të Serbisë.
Selimi ka vlerësuar se është edhe më shqetësuese fshehja e skenarëve të bisedimeve, sepse sipas tij deri më tani askush nuk ka shpjeguar asgjë për agjendën e bisedimeve.
Sipas Rexhep Selimit, këmbëngulja e qeverisë për të filluar negociatat me Serbinë është shumë shqetësuese, sepse paraqet një pazar të vjetër për një të ardhme të dëmshme për Kosovën.
Ndërkaq, i pyetur për seancën e Kuvendit, ku është zgjedhur presidenti dhe qeveria e re e vendit, Selimi ka deklaruar se ka qenë një gjellë e gatuar në dëm të vendit dhe interes i dy personave. Ai e ka quajtur presidentin Pacolli president të sms-ve, ndërsa qeverinë, qeveri e pakicës dhe ka theksuar se këto institucione të dala në mënyrë të dhunshme, kanë prapaskena mafioze.
Selimi po ashtu ka deklaruar se kryeparlamentari Krasniqi, gjatë seancës së Kuvendit, nuk ka arritur t’i bëjë ballë presionit të Hashim Thaçit për të manipuluar procesin e zgjedhjes së presidentit dhe qeverisë.
Ndër të tjera, ai ka deklaruar se do të jenë këmbëngulës që të ndryshojnë Kushtetutën.
Ai ka pohuar se duhet të kthehen simbolet kombëtare në institucionet e Kosovës, sepse këto simbole të Kosovës nuk janë tonat dhe nuk i njohim si të tilla.
Ndërsa, si zgjedhje të problemeve, Selimi nuk e përjashton mundësinë që të organizohen protesta, duke pohuar se “njëra nga rrugët e zgjidhjes, është vetë rruga”.
Krijoni Kontakt