Shkruani edhe ju historinë...

[Brari]

Historia kur lexohet mbas 300 ose 3000 vitesh e shkruar nga ndonje plakush qe rremon mbi flete te zverdhura a mbi gure te nxjerre nga toka eshte e bukur natyrisht por sa gram te verteta ka aty.

Le te shkruajme dhe ne copeza historie qe na i kane pare syte ose qe na i kane treguar shoket tone.

Kemi nevoje dhe per Historine e re qe te mos fleje ne syndyqet e Kujtese se Njerzve.

Ja psh pak histori moderne nga Gazeta Shqiptare...


----

HISTORIA E PANJOHUR E VITIT 1997

Ziu, i zoti i kadillakut të Dardhës
Pronari i "Espanja" solli makinën e frikshme në Berat


--------------------------------------------------------------------------------

Ferdinand Dervishi

Kjo mbase është një histori që nuk do të shkruhej kurrë. Por duket se ata që vazhdojnë të jetojnë, në momente të ndryshme të veprimtarisë së tyre riciklojnë në vëmendjen e të tjerëve edhe të vdekurit. Roland Ziu, pronari i bar-restorant "Espanja" i vënë në shënjestër për tu vjedhur nga policët e RENEA, në vitin 1997 posedonte një autoveturë luksoze, kadillak, të prodhimit amerikan, të cilën ia mori më forcë kryekrimineli i Beratit, Altin Dardha. Ish-emigrant ekonomik në Zvicër e më pas në Spanjë, Ziu kishte sjellë prej andej autoveturën, që sipas një gare të pashpallur të të rinjve jo vetëm të asaj kohe, nuk e kishte askush në Shqipëri. Ishte një automobil fare i ri i markës kadillak i prodhimit amerikan, i gjatë, i kuq, zhurma e motorit të të cilit nuk ndihej. Makina, me të filluar viti i mbrapshtë për shqiptarët e brendakufijve, ishte murosur nga i zoti në një nga kapanonet e një pularie në pronësi të tij, që ndodhej në periferi të Beratit. Por spiunët e shumtë të asaj kohe këtë fakt ia kishin çuar në vesh gjahtarit më të madh të makinave të bukura në Berat, superkriminelit të ardhshëm Altin Dardhës.

Emblema e tmerrit në Berat
Me të mësuar se makina numër një në Berat ishte fshehur në pularinë e Ziut, Dardha me çerrat (ushtarët) e tij zbarkon aty dhe pasi e gjen kapanonin ku ishte murosur, rrëzon muret duke e bërë të tijën. Bashkë me të një grup tjetër i bandës së njohur të Beratit i mori Ziut edhe një furgon të mbyllur, fare të ri, tip Renault. Makina e kuqe që nga ajo ditë do të shfaqej nëpër rrugët e qytetit të vrarë nga krimi fillimisht misterioze dhe më pas vetëm e frikshme. Pas vrasjeve të para në Beratin e vitit 1997, Altin Dardha ishte renditur në top listën e kriminelëve. Ndërsa shfaqja e tij për qytetarët gjaktrembur ishte shndërruar në një ritual ankthndjellës. Reth orës 11 të paradites, Dardha i kapardisur në vendin e shoferit më një automatik "Kallashnikov" me tre krehëra të lidhur së bashku të nxjerrë në dritare shfaqej në mes të qytetit në sheshin para hotel-turizmit dhe menjëherë lajmëronte për prezencën me një breshëri fishekësh në ajër. Menjëherë më pas, mes tmerrit, qendra e qytetit pastrohej nga njerëzit që merrnin arratinë duke u mbyllur nëpër banesat e tyre, apo edhe duke u fshehur nëpër lagje. Ishte një breshëri që lajmëronte mbylljen e të gjithë aktivitetit në qytet, duke lançuar njëkohësisht fillimin e kohës së një lloj shtetrrethimi, mbret i të cilit ishte njeriu më kadillak të kuq, Altin Dardha. Me kalimin e ditëve, sikur të kishin fituar një lloj refleksi të kushtëzuar, banorët largoheshin pa qenë nevoja që Altin Dardha të qëllonte në ajër. Mjaftonte që në horizont të dukej duke u afruar turiri i kuq i kadillakut të tij.

Atentati dhe fundi i Kadillakut
Për rreth 4 muaj me radhë, deri në datën 24 korrik 1997, Dardha nuk e ndërroi makinën. Autovetura e kuqe ishte shndërruar në tmerrin e qytetit, ndërsa Altin Dardha kishte vetënumëruar se deri në atë kohë u kishte privuar jetën 56 njerëzve. Bandat e Beratit kishin ndarë qytetin në dy pjesë dominimi dhe ishte koha kur në kanale mëngjeseve gjendeshin nga 3-4 kufoma. Shkaku i sherrit që solli fundin e historisë së kadillakut të kuq ishte ekzekutimi nga Dardha i Ilir Pashës, një anëtar i bandës së Jaupëve. Menjëherë Jaupët kundërpërgjigjen duke organizuar në hyrje të lagjes Çelepias të Beratit një pritë të llogaritur si gracka më e vështirë për të mbetur i gjallë. Mbrëmjen e 24 korrikut 1997 banda e Jaupëve kishte montuar në hyrje të lagjes mitralozë të rëndë e të lehtë, armë kundërtanke dhe armë të lehta të të gjitha llojeve. Sapo makina e kuqe shfaqet në largësinë rreth 100 metra, hapet zjarr. Makina shpohet nga qindra predha, tymi i barotit mbulon lagjen. Por, pasi afrohen, Jaupët dhe mbështetësit e tyre vënë re se në makinë mungonte pikërisht ai që nuk duhet të mungonte, Altin Dardha. Plumbat kishin bërë shoshë Gazmend Cufen, Lorenc Dardhën dhe Robert Koraqen. Po atë ditë, pas largimit të kufomave, miq të përbashkët të Dardhës, Cufes dhe Jaupëve i vunë flakën kadillakut të kuq "që kishte sjellë vetëm fatkeqësi". Në karakasën e tij të hedhur në afërsi të Kombinatit të Tekstileve nuk mund të gjeje 10 centimetra katrorë pa një vrimë plumbi.


Kadillaku dhe atentati i dështuar me pushkë snajper

Njeriut që i mbijetoi atentatit të 24 korrikut 1997, edhe pse mëkatët i kishte të shumta, prania e makinës luksoze i kishte sjellë edhe një herë tjetër fat. Në qershor të të njëjtit vit, ndërsa kishte ndaluar pa zbritur nga makina në afërsi të Pallatit të Kulturës në Berat, Dardha u qëllua nga lartësitë e kalasë me një pushkë snajper. Të dy plumbat e lëshuar nga kundërshtari i tij i betuar Burhan Tomorri, rrahën në asfaltin e rrugës fare pranë derës së kadillakut ku ndodhej Dardha. Dështimi i një atentati të tillë është shpjeguar me faktin se në drejtim vertikal, nga lart-poshtë, snajerin nuk mund ta përdorin amatorët duke shënuar saktë. Madje goditja në shenjë nga ky lloj pozicioni quhet e rastësishme.


Jaupët i prenë veshin të njohurit të tyre për Dardhën

Pas atentatit të 24 korrikut, ndërsa kishin mësuar se Altin Dardha ende ishte gjallë, Jaupët ishin vënë në kërkim të tij. Në momentin që qëllohej me të gjitha llojet e armëve drejt makinës, Dardha që kishte patur fatin të ulej në sediljet e pasme (kjo nuk kishte ndodhur pothuajse kurrë) kishte hapur derën në kohë dhe ishte larguar me 4 plumba në trup. Në anën e sipërme të rrugës ai ishte strehuar në shtëpinë e një të njohuri, i cili i kishte dhënë ndihmë. Ky person, që ishte njëkohësisht edhe mik i Jaupëve, kishte lajmëruar një tjetër mik potent të Altinit. Ai e dërgon Dardhën fillimisht në spitalin e Fierit dhe më pas në atë të Janinës në Greqi, ku shërohet përfundimisht. Me të mësuar se Dardha ishte ndihmuar nga miku i tyre, Jaupët i shkojnë atij në shtëpi dhe i presin njërin vesh.

--------

KERKUAN 500 MIJE DOLLARE SI AGJENTE TE INTERPOL

Gjobë pronarit të "Espanja"
Arrestohen 4 gjobvënësit, 2 specialë të RENEA


--------------------------------------------------------------------------------

Ferdinand Dervishi

I mbushur me mllef, pak më shumë se një javë më parë, Roland Ziu, pronar i një bar-restoranti të njohur të zonës së ish-bllokut në Tiranë, kishte ngjitur shkallët e Drejtorisë së Policisë së Tiranës. "Nuk mund të ma fusin mua dy policë të trashë dhe dy morra nga ata që sillen sikur të kenë çliruar Tiranën", ishte monologu që i shkallmonte nervat. Ish-student i Akademisë së Rendit dhe ish-oficer i policisë në Lushnjë, Rolandi kishte vendosur të denonconte faktin se dy policë të RENEA-s, Alban Xhavara dhe Artan Elezi dhe dy miq të tyre, Astrit Dinoshi dhe Alban Strober, i kishin kërkuar 500 mijë USD në këmbim të zhdukjes së dokumenteve hetimorë të drejtësisë së një shteti të huaj, që, sipas tyre, e akuzonte për trafik droge. "Janë të zgjuar, por tek unë kanë ngatërruar adresë", kishte qenë një nga fjalitë e para të pronarit të lokalit, para njërit prej drejtuesve të lartë të policisë së Tiranës.

Gjoba 500 mijë USD
Nga goja e Roland Ziut, pronarit të lokalit të sukseshëm "Espanja", krerët e policisë së Tiranës kishin dëgjuar vërtet një nga ato histori që klasifikohen si të rralla. "Vijnë e më thonë se janë të INTERPOL-it e të antidrogës dhe se duan të më ndihmojnë", kishin qenë fjalët e para të pronarit. "Më tej më thonë se unë kisha probleme me drejtësinë zvicerane, e cila ka hapur një dosje hetimore që tashmë ka mbërritur në Tiranë dhe që është pikërisht në duart e tyre. Pra, sipas tyre, ata e kishin në dorë që kjo dosje të mbyllej përfundimisht duke më liruar nga akuzat që do të më kushtonin shumë vite burg. Ndërsa si shpërblim për këtë donin tu jepja 500 mijë USD. Të zgjuar, apo jo?". Në vazhdim Rolandi kishte sqaruar se nuk kishin munguar edhe kërcënimet apo shantazhet në adresë të tij nga ana e dy policëve të RENEA-s që i kërkonin të paguante shifrën. Në fakt, policia pas këtij kontakti kishte kuptuar se çështja ishte serioze. Për më tepër, në mes ishin edhe dy kolegë të tyre të forcave më të zgjedhura të policisë, RENEA. Një detaj që kishte kërkuar edhe konsultime me ministrin e Rendit. Gjithsesi, menjëherë pas kontaktit me pronarin e lokalit, policia kishte filluar përgatitjet. Përballë kishin një grup vjedhësish tepër të sofistikuar.

Arrestimi në flagrancë
Krerët e policisë së Tiranës prej një javë kishin dhënë shenja nervoziteti. Edhe pse ishin llogaritur të gjitha detajet e operacionit që do të fuste në grackë grupin e vjedhësve, ai po vononte. Telefonatat drejtuar pronarit të "Espanjës" ishin rralluar dhe takimi për dhënien e shumës nuk po realizohej. Dikur krerët e policisë së Tiranës kishin menduar edhe për rrjedhje të informacionit dhe tërheqje të mashtruesve-vjedhës. Gjithsesi, grepat ishin hedhur. Lokali "Espanja" survejohej nga forca të policisë kriminale, ndërkohë që nën vëzhgim ishin marrë edhe lëvizjet e dy policëve të RENEA-s, Alban Xhavara dhe Artan Elezi. Në këtë gjendje të nderë dhe të pa emër kishte kaluar një javë e plotë, por vjedhësit nuk po dukeshin. Në momentin kur u mendua se gjithçka ishte hedhur në erë, karremi kafshohet. "Në orën 11.30 takohemi në lokal për të bërë atë marrveshjen", kishte qenë telefonata e shumëpritur e mbërritur në orët e para të mbrëmjes së djeshme. Një telefonatë që kishte kthyer në punë të gjithë drejtuesit e lartë të policisë së Tiranës. Në drejtim të vendit të caktuar ishin dërguar menjëherë forca shtesë të policisë kriminale. Rreth orës 11.30, fiks në kohën dhe vendin e caktuar, kishin mbërritur 4 vjedhësit, dy policët e RENEA-s me dy të tjerët. Akordi kishte qenë që pronari i lokalit t'u jepte një pjesë të shumës së kërkuar. Ishin të gjitha kartmonedha me numër serie të shënuar nga policia. Momenti final kishte qenë më i lehtë se sa drejtuesit e policisë së Tiranës e kishin pritur. Sapo pakoja me të holla kishte kaluar në dorë të policëve të RENEA-s, agjentët e policisë kriminale u ishin hedhur sipër me pitoletat në duar. Policët e RENEA-s ishin dorëzuar pa rezistencë.


Policia: Presim denoncime, grupi ka vënë gjoba të tjera

Burime të policisë së Tiranës pohuan se grupi kriminal në përbërje të të cilit ishin edhe dy policë të RENEA ushtronte veprimtarinë e tij prej gati një viti. Pre e tij ishin pronarë dhe biznesmenë të cilët në një të shkuar të afërt mund të ishin pasuruar në mënyrë të pandershme duke shpërndarë apo bërë trafik droge në shtete të ndryshme të Europës. Të njëjtat burime pohuan se janë në pritje të denoncimeve nga persona të dëmtuar prej mashtrimeve të këtij grupi. Policia pohoi gjithshtu se grupi kishte krijuar një mënyrë shumë origjinale të mashtrimit si dhe infrastrukturën që i duhej për të realizuar qëllimet e tij. Kështu është zbuluar se dy civilët paraqiteshin herë si agjentë të INTERPOL-it, herë si agjentë të antidrogës. Madje është vërtetuar se në raste të ndryshme kanë përdorur dokumente fals për të arritur qëllimin e tyre. Po kështu mendohet se njëri prej tyre është një njohës i mirë i kompjuterit nga ku nxirrte dhe sajonte dokumente false për të bindur viktimat se vërtet drejtësia i kishte shpallur në kërkim. Ndërsa roli i dy policëve të RENEA-s është përcaktuar nga policia si mbështetës. Detyra e tyre ka qenë të shfaqeshin para viktimave si njerëz të policisë dhe në momente të caktuara janë përdorur edhe për të bërë presion ndaj atyre.

----

Wow..

[Toro]

Ah Brari , Brari sa naiv qe behesh....
Kam nje shok ne RENEA. Me thote qe ketu e nje vit do Nano ti heqi nga RENEA te veri njerez te tijet atje. I kish derguar para nje viti te vrisnin nje "kriminel" shume te kerkuar nga Interpoli , qe gjoja kishte bere nja 30 vrasje. Kur cunat e RENEAS( jane shumica tiranas) shkuan te zbatonin urdhrin pane se ai "krimineli" ishte nje bisnezem i ndershem tiranas dhe FUNKSIONAR i PD se deges te Tiranes. Sigurisht nuk e zbatuan urdhrin sepse e njihnin fare mire se kush ishte ai person dhe e dinin qe nuk ishte as kriminel , as i kerkuar nga Interpoli. Ja pse do ti heqi keta te RENEAS dhe te veri te tijet qe tani ne prag te zgjedhjeve te beje terror. Do te veri njerez qe zbatojne urdhra verbalisht. Keta cunat e RENEAS jane ata qe Sala i coi ne 1997 ne Vlore me nga nje shkop gome per te mbrojtur shtetin. E njohin shume mire " trimin"Fatos dhe kelyshet e tij . Keta i coi Nano ne 1998 te nenshtronin Lazaratin dhe u "nxeh" qe u kthyen me duar bosh ( pa vrare asnje ) nga Lazarati.Para nje vit i coi te vrisnin funksionarin e PD dhe nuk zbatuan urdhrin. Tani u ka kurdisur kete pucin me pronarin e "Espanjes" per ti hequr qafe. Keto gjona i di une ne SHBA , habitem si i hani ju atje. Nejse...Shqiperi hesapi.

[Brari]

une ftoj te shkruajne njerzit cka dine por vet jam i varfer nga kto gjera..pra i marr vesh gjerat me vonese..

Thx toro..

[BOKE]

Mbas shume zhurme dhe komente per efikasitetin e policise, ja ku perfundon ceshtja. "U mbars mali e polli nje mi."

TIRANE (25 Shtator) - Eshte lene i lire efektivi i forcave speciale Artan Xhavara, i cili u arrestua 2 dite me pare nga policia nen akuzen per pjeswmarrje, ne nje grup qe vinte gjoba dhe kercenonte me jeten, biznesmene te ndryshem ne kryeqytet Artan Xhavara eshte lene i lire, sepse sipas prokurorit te kesaj ceshtjeje, nuk ekzistojne prova qe e fajesojne ate. dxh/dxh (BalkanWeb)