Serbi,zbulohet varri masiv me trupat e 259 shqiptareve

[Dardania antike]

Serbi, zbulohet varri masiv me trupat e 250 shqiptarëve
» Dërguar më: 11/05/2010 - 14:18

Shkruan gazeta shqiptare.






BEOGRAD Serbia njoftoi dje se ka zbuluar një varrezë masive, ku ndodhen trupat e 250 shqiptarëve të vrarë gjatë konfliktit të viteve '90 në Kosovë. Lajmi është publikuar dje në mëngjes nga agjencia italiane e lajmeve ANSA e më pas edhe nga agjencitë e tjera të lajmeve. Zyra e Prokurorit të Serbisë për Krime Lufte thotë se EULEX-i e kishte njoftuar atë për zbulimin e varrit në qytetin Rashkë, në jugperëndim të Serbisë, pranë kufirit me Kosovën. Zyrtarët njoftuan se nxjerrja e eshtrave pritej të fillonte pas disa ditësh. Viktimat besohet se janë vrarë gjatë konfliktit 1998-1999, kur trupat serbe luftuan me kryengritësit shqiptarë të Kosovës. Zona ku u zbulua varri, besohej se fshihte një varr masiv dhe hetuesit e kishin kontrolluar këtë zonë dy vjet më parë, por pa rezultat. Prokurori Vla-dimir Vukçeviç tha se zbulimi i varrit ishte një shenjë se Serbia ishte e angazhuar të përballej me historinë e vet. Korrespondentja e BBC-së që ndodhet në Rashkë, tregon se për momentin në zonë asgjë nuk është siguruar. "Nuk ekzistojnë ato shiritat e policisë ose që policia të sigurojë vendin. Thjesht, vendi duket si në çdo ditë tjetër të zakonshme kur kalohet këtu. E vetmja gjë që punëtorët më thanë jo zyrtarisht, është se në afërsi të këtij lokaliteti edhe para tre vjetësh janë bërë disa hetime, janë kërkuar varreza masive, por se nuk ishte gjetur asgjë. Edhe për këtë herë thonë se ende nuk dinë asgjë konkrete e as se janë ata që duhet të dinë diçka". Nuk është hera e parë që varre masive të kohës së konfliktit gjenden në Serbi. Trupat e më shumë se 800 shqiptarëve të Kosovës u gjetën në disa vende në Serbi në vitin 2001, përfshirë edhe rajone të policisë. Zyrtarë të misionit EULEX thonë se çështja e krimeve të luftës është një ndër prioritetet e punës së misionit EULEX, posaçërisht në zbulimin e trupave të personave të zhdukur gjatë konfliktit të vitit 1998-1999. EULEX-i beson se bashkëpunimi rajonal jo vetëm me Serbinë, por edhe me aktorët e tjerë rajonalë është thelbësor në përpjekjet për të zgjidhur çështjet që ndikojnë në jetën e shumë njerëzve të komuniteteve të ndryshme. Sipas statistikave të institucioneve në Kosovë, rreth 1800 shqiptarë të Kosovës akoma figurojnë të zhdukur që nga lufta e fundit në këtë vend.

[Dardania antike]

Eshte turp qe kerkohen prap negociata.