SULMI ME BOMBE TE TELEKOMANDUAR
Pejë, atentat dëshmitarit në gjyqin ndaj UÇK-së
Atentat dëshmitarit kryesor të gjyqit kundër krerëve të lartë të UÇK-së. Ngjarja ndodhi paraditen e djeshme në Pejë, kur një bombë shpërtheu në makinën e Ramiz Muriqit, dëshmitar i rëndësishëm në gjyqin kundër Grupit të Dukagjinit dhe aktivist i Lidhjes Demokratike ë Kosovës. Sipas agjencisë së lajmeve ANSA, bomba e telekomanduar në distancë shpertheu sapo Muriqi nisi makinën e tij në një rrugë qendrore të Pejës. Makina e blinduar e ka shpëtuar nga vdekja personin nën shënjestër. Pavarësisht kësaj, Qendra Informative e Kosovës njofton se Muriqi është plagosur lehtë në këtë sulm, ndërsa pjesa e përparme e makinës është dëmtuar plotësisht. Zëdhënësi i UNMIK-ut, Andrea Anxheli, nuk ka bërë të ditura detajet e këtij atentati, por burime të tjera hetimore e kanë lidhur atë me faktin se ishte dëshmitar kyç i gjyqit kundër Grupit të Dukagjinit, i dënuar për krime kundër popullsisë lokale gjatë luftës në Kosovë. Burimet kanë bërë të ditur se Muriqi ka qenë vite më parë komandant i FARK-ut, lëvizje guerilase që ishte kundërshtare e Ushtrisë Çlirimtare të Kosovës. Lider i grupit guerilas që kundërshtonte autoritetin e UÇK-së në Kosovë, Muriqi u bë një ndër dëshmitarët kryesorë në gjyqin kundër ish-krerëve të UÇK-së. Ky ishte atentati i tretë kundër tij që pas përfundimit të konfliktit të vitit 1999 në Kosovë. Edhe në dy atentatet e tjera të organizuara nga persona ende të paidentifikuar, Muriqi i ka shpëtuar për pak vdekjes. Gjyqet kundër ish-krerëve të UÇK-së të zhvilluara kohët e fundit në Kosovë, kanë nxitur reagimet e ashpra të kosovarëve. Vetëm pak kohë pas dënimit të disa krerëve të UÇK-së, shpërthime të forta ndodhën pranë Gjykatës së Prishtinës, si dhe në Pejë e Mitrovicë. Sipas UNMIK-ut, këto sulme dyshohej të kishin lidhje me indinjatën ndaj dënimit të krerëve të Ushtrisë Çlirimtare të Kosovës.
Dëshmoi edhe në gjyqin kundër Daut Haradinajt
Ramiz Muriqi kishte dëshmuar kohë më parë në gjyqin kundër Daut Haradinajt, vëlla i kreut të Partisë për Ardhmërinë e Kosovës, Ramush Haradinaj. Vëllai i politikanit kosovar bënte pjesë në Grupin e Dukagjinit, një grup liderësh të Ushtrisë Çlirimtare të Kosovës. Ish-luftëtarët e UÇK-së u dënuan për krime kundër popullsisë lokale. Kjo gjë nxiti indinjatën e shumë kosovarëve, si dhe një sërë atentatesh kundër institucioneve të drejtësisë në mjaft qytete të Kosovës.(G.Shqiptare)
...........
mani
Krijoni Kontakt