Kryetari i Partisë Socialiste, Edi Rama, po tenton të interferojë situatën politike në vend me procesin e liberalizimit të vizave, duke lobuar me anë të një eurodeputeti në Parlamentin Evropian për të ngrirë lëvizjen e lirë të shqiptarëve në hapësirën Shengen. Eurodeputeti rumun, Viktor Boshtinaru është njeriu, i cili është kontraktuar nga Rama për të kërkuar nga Parlamenti Evropian bllokimin e lëvizjes së lirë, duke tentuar nxjerrjen e Shqipërisë nga lista e vendeve që udhëtojnë pa viza në zonën Shengen. Pas dështimit të lobimit për bllokimin e procesit të heqjes së vizave, Rama nuk tërhiqet nga qëllimi i tij për të penguar shqiptarët që të lëvizin lirshëm në zonën Shengen. Ai ka nisur një fushatë të re lobimi duke hapur thesin e parave të përfituara nga korrupsioni me lejet e ndërtimit dhe për të paguar njerëz që të bërtasin në Bruksel dhe Strasburg për të kërkuar bllokimin e heqjes së vizave për shqiptarët. Pas organizmit të protestës së dhunshme më 21 janar, ku humbën jetën katër persona dhe qindra të tjerë u plagosën, mes tyre dhe efektiva të policisë, Edi Rama po infiltron eurodeputetin Boshtinaru që të përdorë në PE situatën e krijuar politike si motiv për të pezulluar vendimin e BE, në mënyrë që për shqiptarët të rikthehet sërish regjimi i vizave. I nxitur nga Edi Rama, Boshtinaru, është i vetmi eurodeputet i cili ka reaguar mjaft i ashpër në të gjitha diskutimet e komisioneve të Parlamentit Evropian lidhur me heqjen e vizave për Shqipërinë para 15 dhjetorit të 2011, datë në të cilën BE vendosi unanimisht rrëzimin e murit Shengen për shqiptarët. Madje në seanca të caktuara të PE, ku të pranishëm kanë qenë edhe përfaqësues nga pala shqiptare, deputeti socialist Taulant Balla ka kërkuar nga Boshtinaru ngritjen e zërit kundër liberalizimit të vizave për shqiptarët, nën argumentin se ende nuk është zgjidhur ngërçi politik, ndërkohë që kjo e fundit nuk përfshihej në kriteret e komisionit për regjimin pa viza. E njëjta situatë është përsëritur edhe në ditën kur PE do të miratonte vendimin, ku Boshtinaru i porositur nga Rama ka bërë të pamundurën që qëndrimin kundër heqjes së vizave për shqiptarët ta kërkonte edhe nga eurodeputetë të tjerë. Por, megjithë përpjekjet e Ramës nga Tirana në Bruksel, për të bllokuar këtë proces, Parlamenti Evropian miratoi me një shumicë absolute prej 538 votash pro lëvizjes së lirë të shqiptarëve. Edhe në prag të vendimit që do të merrnin ministrat e Brendshëm të BE për këtë proces, Rama nisi drejt Brukselit një delegacion me deputetë të PS, të cilët pikërisht kur autoritetet e larta të BE njëzëri vlerësonin përmbushjen e të gjitha kushteve nga qeveria shqiptare, ngrinin shqetësime artificiale mbi gjoja krizë politike në vend, rritje të kriminalitetit apo korrupsionit. Përgjigjen më të mirë, për të gjitha tentativat për të bllokuar vizat, Rama e mori nga të gjitha strukturat më të larta evropiane, Parlamenti, Komisioni si dhe Bashkimi Evropian, të cilat me votë unanime konstatuan përmbushjen e të gjitha kritereve të udhërrëfyesit për këtë proces.
Burimi: Partia Demokratike e Shqiperise
Krijoni Kontakt