Postuar më parë nga
Edvin83
Ligji për plehrat, PS: Po i hapet rrugë mafies italiane
2011-09-23
Gazeta Shqip
Opozita e kontestoi fuqishëm ligjin e paraqitur nga ana e mazhorancës “Për menaxhimin e integruar të mbetjeve”, duke deklaruar se kjo gjë i hap rrugën mafies së plehrave në Shqipëri. Për më se katër orë mazhoranca dhe opozita janë përplasur në lidhje me këtë draft të qeverisë, ku importimi i mbetjeve të rrezikshme në vendin tonë, sipas deputetëve të opozitës, është e pakontrollueshme nga shteti shqiptar. Socialisti Taulant Balla u shpreh se projektligji është i porositur nga interesa mafioze prej vendeve të tjera që duan medoemos që të ndërtojnë në Shqipëri impiante të përpunimit dhe të groposin plehrat e tyre. "Sipas projektit Skorja, volumi i dytë i hartuar nga Agjencia Rajonale për Parandalimin dhe Mbrojtjen e Ambientit, me qendër në Pulja, Shqipërisë i duhen shumë impiante jo vetëm për plehrat e veta, por edhe për plehrat e Europës. Në këtë raport thuhet që në planet e parashikuara, të konsultuara me qeverinë shqiptare, janë këto ndërmarrje të mëdha, për ndërtimin e vendpërpunimit të plehrave. Si vende përpunimi janë Vlora, Elbasani, Berati, Gjirokastra, me vlerë totale 120 milionë euro", tha Balla.
Sipas tij, “të dhënat e “Wikileaks” tregojnë ndër të tjera edhe se çfarë ka shkruar konsulli amerikan në Napoli. ‘Camorra dhe Ndrangheta, sytë për plehrat i kanë nga Shqipëria, sepse në Shqipëri po miratohet një pr/ligj për trajtimin e mbetjeve të ngurta dhe se qeveria shqiptare po i hap dyert këtij projekti’. Konsulli i shkruan Departamentit të Shtetit që të merren masa, që të njoftohet qeveria shqiptare për këtë rrezik që i kanoset nga dy grupet më të mëdha mafioze në Itali", tha Balla. Ligji u votua me 68 vota pro dhe 55 vota kundër nga ana e opozitës.
Krijoni Kontakt