Aktivistë të LDK’së janë përleshur fizikisht mes vete gjatë një tubimi elektoral të kësaj partie mbrëmjen e së shtunës. Incidenti ndodhi kur dy persona fyen Ismet Beqirin derisa ai po fliste para masës. Të irrituar, simpatizantë të Sekretarit të Përgjithshëm sulmuan dy të rinjtë duke u shkaktuar atyre plagë serioze. Ata po kurohen në QKU. Policia tha se ka nisur hetimet për këtë rast.
Nga Express më 05 dhjetor 2010 në ora 12:10
Aktivistë të Lidhjes Demokratike të Kosovës janë përleshur fizikisht të shtunën mbrëma në shkollën fillore “Hilmi Rakovica” në rrugën Vëllezërit Fazliu në Prishtinë gjatë një tubimi elektoral të kësaj partie.
Burime të Express thonë se incidenti ndodhi pikërisht në çastin kur para masës ka dalë Ismet Beqiri, Sekretar i Përgjithshëm i LDK’së.
Një zyrtar i LDK’së, në kushte anonimiteti, tha se dy persona nga turma kanë filluar ta fyejnë z.Beqiri dhe më këtë rast simpatizantë të Sekretarit të Përgjithshëm kanë filluar t’i grushtojnë ata.
“Në rrahje janë përfshirë shumë persona. Tubimi është ndërprerë dhe dy djem janë dërguar me urgjencë në QKU si pasojë e plagëve të marra”, ka thënë për gazetën zyrtari i LDK’së që foli në kushte anonimiteti.
Incidenti është konfirmuar edhe nga Policia e Kosovës.
Baki Kelani, Zëdhënës i Policisë, tha se rasti është në procedurë e sipër dhe vetëm gjatë ditës së diel mund të merren informacione më të sakta rreth këtij incidenti.
“Rreth orës 19:00 kemi marrë një informatë se në rrugën Vëllezërit Fazliu dy persona kanë marrë goditje nga disa persona të tjerë dhe janë dërguar në emergjencë në QKU. Ne i kemi dërguar njësitet tona në terren për të marrë vesh se për çfarë bëhet fjalë. Tash për tash nuk mund të them asgjë më tepër”, ka thënë Kelani, për Express.
Ky është incidenti më i madh gjatë fushatës së sivjetshme për zgjedhjet nacionale.
Gazeta Express ka tentuar të kontaktojë me Ismet Beqirin, apo me zyrtarë tjerë të LDK’së të pranishëm në këtë tubim, por kjo ka qenë e pamundur.
Krijoni Kontakt