Ajo, vetëm ajo!

[mondishall]

Madam Bavari

Nuk di pse më dashke, madam Bavari
Me Bavarinë madam, sa pak më ngjet
Mos prit të jem një Flober në poezi
Kurrë s’kam thënë, jam Mondi poet.

Ti prapë ngulmon, madam Bavari
Më pret diku, takimit të fshehtë
Floberi i gjorë s’kish’ aq fantazi
Ku dinte ai, ç’domethënë internet.

Naivi Flober, paska qenë me fat
Me fat ka qenë, e them sinqerisht
Si do krijonte Bavarinë madam
Me epshet e zjarrta, në trup e në shpirt?

Çfarë po më thua, madam Bavari
Të ardhka keq, për fatin e shkuar?
S’do kishte një Flober, pa fundin tragjik
Sikurse një dashuri, pa realen provuar.

Nuk di pse më dashke, madam Bavari
S’jam Floberi modern, jam Mondi klasik.

@Edmond Shallvari

[mondishall]

Tek ty janë gjithë femrat

Tek ty janë gjithë femrat
Gjithë variantet janë tek ty
Kësaj bote për ty erdha
Lindur, shuar, si një yll.

Unë e di që je xheloze
Brenda vetes me të gjitha
Në orgji veten tregoje
Që mbi to je më e mira.

Dhe në vafsha me të tjera
Eshtë thjesht një iluzion
Një orbitë ka kometa
Gjithësisë ku kalon.

Je orbitë, jam kometë
Më ndez zjarrin e vërtetë.

@Edmond Shallvari