Të ndërprehet provokimi i ndjenjave fetare të qytetarëve
Partia e Drejtësisë kërkon në mënyrë të përsëritur shfuqizimin e Udhëzimit Administrativ 7/2009 të Ministrisë së Arsimit, Shkencës dhe Teknologjisë respektivisht paragrafit 13 të Nenit 4
Partia e Drejtësisë kërkon në mënyrë të përsëritur shfuqizimin e Udhëzimit Administrativ 7/2009 të Ministrisë së Arsimit, Shkencës dhe Teknologjisë respektivisht paragrafit 13 të Nenit 4, që kodifikon ndalesën e përdorimit të uniformës fetare në shkolla dhe shërben si bazë ligjore për nxjerrjen e Rregulloreve me përmbajtje të ngjashme jokushtetuese në komunat e Kosovës. Ky formulim i padefinuar dhe tendencioz juridik lejon për të kuptuar ndalesën e bartjes së mbulesës në kokë për nxënëset dhe mësimdhënëset e besimit Islam, që është në kundërshtim të plotë me konventat relevante ndërkombëtare dhe Kushtetutën e Republikës së Kosovës, të cilat garantojnë manifestimin e lirë të identitetit fetar për çdo qytetar të vendit.
Partia e Drejtësisë kërkon nga Qeveria e Kosovës që të ndërprehet provokimi i mëtutjeshëm i ndjenjave fetare të qytetarëve dhe me këtë të ndërprehet polarizimi i shoqërisë Kosovare në baza fetare, që është plotësisht i panevojshëm dhe shumë i dëmshëm për të ardhmen e vendit.
Partia e Drejtësisë e konsideron protestën e organizuar të premten nga njëzet organizata joqeveritare si shprehje demokratike të pakënaqësisë përkitazi me këtë çështje. Njëkohësisht, tërhjekim vëmendjen se protestat e përmasave të ngjashme në të ardhmen hapin mundësi për ngjyrime të cilat nuk përkojnë me interesat shtetërore të vendit. Në këtë drejtim Partia e Drejtësisë kërkon veprim energjik të Kryeministrit të vendit dhe shfuqizimin e menjëhershëm të udhëzimit të sipërpërmendur administrativ në pajtim me Deklaratën Universale për të Drejtat e Njeriut, Konventën Evropiane për Mbrojtjen e të Drejtave dhe Lirive Themelore të Njeriut dhe Protokollet e saj; Konventën për Eliminimin e të Gjitha Formave të Diskriminimit kundër Femrës; dhe Kushtetutën e Republikës së Kosovës; duke e pasur parasysh edhe vendimin e Kuvendit të Republikës së Shqipërisë, që me ligj e ka sanksionuar përdorimin e lirë të mbulesës nga ana e nxënëseve si pjesë esenciale e identitetit të tyre fetar.
KUNDËR FORMIMIT TË TRUPAVE POLITIK JASHT – INSTITUCIONAL QË HAPIN RRUGË PËR BISEDIME DHE MARRËVESHJE TË PAPRANUESHME POLITIKE
Siç e ka theksuar edhe më parë, Partia e Drejtësisë konsideron se bisedimet Kosovë – Serbi duhet të zhvillohen si bisedime ndërmjet dy shteteve fqinje në bazë të parimit të reciprocitetit të plotë, pavarësisht nga fakti se shteti Serb do të tentojë që këtyre bisedimeve tu jep ngjyrime të theksuara politike. Mbështetur në këtë qëndrim PD konsideron se nuk ka nevojë që në Kosovë të formohen trupa jashtë-institucional politik në emër të unifikimit të faktorit politik Shqiptarë sepse me këtë do të dëmtohet rëndë rendi kushtetues i vendit dhe shteti i Kosovës do të kthehet prapa në fazën para miratimit të Kushtetutës dhe shpalljes së pavarësisë së vendit. Faktori politik Shqiptar nuk guxon të lejojë që për shkak të interesave të politikës ditore të anashkalohen institucionet e vendit dhe të cenohen interesat shtetërore të vendit. Kuvendi i Kosovës duhet të sigurojë që çfarëdo bisedime ndërmjet Kosovës dhe Serbisë të zhvillohen në bazë të parimit të reciprocitetit të plotë përkitazi me të drejtat e Shqiptarëve në Republikën e Serbisë dhe të drejtave të Serbëve në Republikën e Kosovës, dhe që ato të udhëhiqen nga përfaqësuesit legjitim të institucioneve të vendit dhe jo nga çfarëdo trupi ad-hoc politik pa marr parasysh përbërjen e tij. Në rast se në çfarëdo mënyre kontestohet legjitimiteti i institucioneve të vendit atëherë para çfarëdo bisedimi me shtetin e Serbisë duhet të mbahen zgjedhjet e lira parlamentare dhe legjitimimi i institucioneve të reja të vendit. Partia e Drejtësisë konsideron se formimi i trupave jokushtetues ad-hoc politik, që do të jenë në funksion ekskluziv të bisedimeve me shtetin Serb do të dëmtojë rëndë çështjen kombëtare Shqiptare dhe interesat shtetërore të Kosovës. /mesazhi/
Krijoni Kontakt