Ministri i Mbrojtjes, Pandeli Majko, njoftoi dje se kishte refuzuar ftesën e ministrit të Mbrojtjes të Malit të Zi
Majko: Nuk ulem në tryezë me homologun e Malit të Zi
TIRANË – Ministri i Mbrojtjes, Pandeli Majko, ka refuzuar ftesën e kolegëve të tij të Malit të Zi për një tryezë të rrumbullakët, ku do të diskutohet çështjet e sigurisë rajonale dhe bregdetare. Në një konferencë për shtyp, dhënë dje, ministri Majko bëri të ditur se arsyeja pse ai e refuzonte këtë ftesë që i kishte mbërritur në zyrën e tij, ishte fakti që nuk mund të ulet në një tryezë me ministrin e Mbrojtjes së Serbisë, kur në Beograd po përgatitet një Kushtetutë, e cila e llogarit Kosovën si pjesë të territorit të Serbisë. Megjithëse Majko e vlerësoi si miqësore ftesën e kolegëve të tij, deklaroi mospjesëmarrjen e tij në Konferencën për Sigurinë Rajonale, që do të zhvillohet në Malin e Zi. Ai sqaroi se "me strukturat e sigurisë në Mal të Zi kemi një marrëdhënie nga më të mirat". Ministri i Mbrojtjes shtoi se, "me keqardhje, mund të them se unë nuk mund të shkoj në aktivitete për t'u ulur në të njëjtën tryezë me ministrin e Mbrojtjes së një vendi, i cili shumë shpejt presupozohet të ketë një kushtetutë, që mund të orientojë një varg problematikash të sigurisë në rajon". "Ne nuk mund të bëjmë dhe të ecim njëkohësisht në dy rrugë: në rrugën e krijimit të perceptimit sikur gjithçka shkon në rregull dhe, ndërkaq, në Beograd të shkruhet kushtetuta e konfliktit",- theksoi Majko. "Kjo kushtetutë rrezikon ta mbajë jo vetëm Serbinë, por edhe Malin e Zi, Kosovën dhe Shqipërinë jashtë strukturave të integrimit rajonal dhe atij evropian",- tha ministri.
Ftesa
Më parë, tha ai, kam pasur edhe një ftesë nga Ministria e Mbrojtjes e Serbisë dhe Malit të Zi. “Në fakt, nuk ishte ftesë e mirëfilltë, por një tentativë për të filluar diskutimin e marrëveshjeve bilaterale, normale, do të thosha, të cilat, edhe në kuptimin teorik, po edhe atë të përgjithshëm, i shërbejnë integrimit të përbashkët të Serbisë e Malit të Zi, por gjithsesi i shërbejnë një vizioni që, në fund të fundit, do të bashkojë qytetarët e Evropës Juglindore për procesin mëse normal të integrimit rajonal. Por, ndërkaq, e bashkëlidhur kjo me fakte, të cilat gjithsesi ende nuk janë në vëmendje të publikut, do të thosha, që mund të theksohen dhe të bëhen disa burime përballë ftesave, të cilat, në një plan të veçantë, nuk kanë dhe nuk ofojnë asnjë efekt negativ”,- sqaroi Majko. Nga informacionet që vetë Majko ka publikuar dje “dhe reagimet që vijnë edhe nga politikanë të Kosovës, siç është reagimi i kryeministrit Rexhepi apo i zotit Thaçi, në Beograd me pak fjalë po përgatitet kushtetuta e konfliktit”.
Kushtetuta
Kjo kushtetutë, tha ministri Majko, e llogarit Kosovën si pjesë të territorit të Serbisë, pra, nuk mund të konsiderohet me emër tjetër përveçse si kushtetutë të konfliktit. Nuk dëshiroj të mendoj se kjo do të ketë të bëjë me krijimin e një atmosfere emocionale, duke e konsideruar këtë kushtetutë pikërisht me emrin e saj të vërtetë. Por mendoj se kjo është një kushtetutë, e cila do të kalojë në instancat përkatëse të Serbisë dhe do të krijojë një varg problemesh të paparashikuara për sistemin e sigurisë rajonale, për sistemin e sigurisë, në të cilin Shqipëria dëshiron të qëndrojë partnere për ta orientuar drejt një sistemi të sigurisë, i cili, në fund të fundit, në një të ardhme të afërt, nuk do të ketë nevojë për ushtarët e NATO-s në rajon. Sistemi i sigurisë aktualisht, sidomos në Evropën Juglindore,- vijoi më tej ministri shqiptar i Mbrojtjes,- që përfshin Bosnjën, Hercegovinën, Serbinë, Malin e Zi, Kosovën, Maqedoninë dhe Shqipërinë, mbetet gjithsesi një sistem delikat, një sistem delikat që ka të bëjë sa me të kaluarën, aq edhe me një varg problemesh që janë përballë politikanëve për t’i zgjidhur. Ministri Majko shtoi se "ky fakt do të jetë shumë problematik, nëse do të kryhet në zyrat e Beogradit. Serbët historikisht kanë pasur fat, por fati i tyre gjithsesi mbetet eksperimental. Unë mendoj se ata duhet t’u japin fund eksperimenteve. Ata duhet të zbatojnë Rezolutën 1244 të Kombeve të Bashkuara". Majko e konsideroi një moment të veçantë emërimin e z. Harri Holker në postin e kryeadministratorit të OKB-së në Kosovë. "Tashmë Kosova ka institucionet e veta, qeverinë e saj dhe përfaqësuesit e vet, për të hyrë në rrugën e dialogut mëse normal me Serbinë",- deklaroi dje ministri i Mbrojtjes, Majko.
Krijoni Kontakt