Së shpejti aktakuza e dytë në “rastin Bllaca”
21-06-2011
Së shpejti do të ketë një aktakuzë tjetër në “rastin Bllaca”. Kështu kanë deklaruar zyrtarë të misionit të BE-së për sundim të ligjit në Kosovë (EULEX), pa saktësuar se kundër kujt do të ngrihet kjo aktakuzë, kur dihet që dëshmitari bashkëpunëtor i vetëquajturi kriminel Nazim Bllaca, në paraqitjet e tij publike ka përmendur shumë emra.
“Për rastin Bllaca ka një aktakuzë të ngritur. Shumë shpejt do finalizohet aktakuza e dytë”, ka thënë Blerim Krasniqi, zëdhënës i EULEX-it. Me gjithë përpjekjet e gazetës, ka qenë e pamundur të kuptohet se kundër kujt do të ngrihet kjo aktakuzë.
Në Zyrën për Informim të EULEX-it, kanë thënë se këto janë përgjigjet që i kanë marrë nga prokuroria dhe ata (prokuroria) nuk kanë përmendur emra.
Por, këtë përgjigje nga EULEX-i mediet e kanë marrë që nga nëntori i vitit të kaluar. Në atë kohë, pasi ishte ngritur aktakuza e parë, zyrtarë të EULEX-it patën thënë se aktakuza e dytë pritet të ngrihet së shpejti.
Atëherë thuhej se aktakuza e dytë do të paraqitet kundër dy të pandehurve dhe se është në lidhje me krimin e organizuar.
Prokuroria Speciale e Kosovës, në fundvitin e kaluar ka ngritur aktakuzë ndaj dy personave që i ka përmendur Nazim Bllaca, Fahredin Gashit e Hysri Ramës. Ndaj këtyre dy personave po zhvillohet procesi gjyqësor dhe dëshmitari kryesor, Nazim Bllaca, ka dëshmuar në shtatë seanca. Në këto seanca ai ka përmendur shumë emra, pa anashkaluar kurrë Azem Sylën, të cilin e ka quajtur ish-shef të Shërbimit Informativ të Kosovës, tash deputet i Kuvendit të Kosovës nga radhët e PDK-së.
Njeriu i dytë që Bllaca e ka përmendur më shumë në këto seanca është edhe Shpresim Uka. Vetë Azem Syla, vitin e kaluar kur është paraqitur në Prokurorinë Speciale të Kosovës për të dhënë deklaratë, pati thënë se ai nuk ka të bëjë asgjë me “rastin Bllaca”, dhe se nuk e njeh fare këtë njeri.
Veç Azem Sylës e Shpresim Ukës, Bllaca ka përmendur emrat e deputetit Fatmir Limaj, Driton Hajdarit, Ekrem Jasharit, Shaban Sylës, Bekim Sylës, Sadik Abazit... Cak i vrasjeve, apo vrasjeve që kanë mbetur në tentativë, sipas Bllacës, kanë qenë shumë persona, në mesin e të cilëve edhe disa zyrtarë të LDK-së.
Tash për tash dy persona po përgjigjen për një vrasje që është kryer më 1999, njëri që e ka kryer atë e tjetri që i ka ndihmuar atij për të shmangur zbulimin.
Fahredin Gashi (1969) i njohur me nofkën “Faruk”, akuzohet për krime lufte kundër popullatës civile, sepse në bashkëveprim me Nazim Bllacën i deklaruar dëshmitar bashkëpunues nga Gjykata e Qarkut në Prishtinë, në cilësinë e pjesëtarëve të UÇK-së kanë hyrë në shtëpinë e Salih Gashit dhe e kanë vrarë atë, duke e qëlluar me armë automatike në Varigovc të Lipjanit, më 15 qershor të vitit 1999.
Hysri Rama (1973) i njohur me nofkën “Hysi” akuzohet për dhënie të ndihmës kryesve pas kryerjes së veprave penale. Ai akuzohet se i ka ndihmuar Fahredin Gashit për të shmangur zbulimin, duke ia dhënë babait të Fahredin Gashit një deklaratë të nënshkruar, në të cilën i pandehuri në mënyrë të falsifikuar ka thënë se Nazim Bllaca më 2009 i kishte thënë atij se Fahredin Gashi nuk kishte të bënte asgjë me vrasjen e Salih Gashit dhe se Bllaca do ta akuzonte Gashin vetëm për të nxjerrë para prej tij dhe duke e konfirmuar përmbajtjen e deklaratës së tillë të shkruar me dorë para prokurorit kur është dëgjuar si dëshmitar në Prishtinë, më 29 tetor 2010.
Krijoni Kontakt