Gilmana Bushati
Marrëveshjet me komunitetet fetare, të cilat do të rregullojnë marrëdhëniet mes shtetit dhe tre besimeve fetare, mysliman, ortodoks dhe bektashinj, që u miratuan dje në parim në mbledhjen e radhës së qeverisë, përplasin dy dikastere. Ministria e Kulturës, e cila i ka përgatitur këto marrëveshje në bashkëpunim me komunitetet fetare përkatëse, debaton në distancë me Ministrinë e Drejtësisë, për çështjen e pronave të komuniteteve. Ndërsa Pango kërkon që kthimi dhe kompensimi i pronave të komuniteteve fetare të shihet me “përparësi”, Alibeaj nga ana e tij, kërkon që edhe komunitetet fetare t’i nënshtrohen ligjit “Për kthimin dhe kompensimin e pronave”, njësoj si qytetarët e tjerë. Por, përgjigja e Pangos ndaj kësaj vërejtjeje të Alibeajt, duhet thënë, një nga të shumtat, është e qartë, “nuk është reflektuar gjithashtu edhe pika 2 e nenit 22 të marrëveshjeve të lidhura me trajtimin me përparësi të kërkesave të pronësisë, të paraqitura nga komunitetet fetare.
Kjo u arsyetua nga grupi i punës së hartimit të këtyre marrëveshjeve, se është qëndrim politik, i cili duhet të diskutohet nga Këshilli i Ministrave”. Ndërsa në dokumentin e marrëveshjes nuk bëhet e qartë se kush është ky grup pune dhe cili është ai institucion që merr “një qëndrim politik”, grupi i punës që është marrë me hartimin e marrëveshjeve, që në të gjitha rastet është në nivel teknik, Ministria e Kulturës apo Këshilli i Ministrave? Duke u bazuar pikërisht në të drejtën kushtetuese për të gëzuar pronën, Alibeaj thekson në dokumentin e tij shoqërues se, “për sa i takon trajtimit me përparësi të kërkesave të depozituara pranë Komisionit të Kthimit dhe Kompensimit të Pronave, nuk parashtrohen arsyet se përse duhet bërë një trajtim i tillë diskriminues përkundrejt të gjitha subjekteve të tjera të ligjit “Për kthimin dhe kompensimin e pronave”. Ndërsa për komunitetin ortodoks, Alibeaj shprehet se, “jemi të mendimit që të gjitha objektet për të cilat
Kisha Ortodokse Autoqefale e Shqipërisë ka pretendime pronësie mbi to, të trajtohen sipas legjislacionit në fuqi për kthimin dhe kompensimin e pronave ish-pronarëve”. Marrëveshja me komunitetin mysliman thekson se “Komuniteti Mysliman i Shqipërisë rinjihet sipas kësaj marrëveshjeje, si trashëgimtar i pronave përkatëse të tij”. Edhe këtë pikë e kundërshton Alibeaj, pasi shprehet se, “nuk sqarohet përse shteti duhet të njohë si trashëgimtarë të vetëm Komunitetin Mysliman të Shqipërisë, dhe jo një tjetër person juridik që praktikon të njëjtën fe”.
Krijoni Kontakt