AAK në përgatitje të padisë ndaj presidentit Sejdiu
Aleanca për Ardhmërinë e Kosovës, njëra ndër partitë opozitare, është duke vazhduar përpjekjet për ta kundërshtuar vendimin e kryetarit të vendit, Fatmir Sejdiu, rreth mosmbajtjes së zgjedhjeve parlamentare.
Kryetari i AAK-së, Ramush Haradinaj, tha se një grup ekspertësh po punon për përgatitjen e padisë, të cilën do ta kenë të gatshme para se të formohet Gjykata Kushtetuese.
Ai shprehu shqetësim rreth zvarritjes së formimit të kësaj gjykate, por theksoi se deri në qershor presin një përgjigje rreth padisë së tyre.
Haradinaj bëri të ditur se kanë shprehur mospajtim edhe ndaj përkrahjes që shefi i Zyrës Civile ndërkombëtare, Piter Faith i ka dhënë vendimit të kryetarit Sejdiu dhe këtë çështje e kanë ngritur në nivel të Grupit Drejtues Ndërkombëtar për Kosovën, të cilin e udhëheq vet Faith.
Ndryshe, kreu i AAK-së, mbajti sot takim me drejtorin për Ballkanin Perëndimor në Ministrinë e jashtme të Norvegjisë, Nilis Ragnar Kamsvag dhe të ngarkuarin me punë në Ambasadën Norvegjeze në Prishtinë, Svere Johan Kvale, me të cilët diskutoi për gjendjen në vend dhe ndihmën që Norvegjia ka dhënë dhe do të japë për Kosovën. /rtk/
Krijoni Kontakt